Охирги сонда



Кўп ўқилган мақолалар



Долзарб мавзу



Мақолалар архиви

«    Mart 2019   
Du Se Cho Pa Ju Sha Ya
25 26 27 28 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31
06.10.2016

МИЛЛИЙ САЙЛОВ ТИЗИМИ

демократик тамойилларга тўлиқ мос келади

Президент сайловини ёритиш бўйича Республика матбуот марказида Марказий сайлов комиссияси томонидан «Ўзбекистон Республикаси Президенти сайловининг аҳа­мияти» мавзуида давра суҳбати ўтказилди.

Унда Марказий сайлов комиссияси аъзолари, Ўзбекистон Республикаси Президенти ҳузуридаги Давлат бошқаруви академияси тингловчилари, ҳуқуқшунос-олимлар, сайлов ҳуқуқи бўйича экспертлар ҳамда оммавий ахборот воситалари вакиллари иштирок этди.

Марказий сайлов комиссияси раиси Мирзо-Улуғбек Абдусаломов мамлакатимизда мустақиллик йилларида юксак демократик талабларга мос миллий сайлов тизими яратилганини таъкидлади. Фуқароларнинг давлат ва жамият ишларини бошқаришда фаол иштирок этиш ҳуқуқи тўлиқ таъминланаётгани, Конституциямиз ва тегишли қонунларда бу борада меъёрлар мустаҳкамланганини қайд этди.

— Мамлакатимизда демократик сайловларни ташкил этишнинг муҳим жиҳати шундаки, унда фақатгина овоз бериш яширин амалга оширилади, қолган барча жараён очиқ, ошкора руҳда ўтади, — деди Мирзо-Улуғбек Абдусаломов. — «Ўзбекистон Республикаси Президенти сайлови тўғрисида»ги қонунга мувофиқ, сайлов комиссия­лари фуқароларга сайловга тайёргарлик кўриш ва уни ўтказиш бўйича ўз фаолияти, сайлов комиссиялари тузилгани, улар жойлашган манзил ва иш вақти ҳақида маълум қилади, сайловчилар рўйхати, сайловда иштирок этаётган сиё­сий партиялар рўйхати билан таништиради. Шунинг­дек, Ўзбекистон Республикаси Президентлигига номзодлар хусусидаги маълумотлар билан таништириб, овоз бериш ва сайлов якунларидан хабардор қилади.

Қонунчиликка киритилган ўзгартиш ва қўшимчаларга биноан, сайловолди ташвиқоти нафақат сайлов куни, балки овоз бериш бошланишидан бир кун олдин ҳам олиб борилмайди. Яъни, сайловчиларга ўз қарашларини, сиёсий хайрихоҳлигини аниқлаб олиш, ким учун ва қандай сиёсий дастур учун овоз бераётганини яна бир бор чуқур идрок этишга имкон яратилади.

Демократик жамиятда сайлов мамлакат ижтимоий-сиёсий, иқтисодий ҳаётига бевосита таъсир кўрсатади, унинг натижалари давлат сиёсатининг устувор йўналишларини белгилаб беради. Шу боис Президент сайловига тайёргарлик кўриш ва уни ўтказиш билан боғлиқ тадбирлар фаоллик билан ташкил этилмоқда. Фуқароларнинг сайлов жараёнлари ҳақидаги билимларини ошириш, қонунчиликдан тўлиқ хабардор қилишда мутахассислар иштирокидаги давра суҳбатлари, семинарлар муҳим ўрин тутади.

Таъкидландики, сайлов жараёнининг очиқ ва ошкоралигини таъминлашда оммавий ахборот воситаларининг аҳамияти катта. Ҳозирча мамлакатимиз ва хорижий оммавий ахборот воситаларининг 500 дан зиёд вакили Марказий сайлов комиссияси томонидан аккредитациядан ўтказилган. Сайлов комиссияларининг барча тадбирларида журналистлар фаол иштирок этмоқда. Мавзуга оид телекўрсатув ва радиоэшиттиришлар мунтазам эфирга узатилиб, сайлов билан боғлиқ жараёнлар босма ҳамда интернет нашрларда кенг ёритиляпти. Давра суҳбатида сўзга чиққанлар шулар ҳақида ҳам ўз фикр­ларини билдиришди.

 

Ўз мухбиримиз.



DB query error.
Please try later.