27.10.2016

СОҒЛОМ ФАРЗАНД — СОҒЛОМ ВА АҲИЛ ОИЛАНИНГ МЕВАСИ

Қашқадарё вилоят ва Қарши шаҳар партия кенгашлари ҳуқуқ-тартибот идоралари билан ҳамкорликда шу мавзуда давра суҳбати ўтказди.

Тадбирда қиз болаларни жисмонан соғлом ва маънан етук этиб тарбиялаш, уларнинг таълим олиши, замонавий билим ва касб-ҳунарга эга бўлишини таъминлаш масалаларига эътибор қаратилди. Шунингдек, коллеж битирувчиларини ишга жойлаштириш, ўз ишини очиш истагидаги ёшларни қўллаб-қувватлаш ҳамда эрта турмушнинг салбий оқибатлари тўғрисида фикр-мулоҳазалар билдирилди.

— Бугун мамлакатимизда турли соҳаларда амалга оширилаётган кенг кўламли ислоҳотлар замирида инсон саломатлиги, унинг хотиржамлиги ва осуда турмуш кечиришига бўлган эътибор мужассам, — деди ЎзХДП Қарши шаҳар кенгаши раиси, шаҳар Кенгашидаги партия гуруҳи раҳбари Рашид Муртазаев. — Партиямиз Сайловолди дастурида тиббиёт соҳаси бўйича белгиланган вазифаларни ҳал қилиш, меъёрий-ҳуқуқий ҳужжатлар ижросини таъминлаш мақсадида депутатлик гуруҳимиз томонидан муайян саъй-ҳаракатлар амалга оширилмоқда. Жумладан, турли ташкилотлар билан ҳамкорликда хилма-хил тадбир, учрашув ва давра суҳбатлари ўтказил­япти. Уларга, айниқса, маҳалла аҳли ва фаолларининг кенгроқ жалб қилинаётгани яхши самара бермоқда.

2015-2019 йилларга мўлжалланган амалий Ҳаракат дастурига кўра, Қарши шаҳар кенгаши томонидан «Дори воситалари ва фармацевтик фаолият тўғрисида»ги Қонуннинг ижроси ҳақидаги масала сессияда муҳокама этилди. Партия электорати манфаатлари йўлидаги ҳеч бир масала эътиборимиздан четда қолмаслиги керак. Хусусан, «Соғлом она ва бола йили» Давлат дастурининг бажарилишини таъминлашда депутатларга берилган ваколатлардан самарали фойдаланишимиз лозим.

— Бугун аёллар давлатимиз ва жамиятимизнинг ардоғида, эътиборида, — деди халқ депутатлари Қарши шаҳар Кенгаши депутати, 6-умумий ўрта таълим мактаби директори Назира Ўроқова. — Ҳозирги кунда оналик ва болаликни муҳофаза қилиш, опа-сингилларимизнинг оғирини енгиллаштириш, уларнинг қобилият ва имкониятларини рўёбга чиқариш бўйича кенг кўламли ишлар изчил давом эттирилмоқда. Замонавий тиббий асбоб-ускуналар билан тўлиқ жиҳозланган қишлоқ врачлик пунктлари, диагнос­тика марказлари, туғуруқхоналар, скрининг ва перинатал марказлари ишга туширилди. Оналик ва болалик муҳофазаси устувор йўналишга айланди. Ҳар бир аёлнинг сиҳат саломатлигини таъминлаш масаласи назоратга олинди. Бундай шароитда ҳар томонлама баркамол авлодни тарбиялаш улуғ мақсад, масъ­улиятли вазифа ҳисобланади.

Тадбирда, шунингдек, «Ўзтемир­йўлйўловчи» акциядорлик жамия­ти Қашқадарё филиалидаги бошланғич ташкилот етакчиси Улуғбек Донаев, Қарши темир йўл ИИБ ҳуқуқбузарликларнинг олдини олиш бўлинмаси бошлиғи, майор Улуғбек Раҳимов, Қарши шаҳар Кенгаши депутати Жамила Тўрақулова ҳам мавзу юзасидан ўз фикр-мулоҳазаларини билдирди.

Келгусида бундай тадбирлар қамровини янада кенгайтириш бўйича тавсиялар ишлаб чиқилди.

 

Шаҳло ХУДОЙҚУЛОВА,

ЎзХДП Қашқадарё вилоят кенгаши сектор мудири.



DB query error.
Please try later.