10.09.2016

ОИЛА, ОНАЛИК ВА БОЛАЛИК:

эришилаётган натижалар, истиқболдаги вазифалар муҳокама қилинди

Пойтахтимизда Ўзбекистон Хотин-қизлар қўмитаси, Соғлиқни сақлаш вазирлиги ва бошқа қатор ташкилотлар ҳамкорлигида мамлакатимизда оила, оналик ва болаликни муҳофаза қилиш борасида амалга оширилаётган ишлар, эришилаётган ютуқлар ва истиқболдаги вазифаларга бағишланган халқаро анжуман бўлиб ўтди.

Унинг иштирокчилари Ўзбекистон Республикасининг Биринчи Президенти Ислом Каримов хотирасини ёд этиб, ҳурмат бажо келтирдилар.

— Ташкилотчилар ва хорижлик меҳмонлар мамлакатимизнинг Биринчи Президенти Ислом Каримов томонидан 2014 йил 1 августда қабул қилинган «2014-2018 йилларда Ўзбекистонда аҳолининг репродуктив саломатлигини янада мустаҳкамлаш, оналар, болалар ва ўсмирлар соғлиғини муҳофаза қилиш борасидаги Давлат дастури тўғрисида»ги қарори ҳамда «Соғлом она ва бола йили» Давлат дастури асосида Учтепа туманидаги 23-оилавий поликлиникада яратилган шарт-ша­роит билан танишди, энг замонавий ­тиббиёт ­ускуналарини кўздан кечирди, — дейди Хотин-қизлар қўмитаси Оналик ва болаликни ижтимоий муҳофаза қилиш бўлими бош мутахассиси, тиббиёт фанлари номзоди ­Нилуфар Рўзиева. — Бу ерда ҳафтанинг ҳар бир куни ўзига хос номланган бўлиб, душанба улуғ ёшдаги отахон ва онахонлар кўрикдан ўтказилади, сешанба — ҳомиладорлар куни ва ҳоказо. Анжуман иштирокчилари бу тажрибага катта қизиқиш билдиришди. Шунингдек, улар хонадонларга ташриф буюришди, орасталик, саранжом-саришталикни кўриб мамнун бўлишди. Хонадон соҳиблари билан қайнона-келин муносабатлари бўйича савол-жавоб қилишди.

Анжуманда сўзга чиққан Ўзбекис­тон Республикаси Бош вазирининг ўринбосари, Республика Хотин-­қизлар қўмитаси раиси Элмира ­Боситхонова, Соғлиқни сақлаш вазири ўринбосари Лазиз Тўйчиев, БМТ аҳолишунослик жамғармасининг мамлакатимиздаги ваколатхонаси раҳбари Миеко Ябута ва бошқалар Ўзбекистонда Ислом Каримов раҳнамолигида ишлаб чиқилиб, амалга оширилаётган «Соғлом она — соғлом бола» миллий модели оналик ва болаликни ҳимоялашда юксак самаралар бераётганини алоҳида таъкидладилар.

Бугунги кунда Тошкент педиатрия тиббиёт институти клиникасида болаларга 17 йўналиш бўйича юқори технологияли тиббий ёрдам кўрсатилмоқда, шунингдек, бу ерда туғма юрак хасталиклари бўлган болалар кардиопластик жарроҳлик йўли билан даволанмоқда.

Рақамларга мурожаат қиладиган бўлсак, кейинги беш йилда ҳар 100 мингта чақалоққа нисбатан оналар ўлими 23,1 дан 19 тага, 5 ёшгача бўлган болалар ўлими 14,8 тадан 13,9 тага, чақалоқлар ўлими 11 тадан 10,7 тага камайди. Ушбу кўрсаткичлар бўйича Ўзбекистон БМТнинг Мингйиллик ривожланиш мақсадларига эришди.

— Ўзбекистонда оила мустаҳкамлиги, она ва бола саломатлигига эътибор қай даражада эканини ўз кўзимиз билан кўриб, гувоҳ бўлдик, — дейди ЮНИСЕФнинг соғлиқни сақлаш бўйича Ўзбекистондаги вакили Светлана Штефанет. —Мамлакатингизда бу борада қўлга киритилган ютуқлар эътирофга лойиқ ва ўйлайманки, келгусида бу эзгу саъй-ҳаракатлар изчил давом этади.

— Ўзбекистондаги оилавий поликлиникалар фаолияти билан яқиндан танишиб, уларни Испания соғлиқни сақлаш тизими билан ўзимча солиштириб кўрдим. Ўйлашимча, оилавий поликлиникалар тажрибасини дунё мамлакатларига ўрнак қилиб кўрсатса арзийди, — дейди Испаниядаги «HM Hospitals» клиникасининг бош­қарувчи директори Хавьер Каскеро Лара. — Ўзбекистонда яратилган тизим, оила, она ва бола манфаати устувор эканини намоён этди. Мазкур халқаро анжуман юртингизда эришилган ютуқ ва тажрибаларни оммалаштириш, тиббиёт ютуқларини тарғиб этишда муҳим аҳамият касб этади.

 

Нуруллоҳ ДОСТОН,

«Ўзбекистон овози» мухбири.



DB query error.
Please try later.