01.10.2016

СУРХОНДАРЁДА САЙЛОВ ТАДОРИГИ

Жорий йилнинг 4 декабрь куни бўлиб ўтадиган Ўзбекистон Республикаси Президенти сайловига Сурхондарё вилоятида ҳам пухта ҳозирлик кўрилмоқда.

Миллий қонунчилигимизга мувофиқ мамлакатимиз ижтимоий-сиёсий ҳаётида муҳим аҳа­мият­га эга бўлган ушбу муҳим жараённи очиқ, ошкора ва адолат тамойиллари асосида ўтказиш учун 9-Сурхондарё сайлов округи тузилиб, округ сайлов комиссияси ва унинг шахсий таркиби тасдиқланди. Округ сайлов комиссиясига бино ва хоналар ажратилиб, комиссиянинг самарали фаолият юритиши учун қулай шароит яратилди. Айни пайтда округ сайлов комиссияси Ўзбекистон Республикаси Марказий сайлов комиссиясининг 2016 йил 9 сентябрдаги «Ўзбекистон Республикаси Президенти сайлови бўйича сайлов кампанияси бошланишини эълон қилиш тўғрисида»ги қарорига мувофиқ белгиланган режа асосида фаолият юритмоқда.

— Коллегиаллик, ошкоралик руҳида ўтган дастлабки йиғилишда округ сайлов комиссияси аъзолари ўртасида вазифалар тақсимоти ишлаб чиқилиб, тасдиқланди, — дейди Ўзбекис­тон Республикаси Президенти сайловини ўтказувчи 9-Сурхондарё округ сайлов комиссияси аъзоси Фирдавс Шарипов. — Тадбирнинг барча босқичларини кенг ёритиш мақсадида ­матбуот маркази тузилиб, таркиби тасдиқланди. Округ сайлов комиссияси аъзоларига сайловни ташкил этиш ва ўтказиш бўйича амалий ёрдам бериш учун шаҳар, туманлар бириктирилди. Округ сайлов комиссияси аъзоларининг сайлов масалалари бўйича фуқароларни ­доимий қабул қилишини ташкил этиш мақсадида округ сайлов комиссиясида навбатчилик жадвали ишлаб чиқилди.

Ўзбекистон Республикасининг «Фуқароларнинг ўзини ўзи бошқариш органлари тўғрисида»ги қонунида маҳалла фуқаролар йиғинларининг ҳудудда ташкил этиладиган участка сайлов комиссияси аъзолигига муносиб номзодларни тавсия ­этиши белгиланган. Шунга кўра, улар масъулиятли бу вазифага обрў-эътиборли, эл ҳурматини қозонган, маҳаллада муқим яшаётган ва сайлов қонунчилигидан хабардор партиясиз фуқаролардан номзодларни танлаб олишга алоҳида эътибор қаратмоқда.

— Биринчи Президентимиз Ислом Каримов ташаббуси билан мамлакатимизда халқаро мезонларга мос миллий сайлов тизими яратилгани фуқароларнинг ўз хоҳиш-иродасини эркин билдириши ва ҳуқуқий демократик жамият қурилишида бевосита иштирок этишида муҳим омил бўлмоқда, — дейди «Маҳалла» хайрия жамоат фонди Сурхондарё вилояти бўлими раиси Ўрол Тошбоев. — Вилоятда 833 маҳалла фуқаролар йиғини ­мавжуд. Шу кунларда барча маҳаллалар фаоллари Ўзбекистон Республикаси Президенти сайловини миллий қонунчилигимизга мувофиқ ташкил этиш ва ўтказиш борасида ўзларига белгиланган вазифаларни сидқидилдан амалга ошириб, участка сайлов комиссияси аъзолигига номзодлар тавсия этиш, сайловда иштирок этадиган фуқаролар ва илк марта овоз берадиган ёшларни аниқлаш каби ишлар билан банд. Барча тадбирлар ҳудудда истиқомат қилаётган фуқароларда сайлов ва эртанги кунимизга дахлдорлик туйғусини янада мустаҳкамлашга хизмат қилиши билан аҳамиятлидир.

 

Х.МАМАТРАЙИМОВ,

ЎзА мухбири.



DB query error.
Please try later.