15.09.2016

МАТОНАТ ВА МАҲОРАТ

туфайли спортчиларимиз кетма-кет шоҳсупага кўтарилишмоқда

Шу кунларда Рио-де-Жанейро (Бразилия)да XV ёзги Паралимпия ўйинлари қизғин давом этмоқда. Дунёнинг 176 давлати вакиллари иштирок этаётган мазкур нуфузли мусобақада ҳамюрт­ларимиз ҳам ўз маҳорати ва матонатларини намойиш қилишяпти.

Дастлабки кунги баҳсларда Ўзбекистон спортчиларининг уч олтин, икки кумуш ва уч бронза медалини қўлга киритганини хабар қилгандик.

Паралимпия ўйинларининг навбатдаги кунги беллашувлари вакилларимиз учун янада муваффақиятли кечди. Жумладан, дзюдо бўйича Феруз Саидов бронза медалини қўлга киритди.

Аёллар ўртасида юртимиз шарафини ҳимоя қилган Турсунпошша Нурметова (63 кг) бронза медали учун бўлган беллашувда швециялик Николина Пернхаймни мағлу­биятга учратиб, шоҳсупанинг учинчи поғонасига кўтарилди.

Оғир вазндаги полвонлар ўртасида ўтган беллашувларда яна бир ҳамюртимиз Одил Тулендибоев (+100 кг) озарбайжонлик Илҳом Закиевни, япониялик Кенто Масакани, финалда эса бразилиялик Силва Дэ Араухони енгиб, олтин медалга сазовор бўлди.

Шунингдек, ўз вазн тоифасида эркаклар ўртасида Шуҳрат Бобоев ва Ширин Шарипов бронза, аёллар беллашувида Ҳайитжон Олимова кумуш, Гулруҳ Раҳимова бронза медаль билан тақдирландилар. 

Ўзбекистон дзюдочилари 3 олтин, 1 кумуш, 6 бронза, жами 10 медалъ билан умумжамоа ҳисобида биринчи ўринни эгаллади. Иккинчи ва учинчи поғоналар Хитой ва Мексика вакилларига насиб этди.

Эркаклар ўртасида 100 метр масофага брасс усулда сузиш бўйича Фирдавс Мусабеков 1 дақиқа 04.94 сония натижа кўрсатиб, олтин медални қўлга киритди.

Аёллар ўртасида 100 метр масофага брасс усулида сузиш бўйича ҳамюртимиз Фотимахон Омилова 1 дақиқаю 12.45 сония натижа кўрсатиб, жаҳон рекордини янгилади ва шоҳсупанинг энг юқори поғонасидан жой олди. 

200 метр масофага комплекс сузиш баҳсларида Фотимахон Омилова 2 дақиқа 25 сония натижа кўрсатиб кумуш, Шоҳсанам Тошпўлатова 2 дақиқа 27 сония натижа билан бронза медалига сазовор бўлди.

Мусобақанинг ўн метрдан тўппончада ўқ отиш баҳсларида Сервер Ибрагимов 172.1 очко тўплаб, терма жамоамизга яна бир бронза медалини тақдим этди. 

Енгил атлетиканинг узунликка сакраш баҳсларида муносиб иштирок этган Дониёр Солиев эса шоҳсупанинг учинчи поғонасидан ўрин олди.

Ёзги Паралимпия ўйинларининг бешинчи кунида ҳамюртларимиз ўз ҳисобидаги медаллар сонини яна иккитага бойитишди. Жумладан, оғир атлетика бўйича майдонга тушган Аҳрор Бозоров (80 кг) 207 килограмм натижа кўрсатиб, бронза медалини қўлга киритди. 

400 метр масофага эркин усулда сузиш баҳсларида Дмитрий Хорлин 4:06.63 натижа билан навбатдаги бронза медалига сазовор бўлди. 

Енгил атлетика бўйича 4х100 метрга эстафета баҳсларида Миран Сахатов, Мансур Абдурашидов, Дониёр Солиев ва Фахриддин Ҳамроевдан иборат «квартет» Ватанимиз шарафини муносиб ҳимоя қилди. Ҳамюртларимиз 43,47 сония натижа қайд этиб, шоҳсупанинг фахрли учинчи поғонасидан жой олди. 

Кеча эса енгил атлетикачимиз Александр Свечников босқон улоқтириш бўйича барча рақибларини ортда қолдириб, олтин медаль билан тақдирланди. Мусобақанинг ядро улоқтириш баҳсларида муносиб қатнашган София Бурҳонова шоҳсупанинг фахрли иккинчи поғонасига кўтарилди.

Ўзбекистон паралимпиячилари ҳисобида еттита олтин, бешта кумуш ва ўн тўртта бронза медали бор. Айни пайтда ҳамюртларимиз жами йигирма олти медаль жамғарган ҳолда 176 давлат вакиллари орасида умумжамоа ҳисобида 10-поғонани эгаллаб турибди.

 

Эркин ХОЛБОБО,

«Ўзбекистон овози» мухбири.



DB query error.
Please try later.