Охирги сонда



Кўп ўқилган мақолалар



Долзарб мавзу



Мақолалар архиви

«    Yanvar 2019   
Du Se Cho Pa Ju Sha Ya
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3
05.09.2016

ҲАРАКАТ — ДАВОЛАЙДИ, УМРНИ УЗАЙТИРАДИ, ЁМОН ИЛЛАТЛАРДАН АСРАЙДИ

Соғлиқни сақлашнинг энг содда, қулай ва харажат талаб қилмайдиган йўли югуришдир

Яқинда йўлим тушиб, пойтахтимиздаги «Ялан­ғоч» массивига бордим. Манзилни яқин қилиш учун «дом»лар орасидан кесиб ўтмоқчи бўлдим. Теннис стадиони атрофидан ўтарканман, югуриш йўлагида машқ бажараётган ҳамкасбимиз, ҳозирда пенсионер Миршароф Муҳсимовни кўриб қолдим. Кўриниши яхши, ҳаракатлари дадил.

— Ёшликда соғлиқнинг қадрига етмаган эканмиз. Одамнинг ёши ўтгани сайин соғлиғи ҳақида кўпроқ қайғурадиган бўлиб қоларкан, — деди у.

Миршароф ака билан анча вақт гаплашиб қолдик. У киши спортнинг, жумладан, югуришнинг хосияти ҳақида ўзи ва тенгқурлари мисолида кўп гапларни айтди.

— Ҳаммасига дўхтир қўшнимиз сабабчи. У киши бизни қизиқтирмаганида Худо билади, ҳалигача эринчоқ бўлиб, уйда ётаверган бўлармидик, — дейди Миршароф Муҳсимов. — Биз, қарияларга шундай жон кириб кетдики, кимдир бел ва яна аллаким оёқ оғриғини унутди. Баъзи бировлар ҳассасини улоқтириб ҳам юборди...

Бир қўшнимиз бор, бақалоқ эди. Кейин билсак, уни ҳам югуришга дўхтир даъват этган экан. Ҳозир у хипча! Қушдек енгил! Чопоғон!

— Сафимиз кенгайгандан кенгайиб боряпти, — дейди яна бир отахон. — Ҳатто ашаддий кашандалар ҳам келиб қўшила бошлашди. Чунки «Ҳаёт ҳаракатни тақозо этади. Ҳаракат инсон умрини қанчалик узайтирса, ҳаракатсизлик эса уни тўшакка яқинлаштиради». Ибн Сино одамларни бежиз табиат қучоғига чорламаган. Шоир Камолиддин Биноий «Соғлиқни қилсанг ҳавас, оз овқат еб, айла бас!..» деган. У яна аллақанча алломалар фикрларини мисол қилиб келтирди.

Бир куни дўхтир:

— Югурганингиз ни­ма-ю босиб-босиб чекканингиз нимаси? Ахир, чекиш заҳар ютиш билан тенг-ку, — деб қолди лабига сигарета қистирилган қўшнилардан бирига. Маҳтумқулининг ажойиб сатрини ёдга олди:

«Шунча душмандирки, охир бошингиз бебош этар,

Вақти етмай сўндириб, жисмингизни лош этар,

Қайғу ҳасрат йўқ экандир, кўзингизни ёш этар,

Ҳар замон дуд юттирар, ҳам ўпкангизни тош этар,

Асти ғофил бўлманглар, шунча бадкордир чилим!»

— Шу бугундан бошлаб чекмаганим бўлсин, — деди кашанда қўшниларимиздан бири.

Шериклари ҳам унинг гапини маъқуллашди.

Ичкилик ва маишатга мойилроқ бир қўшнимиз ҳам дўхтирнинг гапи билан стадионга чиқадиган бўлди.

— Кашандалик, ичкиликбозлик қон томирларига салбий таъсир кўрсатишини биласизми? — деди дўхтир унга. — Маш­ҳур Гейне нима деган: «Шиша ичидан менга офат кўринади». Сизнинг-чи, сизнинг кўзингизга нима кўринади?.. Арасту деган донишманд­ни эшитганмисиз? У «маст бўлиш ўз ихтиёри билан ақлдан озишдир» деган.

Инсонга доғ туширувчи жиноятларнинг аксарияти шароб ичиш туфайли содир этилар экан.

Бу гапларни диққат билан эшитган қўшнимиз:

— Эртагаёқ стадионга чиқаман, эркак кишининг гапи битта, — деб бизни ишонтирди ва сўзининг устидан чиқди.

Ҳозир у пана-панада юрган улфатларини ҳам стадионга чақиряпти, янги турмуш тарзига ўргатаяпти.

— Рим олими Сенека айтганидек, бизга берилган умр қисқа эмас, зарарли одатларга ўрганиб, умрни ўзимиз қис­қа қилиб қўямиз, — дейди Миршароф ака. — Мен ҳаммага даъват этаман: узоқ яшайман десангиз, кашандалик ёки ичкиликбозлик иллатларидан қочинг. Сафимизга қўшилинг, келинг, яхшиси биргалашиб югурайлик. Модомики, соғлиғимиз ўз қўлимизда экан, югурайлик...

Ҳамкасбимизнинг гапидан сўнг ҳаракат инсонни даволашига яна бир бор ишонч ҳосил қилдик. Умрни узайтириб, ёмон иллатлардан сақлайди. Соғлиқ сотилмайди ва уни сотиб олиб бўлмайди ҳам. Чолларки, югуриш­яптими, билингки, саломатликни шундан қи­дириш керак. Зеро, ҳаракатда гап кўп.

 

Равшан ШОДИЕВ,

«Ўзбекистон овози» мухбири.



DB query error.
Please try later.