27.09.2016

СОҒЛОМ ТУРМУШ ТАРҒИБОТИ

Ички Ишлар Вазирлиги Транспортдаги ички ишлар бошқармаси ҳамда Транспорт прокуратураси ходимлари томонидан Тошкент темир йўл транспорти касб-ҳунар коллежида «Гиёҳвандлик – аср вабоси» мавзуида давра суҳбати ўтказилди. Унда ҳуқуқни муҳофаза қилувчи органлар томонидан гиёҳвандлик воситалари ва психатроп моддаларга қарши курашиш борасида олиб борилаётган ишлар, қонунчилигимизда белгиланган жавобгарлик масалалари тўғрисида ўқувчиларга атрофлича тушунча берилди.

– Гиёҳвандлик бутун ­дунёни ташвишга солаётган жиддий муаммодир, – дейди Тошкент темир йўл бекатидаги тармоқ ИИБ ҳуқуқ­бузарликларнинг олдини олиш бўлими бошлиғи, майор Фаррух Амриев. – Бугунги тадбирни ёшлар ўртасида ўтказаётганимиз бежиз эмас, чунки балоғат ёшидаги ўспиринларни гиёҳвандликка етакловчилар бор. Шунинг учун ёшларни бу мудҳиш иллатдан асраш чораларини кўришимиз керак. Бунда уларнинг ҳу­қуқий билимини ошириш, соғлом турмуш тарзи тарғиботига қаратилган тадбирлар катта аҳамиятга эга. Ёшлар ўртасида ҳуқуқ­бузарлик­ларнинг олдини олишга қаратилган бундай учрашувларни тез-тез ўтказиб туришимиз зарур. Шундагина уларни ёвузлик чангалига тушиб қолишдан асраган бўламиз. Ҳаётимизга, келажагимизга рахна солувчи даҳшатли офатга қарши курашиш барчамизнинг бурчимиздир.

Давра суҳбатида коллеж ўқувчиларига гиёҳвандликнинг аянчли оқибатлари ҳақида ҳикоя қилувчи фильм намойиш этилди.

 

Равшан ШОДИЕВ,

«Ўзбекистон овози» мухбири. 



DB query error.
Please try later.