20.10.2016

МУҲИМ ТАДБИРГА ПУХТА ТАРАДДУД

Наманган шаҳридаги Ўзбекистон Республикаси Президенти сайловини ўтказувчи 79-сайлов участкасида кўргазмали семинар ташкил этилди.

Ўзбекистон Республикаси Биринчи Президенти раҳнамолигида мамлакатимизда сайловларни ўтказишнинг халқаро андозаларга мос мустаҳкам ҳуқуқий асоси яратилгани ушбу муҳим сиёсий тадбирнинг тенглик, ошкоралик ва демократик тамойиллар асосида ўтишини таъминлашда муҳим омил бўлаётгани таъкидланди.

— «Ўзбекистон Республикаси Президенти сайлови тўғрисида»ги қонунга мувофиқ, сайловчиларнинг ўз хоҳиш-иродасини эмин-эркин ифода этиши учун округда ташкил этилган 690 сайлов участкасида барча шароит яратилмоқда, — дейди 6-Наманган округ сайлов комиссияси раиси П.Маткаримов. — Жойларда ташкил этилган намунали сайлов участкаларида кўргазмали семинарлар ўтказилиб, бу борадаги илғор тажрибалар оммалаштирилаётгани яхши самара бермоқда. Мазкур семинарда нафақат Наманган шаҳри, балки барча туманлар вакиллари, вилоят бош­қармалари мутасаддилари ҳам иштирок этди.

Тадбир доирасида ўтказилган 6-Наманган округ сайлов комиссиясининг навбатдаги йиғилишида шаҳар ва туманлар ҳокимлари биринчи ўринбосарларининг сайлов участкаларини жиҳозлаш, ҳудудларни ободонлаштириш ва бошқа ташкилий тадбирлар бўйича амалга оширилган ишлар юзасидан ахбороти тингланди.

Наманган шаҳрида 389 минг 349 сайловчи рўйхатга олинган бўлиб, уларнинг ўз конституциявий ҳуқуқидан эркин фойдаланиши, танлаган номзодига овоз бериши учун ҳар томонлама қулай ва замонавий биноларда 140 сайлов участкаси ташкил этилган.

Семинар иштирокчиларига сайлов участкаларини муҳим сиёсий тадбирга тайёрлаш Наманган шаҳридаги 79-сайлов участкасида амалга оширилган ишлар мисолида намойиш этилди. Наманган агротадбиркорлик ва маиший хизмат касб-ҳунар коллежида ташкил этилган ушбу сайлов участкасида 2 минг 998 фуқаро овоз беради. Уларнинг 90 дан зиёди биринчи марта овоз берадиган ёшлардир.

Коллеж фойесида сайловга доир кўргазмали воситалар, овоз бериш кабиналари, бюллетенлар ҳамда сайлов варақалари ташлаш учун стационар ва кўчма қутилар ўрнатилган. Махсус жиҳозланган она ва бола хонасида барча шароит яратилган. Тиббиёт хоналари зарур дори-дармон воситалари билан таъминланган. Бу ерда сайлов куни малакали шифокор ва ҳамшираларнинг навбатчилиги ташкил этилади. Кузатувчилар, оммавий ахборот воситалари ходимлари учун ҳам қулайликлар яратилган.     

 

А.САТТОРОВ,

ЎзА мухбири.


Фикр ва мулохазалар

Защита от автоматических сообщений

Сўнгги янгиликлар: