15.09.2016

ТУМАН КЕНГАШИ СЕССИЯСИДА

партиямиз гуруҳи таклифлари қўллаб-қувватланди

Ўзбекистон ХДП Сайловолди дастурида аҳолига тиббий хизмат кўрсатиш сифатини ошириш бўйича муҳим вазифалар белгиланган. Шундан келиб чиқиб, маҳаллий Кенгашлардаги партиямиз гуруҳлари бу борадаги қонунлар, давлат дастурлари ижроси устидан депутатлик назоратини олиб бормоқда.

Хусусан, яқинда халқ депутатлари Амударё туман Кенгашидаги Ўзбекистон ХДП гуруҳи ҳудуддаги поликлиникаларни замонавий тиббиёт ва диагностика асбоб-ускуналари билан жиҳозлаш, уларда тиббий хизмат кўрсатиш сифатини ошириш ишларини ўрганди. Ютуқ ва камчиликларни таққослаб, таҳлил қил­ди. Айтиш керакки, масалани атрофлича ўрганиш мақсадида йил бошида белгиланган чора-тадбирлар асосида мониторинг олиб борилди. Унинг натижалари сессия­га киритилди.

Маълум бўлишича, туман кўп тармоқли марказий поликлиникаси 2013 йил реконструкция қилинган. Мазкур поликлиника Амударё тумани, шунингдек, Манғит шаҳридаги бир қанча маҳалла фуқаролар йиғинларида яшовчи аҳолига хизмат кўрсатади.

Бу ерда ҳозирги кунда 96 шифокор, 138 нафар ўрта тиббиёт ходими фаолият олиб бормоқда. Жаҳон банки кредити ҳисобидан «Саломатлик-3» ло­йиҳаси асосида туман марказий шифохонаси ва кўп тармоқли поликлиникаси замонавий тиббий асбоб-ускуналари билан таъминланди. Бу эса тиббий хизмат сифатини яхшилашда муҳим аҳамиятга эга бўляпти.

— Ҳозирги кунда барча ҳудудларда Соғлиқни сақлаш вазирлиги томонидан «Патронаж ойлиги» ташкил этиляпти. Ушбу тадбир давомида шифокор ва ҳамширалар оилаларга чиқиб, аҳолининг саломатлиги, турмуш тарзини ўрганяпти, — дейди туман Кенгашидаги Ўзбекистон ХДП гуруҳи раҳбари Мақсуд Саъдуллаев. — Лекин аҳолининг тиббий маданият­ини ошириш масалаларига эътиборни янада кучайтириш ҳаёт талаби бўлиб қоляпти. Хусусан, аёллар ва болалар саломатлигини муҳофаза қилиш, ижти­моий ҳимояга эҳтиёжманд аҳолига кўрсатилаётган тиббий-санитария, реаби­литация тадбирларининг сифат ва самарадорлигини ошириш, соғлом турмуш тарзини кенг тар­ғиб қилиш зарур.

— Оналарнинг саломат бўлиши, соғлом боланинг дунёга келиши, комил инсон бўлиб улғайиши кўпгина омилларга боғлиқ. Бунинг учун, аввало, оилада соғ­лом турмуш тарзи қарор топиши керак, — дейди туман Кенгашидаги Ўзбекис­тон ХДП гуруҳи аъзоси Баҳром Мадаминов. Назорат-таҳлил давомида ташвиқот тадбирлари кам ўтказилган ҳудудларда бу борада айрим муаммолар кўзга ташланди. Масалан, эрта турмуш қуриш ҳамда никоҳдан олдин тиббий кўрикдан ўтиш масалаларида эътиборсизликка йўл қўйиляпти. Бундай ҳолатлар кейинчалик жиддий муаммоларни келтириб чиқариши, она ва бола саломатлиги, қўйингки, инсон тақдири хавф остида қолиши мумкин.

— Туманда тез тиббий ёрдам хизматини замонавий асбоб-ускуналар билан таъминлаш, кўрсатилаётган хизматлар тезкорлиги ва сифатини ошириш мақсадида муайян ишлар бажарилган, — дейди туман Кенгашидаги ЎзХДП гуруҳи аъзоси Нилуфар Давлетова. — Тез ёрдам кўрсатувчи техника воситалари доимо чақирувга тайёр, тиббиёт ходимлари зарур дори-дармон ва бош­қа воситалар билан таъминланган. Натижада тумандаги чекка маҳаллаларда истиқомат қилаётган аҳолига ҳам зарур пайтда биринчи тиббий ёрдам кўрсатиляпти.

Бироқ назорат-таҳлил давомида айрим даволаш-профилактика муассасаларида моддий-техник базани мустаҳкамлаш, дори-дармон, бир марталик тиббий воситалар билан таъминлаш ишларини янада яхшилаш кераклиги маълум бўлди. Шунингдек, шифокорлар малакасини ошириб бориш, ёш кадрларга шароит яратиб бериш, битирувчиларнинг амалиётини самарали ташкил этиш йўналишларида ҳам ўйлаб кўриладиган масалалар бор.

Сессияда ЎзХДП гуруҳи аъзолари аҳоли, айниқса, аёллар, болалар, ногиронлар ҳамда ижтимоий ҳимоя­га муҳтож бўлган беморларга ўз вақтида тиббий ёрдам кўрсатиш муҳим масала эканини алоҳида қайд этишди. Соғ­лом авлод вояга етиши учун яратилган шароитларни янада яхшилаш, бу борада қонунлар ижросини сўзсиз таъминлаш бўйича фикр-мулоҳазалар билдириб ўтилди. Аҳолига малакали, тиббий ёрдам кўрсатиш билан боғлиқ инфратузилмани янада ривожлантириш бўйича тавсиялар берилди. Шунинг­дек, тез тиббий ёрдам кўрсатиш хизмати самарадорлиги ва кадрлар малакасини оширишга доир қатор таклифлар берилиб, тегишли қарор қабул қилинди.

Унга кўра, туман тиб­биёт бирлашмаси зиммасига «Соғ­лом она ва бола йили» Давлат дастуридан келиб чиқиб, профилактик тадбирлар самарадорлигини ошириш, оилаларда соғ­лом турмуш тарзини қарор топтириш бўйича тарғибот-ташвиқот тадбирларини изчил олиб бориш вазифаси юклатилди. Туман Кенгаши депутатлари ўз сайлов округларида аҳоли соғлиғини муҳофаза қилиш ишлари бўйича депутатлик ва жамоатчилик назоратини кучайтириши кераклиги белгиланди.

Шундай қилиб, Ўзбекис­тон ХДП гуруҳи таклифлари сессияда қўл­лаб-қувватланди. Бу электорат манфаатларини ҳи­моя қи­лишда, ижтимоий масалалар бўйича партия пози­ция­сини мустаҳкамлашда муҳим аҳамият касб этади, албатта.

 

Лазиза ШЕРОВА,

«Ўзбекистон овози» мухбири.



DB query error.
Please try later.