20.10.2016

ЁШ СИЁСАТЧИЛАР БИЛАН УЧРАШУВ

Ўзбекистон ХДП Тошкент шаҳар кенгаши ҳамда Тошкент шаҳар ҳокимлиги ҳамкорлигида ёшлар билан учрашув ўтказилди. Унда депутатлар, ҳокимлик мутахассислари, фаоллар ҳамда «Ёш сиёсатчилар» клуби координаторлари иштирок этди. «Истиқбол» ёшлар қанотининг «Депутат ва ёшлар» лойиҳаси доирасида бўлиб ўтган тадбирда мамлакатимизда ёшларга яратилаётган шароит­лар, кенг қамровли ислоҳотлар хусусида сўз борди.

Тошкент шаҳар ҳокими ўринбосари, хотин-қизлар қўмитаси раиси Фарида Абдураҳимова шаҳар Кенгаши сессияларида ёшларнинг ҳуқуқ ва манфаатларини ҳимоя қилиш бўйича кўриб чиқилган масалалар ҳамда уларнинг аҳамиятига эътибор қаратди. Ўзбекистон Республикасининг «Ёшларга оид давлат сиёсати тўғрисида»ги Қонунида белгиланган вазифалар, уларнинг мазмун-моҳияти ҳақида алоҳида тўхталиб ўтди.

Учрашувда ёш сиёсатчилар Халқ депутатлари Тошкент шаҳар Кенгаши фаолияти билан яқиндан танишиш имконига эга бўлишди.

— Партиямиз Сайловолди дас­турига кўра аҳоли, айниқса, ёшлар бандлигини таъминлаш устувор вазифа саналади, — деди ЎзХДП Шайхонтоҳур туман кенгаши раиси ўринбосари Сардор Дўстмуҳаммедов. — Шунинг учун депутатларимиз жойларда мазкур масалани ўрганиб, камчиликларга ечим топиш юзасидан муайян чора-тадбирлар олиб бормоқда. Ёшларимизни бўлажак раҳбарлар, депутатлар сифатида тарбиялаш, уларнинг билим ва кўникмаларини ошириб бориш мақсадида туркум тадбирлар ўтказилмоқда. Сиё­сий ўқувлар, дебатлар, қонунлар ойлиги ҳамда депутатлар билан мулоқотлар шулар жумласидан. Ўйлайманки, бу каби тадбирлар ёшларда янги фикр ва ғоялар туғилишига замин яратади.

Учрашувда Тошкент шаҳар ҳокимлиги ташкилий назорат бўлими бош мутахассиси Мурод Исабоев, ҳудудларни комплекс ривожлантириш йиғма бош бош­қармаси бошлиғи ўринбосари Наримон Исмоилов ва бошқалар ҳокимликдаги иш жараёни ҳақида атрофлича тушунча берди. Хусусан, ҳокимлик фаолиятида кадрларга қўйиладиган талаблар, ходимларнинг вазифалари, ҳуқуқ ва бурч­лари ҳақида сўз юритилди. Сиёсий партия фаоллари ҳамда депутатлар билан ҳамкорликда олиб борилаётган ишлар юзасидан маълумотлар тақдим этилди.

 

Зилола УБАЙДУЛЛАЕВА,

«Ўзбекистон овози» мухбири.



DB query error.
Please try later.