07.09.2016

ЯНГИ МАҲСУЛОТ ИШЛАБ ЧИҚАРИШ ЎЗЛАШТИРИЛДИ

«Навоий» эркин индустриал-иқтисодий зонасида фаолият кўрсатаётган «TELECOM INNOVATIONS» Ўзбекистон-Сингапур-Хитой қўшма корхонаси рақамли телевидение сигналларини қабул қилиш ускунаси, ADSL модемлар ва DSLAM қурилмалари ишлаб чиқаришда етакчи корхоналардан биридир.

Яқинда бу ерда Хитойнинг «ZTE» компанияси янги лойиҳалари ва тўғридан-тўғри инвестицияси эвазига рақамли сигналларни қабул қилиш қурилмасининг IPTV ҳамда модемларнинг Home gateway серияли янги турларини ишлаб чиқариш йўлга қўйилди.

— Қўшма корхонамиз 2010 йилда ташкил этилган, — дейди корхона директори Фирдавс Алиев. — Ўзбекистон Республикаси Вазирлар Маҳкамасининг 2011 йил 28 апрелдаги «Ўзбекистон Республикаси Президенти Ислом Каримовнинг Хитой Халқ Республикасига давлат ташрифи вақтида эришилган келишувларни амалга ошириш ва икки томонлама ҳамкорликни янада ривожлантириш бўйича чора-тадбирлар тўғрисида»ги қарорига асосан корхонада замонавий теле ва алоқа воситалари ишлаб чиқариш кўламини кенгайтириш, янги турдаги маҳсулотлар тайёрлашни йўлга қўйиш мақсадида Хитой Халқ Республикасининг «ZTE» компанияси қўшма корхона таъсисчилари қаторига жалб этилди. Натижада ишлаб чиқариш ҳажми янада ортди.

Айни пайтда корхонада меҳнат қилаётган 40 ишчининг аксарияти ёшлардир. Мутахассислар малакасини ошириш, янги маҳсулот турларини ўзлаштириш ва сифат кўрсаткичларини янада яхшилаш мақсадида Хитой Халқ Республикасининг «ZTE» университетида махсус ўқув ва малака ошириш йўлга қўйилган.

Корхонада амалга оширилган модернизация ишлари самарасида қурилмалар тури 5 дан 15 тага етказилди. Натижада 2013 йилда 1 минг 600 қурилма ишлаб чиқарилган бўлса, 2015 йилда бу кўрсаткич 16 минг 460 га етди.

ISO 9001:2009 сифат менежментига эга корхона 2015 йилда сифат, етакчилик ва мукаммаллик йўналишида International Quality Crown Award (IQC) мукофоти билан тақдирланган.

 

Н.РАҲИМОВ,

ЎзА мухбири.



DB query error.
Please try later.