08.11.2016

ЯНА БИР «ОРЗУ ЛАЙНЕРИ» — ЎЗБЕКИСТОНДА!

«Ўзбекистон ҳаво йўллари» миллий авиакомпанияси томонидан харид қилинган иккинчи «Boeing-787-8 Dreamliner» самолёти 5 ноябрь куни «Тошкент» халқаро аэропортига келиб қўнди.

Бутун жаҳонда «Орзу лайнери» номи билан машҳур бўлган янги самолёт олис Сиэтл­дан Тошкентгача 12 соатга яқин узлуксиз парвозни муваффақиятли амалга оширди. Замонавий технологиялар асосида яратилган ҳаво кемаси юқори самарадорликка эга, парвоз чоғида экипаж аъзолари ва йўловчилар асло толиқмайди. Ёқилғи сарфи аввалги авлод самолётларига нисбатан 10 фоизга кам. Учиш масофасининг узайтирилгани эса ҳаво кемасидан олис халқаро йўналишларда фойдаланиш имкониятини яратади.

Хабарингиз бор, дастлабки «Boeing-787-8 Dreamliner» жорий йилнинг 31 августида олинган эди. Ҳаво кемасидан фойдаланиш 5 сентябрдан бошланиб, илк халқаро йўналишдаги парвоз 9 сентябрда Олмаота шаҳрига амалга оширилди. Бугунги кунда миллий авиакомпаниямиз томонидан ушбу русумдаги самолёт кўплаб халқаро йўналишларда кенг фойдаланилмоқда.

Навбатдаги «Орзу лайнери»нинг келтирилиши билан авиакомпаниямизнинг бошқа олис йўналишлардаги қатновлари ҳам кенгаяди. Чунончи, «Ўзбекистон ҳаво йўллари» миллий авиакомпанияси Бош директори ­Валерий Тяннинг маълум қилишича, келаси йилнинг ёзидан бошлаб, ўзбек учувчилари Тошкентдан тўғридан-тўғри Нью-Йоркга парвозларни амалга оширишга киришади.

Айтиш керакки, яқинда «Боинг» корпорацияси президенти жаноб Р. Коннернинг мамлакатимизга ташрифи чоғида яна учта янги «Орзу лайнери»ни сотиб олишга келишилган. Миллий авиакомпаниямизнинг ­дастлабки иккита шу русумдаги самолётлари 787-8 модификациясига мансуб бўлса, кейингилари ўриндиқлар сони кўпайтирилган ва умумий ўлчами узайтирилган 787-9 модификациясида бўлади.

 

Алишер РЎЗИЕВ,

«Ўзбекистон овози» мухбири. 



DB query error.
Please try later.