17.11.2016

ОДАМ САВДОСИ — ДАВР МУАММОСИ

Тошкент шаҳридаги «Ўзбекистон» меҳмонхонасида «Одам савдосига қарши курашиш — долзарб масала» мавзуида семинар бўлиб ўтди. Тадбир Ўзбекистон Республикаси Ички ишлар вазирлиги ва «Istiqbolli Avlod» ижтимоий ахборот маркази ҳамкорлигида ўтказилди.

Семинарда ИИВ Ҳуқуқбузарликларнинг олдини олиш бош бошқармаси Вояга етмаганлар ўртасида назоратсизлик ва ҳуқуқбузарликларнинг профилактикаси бўлимининг жойлардаги тизим ходимлари, шунингдек, одам савдосига қарши курашиш бўйича соҳа вакил­лари ҳамда мутасадди ташкилот ходимлари иштирок этди.

Тадбирдан кўзланган асосий мақсад — келгусида давлат ва жамоат ташкилотлари ўртасида, шунингдек, инсон ҳуқуқ ва манфаатларини ҳимоя қилишга қаратилган фаолият доирасида аҳоли, айниқса, вояга етмаганлар орасида одам савдосининг олдини олиш, унга қарши курашиш, одам савдоси жабрланувчиларига кўмаклашишга йўналтирилган ҳамкорлик самарадорлигини оширишдир.

Семинар давомида одам савдоси муаммосининг долзарблиги, давлатимиз томонидан ушбу иллатга қарши курашиш мақсадида қабул қилинган ҳуқуқий-меъёрий ҳужжатлар, тегишли мутасадди ташкилотлар томонидан амалга оширилаётган чоралар ҳақида атрофлича маълумотлар берилди. Трансмиллий кўринишга эга бўлган одам савдосига қарши курашиш учун барча давлат ташкилотлари ва инсон ҳуқуқлари бўйича миллий институтларнинг ўзаро ҳамкорлигини янада мустаҳкамлаш зарурлиги таъкидланди.

Шунингдек, «Одам савдосига қарши курашиш тўғрисида»ги қонунда алоҳида белгиланган одам савдосидан жабрланган болаларга ёрдам кўрсатиш, вояга етмаганларнинг қаровсизлиги ва назоратсиз қолишига ҳамда улар ўртасида ҳуқуқбузарликлар ва жиноятлар содир этилишига сабаб бўладиган ҳолатларни аниқлаш масалалари атрофлича муҳокама қилинди.

Интерактив усулда ўтказилган тадбир давомида одам савдоси жиноятининг асосий унсурлари, шу жумладан, вояга етмаган жабрланувчиларнинг психологик ва ҳуқуқий ҳолатини аниқлаш усуллари, жабрланувчиларга кўмаклашиш каби масалалар юзасидан қизғин баҳс-мунозара бўлди.

Тадбир якунида ижтимоий ҳамкорликни мустаҳкамлаш, одам савдосига қарши янада самарали курашиш бўйича таклиф ва тавсиялар билдирилди.

 

Равшан ШОДИЕВ,

«Ўзбекистон овози» мухбири. 


Фикр ва мулохазалар

Защита от автоматических сообщений

Сўнгги янгиликлар: