Охирги сонда



Кўп ўқилган мақолалар



Долзарб мавзу



Мақолалар архиви

«    Yanvar 2019   
Du Se Cho Pa Ju Sha Ya
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3
08.10.2016

ПОЛВОНЛАРИМИЗ МАҲОРАТИ

уларнинг кучлилар сафидан жой олишига замин яратмоқда

Шу кунларда пойтахтимиз дзюдо бўйича Гран-при туркумидаги йирик халқ­аро турнирга мезбонлик қилмоқда. Юртимизда тўртинчи маротаба ўтказилаётган мазкур мусобақада жаҳоннинг йигирмага яқин давлатидан келган 135 полвон ғолиблик учун баҳс юрит­япти. Умумий соврин жамғармаси 100000 АҚШ долларини ташкил қилувчи беллашувларда эркаклар ва аёллар еттитадан вазн тоифасида майдонга тушмоқда.

— Ўзбекистонда жисмоний тарбия ва спортни ривожлантириш борасида кенг кўламли ишлар амалга оширилмоқда, — дейди Осиё дзюдо уюшмаси президенти Обейд Ал-Анзий. — Юртингизда йирик нуфузли мусобақаларни ўтказиш борасида катта тажриба тўпланганлиги халқаро спорт ташкилотлари томонидан алоҳида эътироф этилмоқда. Айниқса, Ўзбекис­тон дзюдочиларининг Олимпия ва Осиё ўйинлари, қитъа ҳамда жаҳон чемпионатлари, турли нуфузли турнирларда ғолиб ва совриндорлар сафидан ўрин олаётгани, янги-янги истеъдодларнинг кашф этилаётгани ўзбек дзюдо мактаби шуҳрати тобора юксалиб бораётганлигидан дарак бериб турибди. Жумладан, шу йилнинг ёзида Рио-де-Жанейро шаҳрида ўтган XXXI ёзги Олимпия ўйинларида ўзбек дзюдочилари Ришод Собиров ва Диёрбек Ўрозбоевнинг совриндорлар қаторидан жой олгани бунинг исботидир. 

Маълумот ўрнида шуни айтиш керакки, бугунгача Тошкент шаҳри мезбонлик қилган учта Гран-при туркумидаги беллашувларда полвонларимиз кучлилар қаторидан жой олиб, ўз ғалабалари билан мухлисларни қувонтиришганди. Жумладан, дзюдочиларимиз 2013 йилги турнирда 5 олтин, 3 кумуш ва 5 бронза медаль жамғариб, умумжамоа ҳисобида биринчи ўринни эгаллаган. 2014 йилги баҳсларда 1 олтин, 2 кумуш ва 3 бронза, 2015 йилги мусобақада эса биттадан олтин ва кумуш, тўртта бронза медали билан тақдирланганди.

Бу галги беллашувларда ташкилотчилар мезбон сифатида Ўзбекистон терма жамоасининг ҳар бир вазн тоифасида тўрт нафардан спортчи билан қатнашишига имконият яратди. Шу боис, нуфузли мусобақада тажрибали ҳамда номдор дзюдочиларимиз билан бир қаторда кўплаб умидли ва истеъдодли ёшлар юртимиз шарафини ҳимоя қилишяпти.

Дастлабки кунги беллашувларда ҳамюртларимиз умумжамоа ҳисобида бир йўла еттита медалга сазовор бўлишди. Эркаклар ўрта­сида биринчи бўлиб курашга киришган Муҳриддин ­Тиловов (60 кг) чинакамига маҳорат кўрсатиб, юртимизда яна бир истеъдодли полвон вояга етаётганлигини намойиш этди. У барча рақибларини мағлубиятга учратиб, финалда Матьяз Трбовичга қарши татамига чиқди. Ҳал қилувчи беллашувда словениялик спортчидан устун келган ­Муҳриддин олтин медални қўлга киритди.

Шу вазн тоифасида бронза медали учун кечган учрашувда яна бир полвонимиз Шарофиддин Лутфуллаев ­Бауржан Жантаев (Қозоғистон)ни енгди.

Ёшлар ўртасида жаҳон чемпиони Диёра Келдиёрова (52 кг)нинг чиқишлари ҳам мутахассису мухлисларда илиқ таассурот қолдирди. Гарчи у финалда қозоғистонлик тажрибали Айгуним ­Туйитековага юко баҳоси билан имкониятни бой берган бўл­сада, Тошкент турнири ёш ва умидли дзюдочимиз учун катта тажриба мактаби вазифасини ўтади.

— Турнирда кумуш медалга сазовор бўлдим, — дейди Диёра. — Бу мен учун катталар ўртасидаги илк халқ­аро турнир саналади. Мусобақада эришган натижам шуни кўрсатдики, ҳали ўз устимда жуда кўп ишлашим, изланишим керак экан. Чунки келажакда катталар ўртасида ҳам Осиё ва жаҳон чемпиони бўлмоқчиман. Ёзги Олимпия ўйинларида юртимиз шарафини ҳимоя қилишни ўз олдимга бош мақсад қилиб қўйганман.

Шунингдек, турнирнинг дастлабки кунида ҳамюртларимиздан Нодира Гулова (48 кг), Муқаддас Кубеева (48 кг), Гулойим Жумабоева (52 кг) бронза медалларни қўлга киритди. 

Кеча ўтказилган иккинчи кун баҳсларида эркаклар (73 кг, 81 кг) ва аёллар (63 кг, 70 кг) ўртасида иккитадан вазн тоифасида кучлилар номи аниқланди.

 

Эркин ХОЛБОБО,

«Ўзбекистон овози» мухбири.



DB query error.
Please try later.