29.09.2016

ПАРТИЯ ТАШКИЛОТЛАРИ ВА ДЕПУТАТЛАР

электорат манфаатлари ҳимоясида фаол иштирок этмоқда

Ҳар бир сиёсий партиянинг жамиятда муносиб ўрин топишида ҳудудий ташкилотлар фаолияти муҳим ўрин тутади. Чунки партияни бевосита жамият билан боғлайдиган, хайрихоҳлари ва тарафдорларини кўпайтирадиган, умуман, ғояларини ҳаётга татбиқ этадиган бўғин айнан маҳаллий партия ташкилотларидир. Ўзбекистон Халқ демократик партиясининг Сурхондарё вилоят кенгаши фаолиятига эътибор қаратар эканмиз, бу ердаги партия ташкилотлари ва депутатлар ишида ана шу мезонлар асосий ўринда турганига гувоҳ бўламиз.

— Айни пайтда вилоятда 35 минг нафарга яқин партия аъзосини бирлаштирган 797 бошланғич партия ташкилоти фаолият кўрсатмоқда, – дейди ЎзХДП Сурхондарё вилоят кенгаши раиси, халқ депутатлари вилоят Кенгашидаги партия гуруҳи раҳбари Чори Жумақулов. — Халқ депутатлари вилоят Кенгашига партиямиздан сайланган 18, шаҳар ва туман Кенгашларида эса 128 нафар депутат иш олиб бормоқда.

Партия гуруҳлари фаолиятини янада кучайтириш, муаммоларни ўрганиш ва сессияларга киритиш борасида муҳим вазифалар белгилаб олинган. Жорий йилнинг ўтган даврида маҳаллий Кенгашлар сессияларида ички йўлларни таъмирлаш, кўпқаватли уйларда истиқомат қилувчи аҳолини ичимлик суви билан таъминлаш, кексалар ҳамда ногиронларни ижтимоий муҳофаза қилиш каби долзарб масалалар муҳокама этилди. Бундан ташқари, соғ­лиқни сақлаш, коммунал хизматлардаги камчиликлар, қишлоққа саноатни олиб кириш каби қатор масалалар ўрганилмоқда. Уларнинг ижобий ҳал этилиши электорат манфаатлари ҳимоясига хизмат қилади.

Ўзбекистон Халқ демократик партиясининг 2015-2019 йилларга мўлжалланган амалий Ҳаракат дастурида соғлом ва баркамол авлодни вояга етказиш устувор вазифалардан бири этиб белгиланган. Шундан келиб чиққан ҳолда, ташаббускор ва фидойи йигит-қизларни сафимизга жалб қилиш мақсадида «Истиқбол» билан юксак марралар сари», «Бугунги талаба — эртанги мутахассис», «Кексалар — ёшлар эъзози ва эътиборида» ва бошқа мавзуларда давра суҳбатлари ўтказил­япти. Уларнинг самараси ўлароқ, ўтган йили вилоятда минг нафардан ортиқ йигит-қиз партиямиз сафига қўшилган бўлса, жорий йилнинг ўтган етти ойида бу кўрсаткич 600 дан ошди.

– Минтақавий ташкилотлар қошида 15 Жамоатчилик қа­булхонаси фаолият кўрсатмоқда, — дейди ЎзХДП Сурхондарё вилоят кенгаши бўлим мудири, халқ депутатлари Термиз шаҳар Кенгаши депутати Фаррух Абжалов. — Мурожаат этувчилар сони йилдан-йилга кўпаймоқда. Қабулхоналарга жорий йилнинг олти ойида 400 дан ортиқ мурожаат тушган. Ҳар бир масала жиддий ўрганилиб, уларнинг ҳозиргача 55 фоиздан ортиғи ижобий ҳал қилинди. Бу борада Термиз шаҳри, Денов, Шўрчи, Жар­қўрғон ва Сариосиё туман партия кенгашлари фаоллик кўрсатмоқда. Мурожаатларни ҳал этишда «Маҳалла» хайрия жамоат фонди, «Нуроний» жам­ғармаси, «Камолот» ёшлар ижтимоий ҳаракати ва бошқа ташкилотлар билан ҳамкорлик муҳим омил бўлмоқда.

Шу билан бирга, кўчма Жамоатчилик қабулхоналари имкониятидан самарали фойдаланишга ҳаракат қиляпмиз. Олий Мажлис Қонунчилик палатаси депутатлари, туман ҳокимлиги вакиллари ва мутасадди ташкилотлар раҳбарлари иштирокида ҳудудларда электорат вакиллари билан 50 дан ортиқ учрашув ташкил қилинди.

— Депутат халқ билан ҳамнафас бўлса, обрў-эътибор қозонади, – дейди «Маҳалла» хайрия жамоат фонди Сурхондарё вилоят бўлими бошқаруви раиси ўринбосари, халқ депутатлари вилоят Кенгашидаги ЎзХДП гуруҳи аъзоси Орзиқул Соатов. — Унинг ташаббуслари, амалга оширган ишлари эл манфаатига хизмат қилса, юртимиз янада тараққий этиб, гуллаб-яшнайди. Ўтган йили депутатларимиз томонидан давлат ҳокимияти ва бошқаруви органларига 200 дан ортиқ сўров юборилган бўлса, жорий йилнинг шу даврида бу кўрсаткич 110 тани ташкил этмоқда. Демак, депутатлар ўз ваколат ва имкониятларидан самарали фойдаланишга ҳаракат қилишаяпти.

— Туманимизда партиямизнинг 3 минг 650 нафар аъзоси бор, – дейди ЎзХДП Денов туман кенгаши раиси Ҳасан Мирзаев. — Уларнинг 60 фоизга яқинини ёшлар ташкил этади. Мустақиллик байрами арафасида «Денов-Диёрбек-транс» масъулияти чекланган жамиятига қарашли «Евромед» соғ­ломлаштириш мажмуаси фойдаланишга топширилганди. Яқинда жамоанинг 20 нафар ходими партиямиз сафига қўшилди. Биз бундан кейин ҳам аъзоларимиз сонини кўпайтиришга, аҳоли, электорат вакиллари ўртасида тарғибот ишларини кучайтиришга ҳаракат қиламиз.

 

Абдумалик ҲАЙДАРОВ,

«Ўзбекистон овози» мухбири.



DB query error.
Please try later.