22.10.2016

НОМЗОДЛАР ТЕНГ ҲУҚУҚЛАРГА ЭГА

Мен бу йил сайловда биринчи марта иштирок этаман. Яқинда бир тадбирда Президентликка номзодларнинг ишончли вакиллари бўлиши ҳақида эшитдим. Қонунчилигимизда бу масала қандай белгиланган?

Мухлиса Орифжонова,

 Фарғона давлат университети талабаси.

 

Салауатдин ХУДАЙБЕРГЕНОВ, Олий Мажлис Қонунчилик палатасидаги ЎзХДП фракцияси аъзоси:

— «Ўзбекистон Республикаси Президенти сайлови тўғрисида»ги Қонуннинг 29-моддасида ишонч­ли вакилларнинг ҳуқуқий мақоми мустаҳкамланган. Унга кўра, Президентликка номзод 15 нафарга қадар ишончли вакилларга эга бўлишга ҳақлидир.

Ишончли вакиллар номзодга сайлов кампания­сини ўтказишда ёрдам беради. Уни Ўзбекистон Республикасининг Президенти этиб сайлаш учун тарғибот олиб боради. Давлат ва жамоат ташкилотлари сайлов комиссиялари билан бўладиган муносабатларда номзоднинг манфаатини ҳимоя қилади.

Ўзбекистон Республикаси Президентлигига номзоднинг тақдимномасига кўра, ишончли вакилларни Ўзбекистон Республикаси Марказий сайлов комиссияси рўйхатга олади. Марказий сайлов комиссияси уларга тегишли гувоҳномалар беради.

 

 

Менга сайлов комиссияларининг иши қандай ташкил этилиши ҳақида тўлиқроқ маълумот берсангиз...

Азамат Умаров,

Тошкент кимё-технология институти талабаси.

 

Феруза ЭШМЕТОВА, Олий Мажлис Қонунчилик палатасидаги ЎзХДП фракцияси аъзоси:

— «Ўзбекистон Республикаси Президенти сайлови тўғрисида»ги Қонунга мувофиқ, сайловни ташкил этиш ва уни ўтказиш сайлов комиссиялари томонидан амалга оширилади.

Сайлов комиссиясининг мажлисларида комиссия таркибининг камида учдан икки қисми иштирок этиши керак. Комиссиянинг қарорлари очиқ овоз бериш орқали кўпчилик овози билан қабул қилинади. Комиссия қарорига қўшилмаган комиссия аъзолари ўзларининг алоҳида фикрларини айтишга ҳақлидирлар, бу фикрлар ёзма тарзда мажлис баёнига илова этилади.

Сайлов комиссияларининг ўз ваколатлари доирасида қабул қилган қарорлари барча давлат ва жамоат идоралари, корхоналар, муассасалар ва ташкилотлар ижро этиши учун мажбурийдир.

Сайлов комиссиясининг аъзоси комиссиянинг қарорига мувофиқ, сайлов ўтказишга ажратилган маблағ ҳисобидан ўртача иш ҳақи сақлаб қолинган ҳолда, сайловга тайёргарлик кўриш ва уни ўтказиш даврида ишлаб чиқариш ёки хизмат вазифаларини бажаришдан озод этилиши мумкин.

Комиссия аъзоси шахсан берган аризасига мувофиқ, шунингдек, ваколатларидан маҳрум этилган тақдирда ўз вазифасини бажаришдан озод қилиниши мумкин.

Сайлов комиссияларининг раиси, раис ўринбосари, котиби ва аъзолари сиёсий партияларга аъзо бўлиши мумкин эмас. Бир шахс фақат битта сайлов комиссиясига аъзо бўлиши мумкин.

Округ ва участка сайлов комиссиялари ўз фаолиятини Ўзбекистон Республикаси Президенти сайловининг якунлари чиқарилганидан сўнг тўхтатади.

 

 

Мамлакатимиздаги барча сиёсий партия­лар Президентликка номзодлар кўрсатди. Қонунчилигимизда номзодлар ҳуқуқларининг кафолатлари қандай белгиланган?

Мафтуна Юсупова,

Мирзо Улуғбек номидаги Ўзбекистон Миллий университети талабаси.

 

Собитхон ТУРҒУНОВ, Олий Мажлис Қонунчилик палатасидаги ЎзХДП фракцияси аъзоси:

— Аввало, таъкидлаш керакки, Ўзбекистон Республикаси Президентлигига номзод этиб рўйхатга олинганларнинг ҳаммаси тенг ҳуқуқ­ларга эга.

Номзод сайловчилар билан учрашувлар ўтказиш, сайловолди йиғилишларида сўзга чиқиш, телевидение кўрсатувлари ва радио эшиттиришларида қатнашиш вақтида сайловни ўтказиш учун ажратиладиган маблағлар ҳисобидан ўртача ойлик иш ҳақи сақланган ҳолда, ишлаб чиқариш ёки хизмат вазифаларини бажаришдан озод бўлиш ҳуқуқига эга.

Номзод рўйхатга олинганидан кейин Ўзбекистон Республикаси ҳудуди доирасида давлат йўловчилар транспортининг барча турларида (шаҳар йўловчилар транспортидан, таксидан ва транспорт бошқа турларининг буюртма йўналишларидан ташқари) текинга юриш ҳуқуқига эга бўлади.

Қонунда, шунингдек, номзодлар ҳуқуқларининг бошқа кафолатлари ҳам белгиланган.

 

«Ўзбекистон овози» мухбири

Лазиза ШЕРОВА

ёзиб олди.


Фикр ва мулохазалар

Защита от автоматических сообщений

Сўнгги янгиликлар: