27.09.2016

СУД ЭКСПЕРТИЗАСИ РИВОЖИГА БАҒИШЛАНДИ

Адлия вазирлигида «Ўзбекистонда суд криминалистик экспертизасининг ривожланиш истиқболлари» мавзусида матбуот­ анжумани ўтказилди. Унда оммавий ахборот воситалари вакилларига Ҳадича Сулаймонова номидаги Республика суд экспертизаси маркази фаолияти йўналишлари, янги лойиҳалари хусусида маълумотлар тақдим этилди.

Матбуот анжуманида таъкидланганидек, ҳуқуқни муҳофаза қилиш органлари фаолиятида фан ва техниканинг сўнгги ютуқларидан, миллий ҳамда хорижий илғор тажрибалардан фойдаланиш одил судлов жараёнининг муҳим шарти ҳисобланади. Бу фуқароларнинг қонуний ҳуқуқ ҳамда манфаатлари ҳимоя қилинишида долзарб аҳамият касб этади.

Республика суд экспертизаси маркази узоқ йиллардан бери ҳуқуқни муҳофаза қилувчи органларга фуқаролик, хўжалик, маъмурий ва жиноий ишларни юритишда замонавий илм-фан имкониятларидан фойдаланган ҳолда назарий ҳамда амалий ёрдам кўрсатиб келмоқда.

Ушбу даргоҳда экспертлик тадқиқотларининг жаҳон андозаларига мос келадиган замонавий илмий даражада ўтказилиши учун қулай шароит яратилган. Бу борадаги қонунчилик асослари ҳам такомиллашиб бормоқда. Жумладан, Ўзбекистон Республикасининг «Суд экспертизаси тўғрисида»ги Қонуни экс­пертлик фаолиятининг ҳуқуқий пойдеворини яратди. Унинг асосида қабул қилинган меъёрий-ҳуқуқий ҳужжатлар соҳанинг турли йўналишларини ривожлантиришга хизмат қиляпти. Вазирлар Маҳкамасининг Ўзбекистон Республикаси Адлия вазирлиги ҳузуридаги Ҳ.Сулаймонова номидаги Республика суд экспертиза маркази фаолиятини янада такомиллаштириш тўғрисидаги Қарори шулар жумласидандир.

Матбуот анжуманида кейинги йилларда амалга оширилган лойиҳалар, йўлга қўйилган экспертиза йўналишлари бўйича ҳам маълумот берилди. Хусусан, рақамли технологиялар, электроакустик монтаж белгилари асосида аудио ва видео манбаларни комплекс тадқиқ қилиш, ер участкаларига бўлган эгалик ҳуқуқлари қийматини баҳолаш, ташқи савдо фаолиятининг суд-иқтисодий экспертизаси, суд-экологик, суд-сиёсатшунослик-лингвистик, суд-филологик каби экспертизалар амалиётга жорий этилди.

Марказ лабораториясида ўзбек, рус, зарур ҳолларда эса бошқа тиллардаги фонограмма ва видеоёзувлар ҳам тадқиқ қилиниши йўлга қўйилган. Ушбу услуб асосида бугунгача 150 дан ортиқ экспертиза ўтказилган.

Олиб борилган илмий тадқиқотлар натижасида суд-сиёсатшунослик-лингвистик экспертизани ўтказиш услуби ишлаб чиқилиб, амалиётга татбиқ этилди. Мазкур йўналишда асосан терроризм, экстремизм ва диний адоватни қўзғатиш, мамлакатимизнинг конституциявий тузумига тажовуз қилиш, жамоат хавфсизлигига таҳдид солишга қаратилган материалларни тарқатиш бўйича факт­лар ўрганилади ва хулосалар берилади.

Бундай янги экспертиза турларининг амалиётда кенг қўлланилаётганлиги тергов органларига жиноятларни очиш, далиллар тўплаш ва уларни илмий асосда мустаҳкамлаш, судлар фаолиятида эса одил судловни амалга ошириш, адолатли қарор ва ҳукмлар чиқаришда муҳим восита бўлиб хизмат қилмоқда.

Шунингдек, анжуманда марказ мутахассислари журналистларга суд экспертизаси бўйича эришилган ютуқлар, яратилган имкониятлар ва келгуси ривожланиш истиқболлари ҳақида атрофлича маълумот беришди.

 

Равшан ШОДИЕВ,

«Ўзбекистон овози» мухбири.



DB query error.
Please try later.