01.10.2016

ИЖТИМОИЙ ХИЗМАТЛАР СИФАТИ ОШАДИМИ?

Парламентдаги Ўзбекистон ХДП фракцияси шу масала билан боғлиқ қонун лойиҳасини муҳокама этди

Мамлакатимизда кексалар, жисмоний имконияти чекланганларга эътибор кўрсатиш, уларни қўллаб-қувватлаш муҳим масалага айланган. Бу айниқса, ижтимоий муҳофазани янада кучайтириш, ногиронларни моддий ва маънавий қўллаб-қувватлаш жараёнларида ўзининг ҳаётий ифодасини топмоқда. Жамиятда инсонийлик ва ҳамжиҳатлик муҳити мустаҳкамланишида бу борадаги ташаббуслар долзарб аҳамият касб этади.

Ўзбекистон ХДП фракциясининг навбатдаги йиғилишида «Кексалар, ногиронлар ва аҳолининг бошқа ижтимоий ҳожатманд қатламларига ижтимоий хизматлар тўғрисида»ги қонун лойиҳаси кўриб чиқилди.

Таъкидландики, қонун лойи­ҳаси кексалар, ногиронлар ва бошқа ижтимоий ёрдамга эҳтиёжманд қатламларга хизмат кўрсатиш соҳасидаги муносабатларни ягона тизимга солиш мақсадида ишлаб чиқилди. Бу эса кучли ижтимоий сиёсат тарафдори бўлган Ўзбекистон Халқ демократик партияси дастурий мақсадлари билан ҳамоҳангдир. Маълумки, пар­тия­миз Дастурида аҳолининг ижтимоий ҳимояга муҳтож қатламини қўллаб-қувватлаш, уларнинг турмуш шароитларини яхшилаш масалаларига алоҳида эътибор берилган.

— Аввало, республикамизда аҳолининг қўллаб-қувватлашга эҳтиёжманд қатламларига ижтимоий хизматлар кўрсатишнинг комплекс тизими яратилганини таъкидлашимиз лозим, дейди Олий Мажлис Қонунчилик палатаси депутати, Ўзбекистон ХДП фракцияси аъзоси ­Собитхон Турғунов. — Ҳозирги вақтда ушбу тизим «Васийлик ва ҳомийлик тўғрисида»ги, «Фуқароларнинг ўзини ўзи бош­қариш органлари тўғрисида»ги, «Ўзбекистон Республикасида ногиронларни ижтимоий ҳимоя қилиш тўғрисида»ги, «Ижтимоий шериклик тўғрисида»ги, «Аҳолини иш билан таъминлаш тўғрисида»ги, «Фуқаролар соғлиғини сақлаш тўғрисида»ги қонунлар ва ­бошқа меъёрий ҳужжатлар билан тартибга солинган. Лекин уларнинг умумий таҳлили ижтимоий хизматлар тўғрисида алоҳида қонун яратиш зарурлигини кўрсатмоқда.

Шунинг учун «Кексалар, ногиронлар ва аҳолининг бошқа ижтимоий ҳожатманд қатламларига ижтимоий хизматлар тўғрисида»ги қонун лойиҳасида ижтимоий ҳимояга эҳтиёжманд аҳоли тоифалари, уларни аниқлаш мезонлари ва бошқа бир қатор масалалар аниқ ифодаланяпти. Давлат бюджетидан ажратиладиган маблағларнинг мақсадли сарфланиши, бу жараёнда ижтимоий адолат тамойилларига қатъий амал қилиниши жуда долзарб масаладир. Умуман олганда, ҳужжат лойиҳасидаги меъёрлар мамлакатимизда амалга оширилаётган кучли ижтимоий сиёсат бардавомлиги ва унинг самарадорлигини таъминлашга хизмат қилади, деб ўйлаймиз. Шулардан келиб чиққан ҳолда фракциямиз вакиллари ушбу қонун лойиҳасини қўл­лаб-қувватлаш ҳақида якдил фикр билдиришди.

Ўзбекистон ХДП фракцияси аъзолари мазкур қонуннинг қабул қилиниши амалдаги ижтимоий хизматларни такомиллаштириш ва янгиларини шакллантиришга асос бўлишини таъкидлашди.

 

Гулруҳ ОДАШБОЕВА,

«Ўзбекистон овози» мухбири.



DB query error.
Please try later.