15.11.2016

АҲОЛИ БАНДЛИГИ ТАЪМИНЛАНСА,

ижтимоий ҳимоя кафолати мустаҳкам бўлади

Мамлакатимизда аҳолини иш билан таъминлаш, ўз мустақил ишини бошлашга оид ташаббусларини қўллаб-қувватлаш ва рағбатлантиришга алоҳида эътибор қаратилмоқда.

Одамлар меҳнат қилиши ва яхши ҳаёт кечириши учун муносиб шароит яратиб бериш, унумли ва ижодий меҳнат қобилиятини ривожлантиришга кўмаклашиш аҳоли бандлигини таъминлаш масаласида устувор тамо­йил этиб белгиланган. Шундан келиб чиқиб, ҳар йили бандлик дастури қабул қилиниб, унинг ижросига жиддий эътибор бериляпти.

Бу Ўзбекистон ХДП электорати ҳисобланган ижти­моий ҳимояга муҳтож, иш топишда қийналаётган ва меҳ­нат бозорида тенг шароитларда рақобатлашишга тайёр бўлмаган кишилар манфаатларига хизмат қилади. Демак, бандликни таъминлашнинг янги имкониятларини очиш бўйича амалий таклифларни илгари суриш ва улар ҳаётга татбиқ этилиши учун барча куч ва имкониятларни бирлаштириш, курашиш муҳимдир.

Олий Мажлис Қонунчилик палатасидаги Ўзбекистон ХДП фракциясининг кенгайтирилган йиғилишида шу ҳақда сўз борди. Депутатлар, тегишли вазирлик ва идоралар вакиллари, партия Марказий Кенгаши ходимлари шу йилнинг 28 октябрида тасдиқланган 2017 йилга аҳоли бандлиги дастури бўйича парламент назоратини амалга ошириш масалаларини кенг муҳокама этишди.

Таъкидланганидек, 2017 йилга мўлжалланган дастур параметрлари олдинги йилга нисбатан мақбуллаштирилган. Унда ҳудудлар ва корхоналарнинг реал имкониятлари ҳисобга олинган. Масалан, туман ва шаҳарларда кичик саноат ҳудудларини ташкил этиш, қурилиш ва инфратузилмани ривожлантириш ҳисобига иш ўринлари яратиш йўналишлари кенгайтирилган.

Фракция аъзолари дастур ижроси устидан олиб бориладиган назорат тадбирларини масъул қўмита билан биргаликда изчил давом эттириш, уларнинг натижаларини жойларда чуқур муҳокама этиш кераклигини таъкидлашди.

— Мазкур дастур нафақат аҳоли бандлигини таъминлаш ва даромадларини ошириш, балки мамлакатдаги ижтимоий-иқтисодий, сиёсий бар­қарорликни мустаҳкамлашнинг муҳим омили бўлиб хизмат қилмоқда, — дейди Олий Мажлис Қонунчилик палатаси Меҳнат ва ижтимоий масалалар қўмитаси раиси, ЎзХДП фракцияси аъзоси Ёқуб Умаров. — Фракция­миз ташаббуси билан жорий йилга мўлжалланган бандлик дастурининг Қорақалпоғистон Республикаси ва Сурхондарё вилоятидаги ижроси ўрганилди ҳамда уларнинг натижалари қўмитамизнинг мазкур ҳудудларда бўлиб ўтган кенгайтирилган мажлисларида кўриб чиқилди. Шунингдек, Меҳнат вазирининг дастурнинг биринчи ярим йиллик якунлари бўйича ижроси тўғрисидаги ахбороти эшитилди. Шу асосда хато ва камчиликларни вақтида бартараф этиш, келгусида дастурни янада такомиллаштириш чоралари белгиланди. Бу эса ҳукуматнинг аҳолини иш билан таъминлашга оид фаолияти устидан парламент назорати кучаяётганини кўрсатади.

ЎзХДП фракцияси аъзоларининг фикрича, дастур тармоқлар ва ҳудудларни ривожлантириш ҳамда инвестиция дас­турлари билан, энг муҳими, минглаб ёшлар, аёллар тақдири билан узвий боғлиқ. Шу боис унинг ижроси парламент қуйи палатасининг қўмиталарида, барча фракцияларда (депутатлик гуруҳлари) атрофлича кўриб чиқилиши лозим. Парламент назорати изчиллигида бунинг аҳамияти катта.

Йиғилишда фракция аъзолари тегишли давлат органлари ва нодавлат нотижорат ташкилотлари билан ҳамкорликда дастур ижросини мониторинг қилишга доир ишларни янада кучайтириш бўйича таклифлар билдиришди.

Шунингдек, 2017 йилда аҳоли бандлиги ­дастури ижроси устидан парламент назоратини амалга ошириш бўйича фракциямиз позицияси ишлаб чиқилди, назорат-таҳлил тадбирларини ташкил этиш бўйича вазифалар белгилаб олинди.

 

Лазиза ШЕРОВА,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: