22.09.2016

МУРОЖААТЛАРНИ ҲАЛ ЭТИШДА

депутатлар ва партия ташкилотлари ҳамкорлиги муҳим аҳамиятга эга

Сиёсий партия ўз электорати манфаатини самарали ҳимоя этиши учун, аввало, уларни ўйлантираётган масалаларни чуқур билиши талаб этилади. Ўзбекистон Халқ демократик партияси тизимида фаолият юритаётган Жамоатчилик қабулхоналари бу борада тажрибадан ўтган механизм ҳисобланади. Жойлардаги муаммолар ўрганилиб, партиямиз гуруҳлари, ҳамкор ташкилотлар ва давлат идоралари орқали ҳал этилаётгани қабулхоналарга ишонч­ни оширяпти.

Маълумотларга кўра, жорий йилнинг август ойида ҳудудий партия кенгашлари қошидаги Жамоатчилик қабулхоналарига 850 га яқин мурожаат бўлган. Уларнинг асосий қисми бандлик масаласи билан боғлиқ.

— Айтиш мумкинки, Жамоатчилик қабулхоналари фаолияти электорат билан ишлашнинг самарали воситаларидан бирига айланди, — дейди ЎзХДП Марказий Кенгаши сектор мудири Дурбек Худойқулов. — Бу ор­қали нафақат жойларда юзага келаётган муаммолар бартараф этилаяпти, балки сайловчилар, умуман, кенг жамоатчилик билан мустаҳкам алоқа ўрнатилмоқда.

Ўтган ойда қабулхоналарга тушган мурожаатларнинг 73 фоиздан ортиғи ижобий ечим топди. Бунда партия фаоллари, депутатлар ташаббус кўрсатди. Айрим масалалар бўйича депутатлик назорати ўрнатилди, ташкилотларга депутатлик сўрови юборилди.

Қабулхоналарга моддий ёрдам, коммунал хизмат сифатини яхшилаш, соғлиқни сақлаш ҳамда бошқа ижтимоий масалаларда ҳам кўплаб мурожаатлар бўлган. Уларнинг барчаси ўз йўналишига қараб, масъулларга юклатилгани, ижросининг устидан назорат ўрнатилгани натижасида муаммолар қонуний ечим топяпти.

Тан олиш керакки, Жамоатчилик қабулхоналари ишида камчиликлар ҳам учраб турибди. Айрим шаҳар ва туман кенгашларида қабулхона фаолияти талаб даражасида олиб борилмаяпти. Кўчма қабулхоналарни ташкил этишда эътиборсизликка йўл қўйилмоқда.

Бундан ташқари, баъзи қабулхоналарга келиб тушаётган мурожаатларни ҳал этишга жиддий ёндашилмаяпти. Хусусан, Хон­обод, Марғилон шаҳарлари, Олтиариқ туман партия кенгашлари қошидаги қабулхоналар бу масалага алоҳида эътибор қаратиши лозим.

— Мурожаатларни атрофлича ўрганиш, уларга ечим топишда депутатлар фаоллиги муҳим ўрин тутади, — дейди халқ депутатлари Фарғона вилоят Кенгашидаги ЎзХДП гуруҳи аъзоси Дилбархон Мамажонова. — Одамларнинг партиямизга бўлган ишончи ортиб бормоқда. 2015 йилнинг август ойида 10 га яқин мурожаат тушган бўлса, жорий йилнинг шу даврида бу кўрсаткич 160 дан ошди. Коммунал хизмат сифатини яхшилаш борасида, айниқса, кўп мурожаат бўлмоқда.

Мисол учун, Ҳожирахон Жуманованинг тоза ичимлик суви таъминоти тўғрисидаги мурожаати ўрганилган. Депутатлар ташаббуси билан мазкур масалани ҳал этиш чоралари кўрилган. Муҳаббат Назарова эса газ таъминоти масаласида мурожаат қилган. Туман Кенгаши депутатлари уни ижобий ҳал этишга кўмаклашган.

Мурожаатларни ўз вақтида кўриб чиқишда депутатлар ва партия ташкилотлари ўртасидаги ҳамкорликни мустаҳкамлаш зарур.

Бунга кўплаб мисолларни келтириш мумкин. Асосийси, мурожаатларнинг сонида эмас, балки одамларнинг оғири енгил бўлаётгани, партия ташкилотлари, депутатларга ишонч билдирувчилар сафи кенгайиб бораётганида, деб ўйлаймиз.

 

Зилола УБАЙДУЛЛАЕВА,

«Ўзбекистон овози» мухбири.



DB query error.
Please try later.