11.10.2016

УМУМЖАМОА ҲИСОБИДА БИРИНЧИ

Пойтахтимизда дзюдо бўйича ўтган Гран-при туркумидаги халқаро турнирда Ўзбекистон терма жамоаси олтита олтин, учта кумуш ва ўн битта бронза медалига сазовор бўлди

Маданият ва спорт ишлари вазирлиги, Миллий Олимпия қўмитаси, мамлакатимиз дзюдо федерацияси, Халқаро дзюдо федерацияси (IJF), қатор вазирлик ва ташкилотлар билан ҳамкорликда тўртинчи бор ўтказилган Гран-при туркумидаги халқаро турнир якунланди.

Мусобақанинг дастлабки кунида ҳамюртларимиз умум­жамоа ҳисобида еттита медални қўлга киритганини хабар қилгандик. Беллашувларнинг навбатдаги кунлари ҳам юртимиз дзюдочилари учун муваффақиятли кечди.

Дастурга кўра, иккинчи кун баҳсларида эркаклар 73 кг, 81 кг, аёллар 57 кг, 70 кг вазн тоифаларида баҳсга киришишди.

Мухлислар вазни 73 килограммгача бўлган дзюдочилар ўртасидаги финал учрашувини катта ҳаяжон ва қизиқиш билан кузатдилар. Унда ҳамюртларимиз Мирзоҳид Фармонов ва Ғиёсжон Бобоев ўзаро куч синашди. Якунда омад тажрибали полвонимиз Мирзоҳид Фармоновга кулиб боқди. Айнан ушбу вазн тоифасида яна бир умидли дзюдочимиз Мусо Собиров эса шоҳсупанинг учинчи поғонасига кўтарилди.

Ёшлар ўртасида Осиё чемпиони Давлат Бобонов (81 кг) катталар ўртасидаги илк халқаро турнирини ғалаба билан бошлади. У финалгача бўлган барча учрашувларда рақибларини мағлубиятга учратди. Ҳал қилувчи беллашувда дзюдо ватани вакили Ватанабе Хаятони енгиб, олтин медалга сазовор бўлди.

Аёллар ўртасида Рио-де-Жанейро олимпиадаси қатнашчиси Гулноза Матниёзова (70 кг) финалда словениялик Анка Погачникка рўбарў келди. Учрашувнинг асосий дақиқаларида кучлар тенг келган бўлса-да, қўшимча бўлимда моҳир спортчимиз рақиби устидан соф ғалабани қўлга киритди. Бунинг учун 53 сония кифоя қилди ва Гулноза қизларимиз орасида биринчи бўлиб турнирнинг олтин медалини қўлга киритди.

Яна бир дзюдочимиз Санобар Султонова (57 кг) бронза медали билан тақдирланди.

Беллашувларнинг охирги кунида яна беш (78 кг, +78 кг, 90 кг, 100 кг ва +100 кг.) вазн тоифасидаги дзюдочилар баҳс­лари ўтказилди.

Бунгача халқаро мусобақаларда 81 килограмм вазн тоифасида юртимиз шарафини ҳимоя қилган Яҳё Имомов (90 кг) учун Тошкент турнири ўзига хос синов вазифасини ўтаб берди. У янги вазн тоифасида ҳам барча учрашувларни муваффақиятли якунлаб, мутахассислар ишончини оқлади. Яҳё финалда яна бир ҳамюртимиз Давронбек Сатторов билан беллашди ва бош совринга муносиб эканлигини намо­йиш этди. Мазкур вазн тоифасида яна бир ёш ва умидли дзюдочимиз Муҳаммадкарим Хуррамов эса шоҳсупанинг учинчи поғонасидан жой олди.

— Янги вазн тоифасида илк маротаба ўз имкониятимни синовдан ўтказдим, — дейди Яҳё Имомов. — Мусобақада бирорта учрашув осон кечгани йўқ. 90 килограмм вазн тоифасида ҳам сара полвонлар майдонга тушди. Шунга қарамай, олтин медаль олдим. Бу ютуқ мени янада кўпроқ ўз устимда ишлашга ундаши шубҳасиз, албатта. Мақсадим — келажакда шу вазн тоифасида Осиё ва жаҳон чемпионатлари, Олимпия ўйинлари медалларини қўлга киритишдир.

Рио-де-Жанейро олим­пиадаси иштирокчиси Сойиб Қурбонов (100 кг) ҳал қилувчи учрашувда озарбайжонлик Жалил Шукуровни енгган бўлса, Эркин Дониёров мусобақанинг бронза медали билан кифояланди.

Турнирнинг оғир вазн тои­фасидаги полвонлари беллашувларида ҳам ҳамюртларимиз совриндорлар қаторидан ўрин олди. Жумладан, унда Болтабой Болтаев (+100 кг) кўксини бронза медали безади.

Аёллар ўртасидаги сўнгги кун баҳсларида ҳамюртларимиздан Кумуш Йўлдошева (78 кг) ҳамда Раҳима Йўлдошева (+78 кг)лар шоҳсупанинг учинчи поғонасига кўтарилишди.

Шундай қилиб, кетма-кет тўртинчи бор мамлакатимиз мезбонлик қилган Гран-при туркумидаги йирик халқаро турнир поёнига етди. Унда ҳамюртларимиз умумжамоа ҳисобида энг кўп — йигирмата медални қўлга киритиб, биринчи ўринни эгаллади.

Ке­йинги ўринлардан эса Қозо­ғис­тон ҳамда Россия терма жамоалари жой олишди.

 

Эркин ХОЛБОБО,

«Ўзбекистон овози» мухбири.



DB query error.
Please try later.