04.09.2016

СОДИҚЛИК ҚАСАМЁДИ

ИИВ Академиясида 1-ўқув курси тингловчилари тантанали равишда Ўзбекистон Республикаси ички ишлар идоралари ходимининг Қасамёдини қабул қилдилар.

Маълумки, Қасамёд қабул қилиш шунчаки расмий тадбир эмас, балки йигитлик шаънини, ор-номусини ўртага қўйиб, Ватан ва халқ олдидаги масъулиятли ва шарафли бурчини садоқат билан адо этиш ҳақидаги аҳддир.

Тадбирни Академия бошлиғи, генерал-майор Шавкат Икрамов кириш сўзи билан очар экан, ота-она учун фарзандининг камолини, эл ­корига ярайдиган инсон бўлишини кўришдан ортиқроқ бахт йўқлигини таъкидлаб ўтди.

Шундан сўнг 1-ўқув курси тингловчилари навбат билан тантанали тарзда қасам­ёд қилишди.

Ички ишлар вазири ўрин­босари, полковник Алишер ­Мирзаев қасамёд қабул қилган тингловчилар Академия­да яратилган имкониятлар, профессор-ўқитувчилар ҳамда устоз-мураббийларнинг билим ва тажрибаларидан самарали фойдаланиб, етук мутахассис кадрлар бўлиб етишишлари лозимлигини таъкидлади.

Шундан сўнг профессор-ўқитувчилар номидан ички ишлар органларида бошқарувни ташкил этиш кафедраси бошлиғи, полковник Исомиддин Исмоилов, ота-оналар номидан Зулхумор Атхамова сўзга чиқиб, эл-юрт осойишталигини асрашдек муқаддас вазифани бажаришга шай турган ёшлар берилган топшириқларни виждонан ва сидқидилдан адо этишлари, ота-онаси ҳамда устозлари ишончини оқлашларида омад ёр бўлишини тилашди.

1-ўқув курси тингловчиси Авзал Раҳматуллаев сафдошлари номидан она Ватан учун, виждонан хизмат қилишга ҳамиша тайёр эканликларини изҳор этди.

Анъанага мувофиқ, аъло ўқиши, намунали хулқи, жамоат ишларидаги фаоллиги билан сафдошларига ўрнак бўлаётган тингловчиларни «Ўзбекистон Республикаси ички ишлар вазирининг стипендиати» Фахрий ёрлиғи билан тақдирлаш тўғрисидаги Ички ишлар вазирининг буйруғи ўқиб эшиттирилди. Вазир стипендиатлари — иккинчи курс тингловчиси Наврўз Муҳаммадиев, учинчи курс тингловчиси Гулшода ­Ўткирова ҳамда тўртинчи курс тингловчиси Улуғбек Омоновга Фахрий ёрлиқлар топширилди.

Ушбу тантана тингловчилар ҳамда уларнинг яқинлари ҳаётида унутилмас кун бўлиб қолади.

 

Равшан ШОДИЕВ,

«Ўзбекистон овози» мухбири.



DB query error.
Please try later.