27.09.2016

ЎҚИМОҚЧИМИСИЗ, МАРҲАМАТ!

Пойтахтимиздаги Ёшлар ижод саройида XV «Таълим ва мутахассислик» халқаро кўргазмаси бўлиб ўтди. Мазкур кўргазма «Камолот» ёшлар ижтимоий ҳаракати, Олий ва ўрта махсус таълим, Меҳнат вазирликлари, Ўрта махсус, касб-ҳунар таълими маркази, Савдо-саноат палатаси ҳамда бошқа қатор ташкилотлар ҳамкорлигида ташкил этилди.

Кўргазма унда иштирок этган талаба-ёшлар учун ҳақиқий имкониятлар майдони бўлиб хизмат қилди. Қатнашчилар мам­лакатимиздаги ҳамда хориждаги олий таълим муассасалари ҳақида батафсил маълумот олишди.

— Келажакда шифокор бўл­моқчиман. Кўргазмага тиббиёт йўналишидаги олий таълим муассасалари ҳақида маълумот олиш учун келдим, — дейди Тошкент темир йўллари ­академик лицейи ўқувчиси ­Нусрат Валиев. — Бу ерга келишдан аввал хорижда ўқишга қизиқардим. Лекин ­юртимиз ва хорижий олий ­таълим муассасалари ҳақида етарли маълумот олганимдан сўнг ўзимиздаги ўқитиш тизими хориждагидан мутлақо қолишмаслигига амин бўлдим.

Шунингдек, тадбирда ота-оналар ва ўқитувчилар касбга йўналтириш ва бандликка кўмаклашувчи марказлар ­фаолияти, малака ошириш инс­титутлари, ўқув марказлари, масофавий таълим ҳақида ҳам маълумот олишди.

— Коллеж-лицей ёшидаги жуда кўп ўқувчиларга институтимиз ҳақида барча маълумотларни бердик, — дейди Ўзбекистон давлат санъат ва маданият институти ўқитувчиси Илҳом Масалимов. — Ўз нав­батида улар ҳам саволларга жавоб олишди.

Тадбирда Буюк Британия, Латвия, Польша, Малайзия, Япония сингари давлатлардан иштирок этган мутахассислар ўзбекистонлик ёшларнинг ўқишга, илм олишга бўлган интилишини ижобий баҳолашди.

— Ҳозир университетимизда 20 нафар ўзбек талабаси таълим олмоқда, — дейди Малайзиянинг Vision college университети вакили Ли Ви Лонг. — Кўргазмада тиббиёт, туризм, бизнес, маркетинг каби йўналишлар бўйича ёшларга керакли маълумотларни бердик. ­Юртингиздан борган талабалар билан бирга ишлаганман, улар доимо етакчи бўлишга ҳаракат қи­лади. Кўргазма якунлангач, ­Самарқанд, Бухоро сингари тарихий шаҳарларни кўрмоқчиман.

Тадбирда касб-ҳунар коллежлари битирувчиларига Тошкент шаҳридаги банд­ликка кўмаклашувчи марказлар ҳам­да давлат ва нодавлат ташкилотларининг мавжуд бўш иш ўринлари ҳақида маълумотлар тақдим этилди.

 

Шаҳбоз САИДОВ



DB query error.
Please try later.