04.09.2016

СУҒУРТАДА ЯНГИ МОДУЛЬ

«Ўзбекинвест» экспорт-импорт миллий суғурта компаниясида интернет фойдаланувчилари учун онлайн тартибида саволларга жавоб бериш йўли орқали суғурта асосларини ўрганиш ва уларнинг соҳага оид билимларини текшириб кўриш имконини берувчи модуль ишга туширилди. Онлайн тартибда ишлаётган мазкур ишланмадан фойдаланаётганлар сони кун сайин ортмоқда.

www.uzbekinvest.uz веб-сайтида жойлаштирилган ушбу янги модулдан суғурта масалалари, хусусан, суғуртанинг мажбурий ва ихтиёрий турлари, суғурта даъволарини кўриб чиқиш тартиби, шунингдек, компаниянинг фаолияти билан боғлиқ маълумотларга эга бўлишни истаганлар фойдаланиши мумкин.

— Суғурта соҳасини мустақил ўрганиш ҳамда эгалланган билимларни тест топшириш орқали текшириб кўриш имконини берувчи янги модуль аҳолининг суғурта маданиятини оширишга хизмат қилади, — дейди компания департаменти менежери Мукаррам Алибоева.­ — Янги ишланма ҳар бир мутахассис учун билимлар манбаи бўлиб, ходимларимиз ва агентларимизнинг ҳам малакаси онлайн режимда оширилмоқда. Бу эса вақтни ва маблағни тежаш имконини беради.

Таъкидлаш жоизки, аҳолига янада қулайлик яратиш мақсадида компанияда бир қатор чора-тадбирлар амалга оширилди. Хусусан, суғурта шартномаларини тузишда ва суғурта ҳодисалари юз берганда мижозларга амалий кўмак берувчи ахборот-маслаҳат гуруҳлари ташкил этилди. Ҳозир мазкур гуруҳлар суғурта соҳасига оид қабул қилинаётган қонун ҳужжатлари ва уларга киритилаётган ўзгартишлар, мавжуд суғурта турлари, суғурта шартномаси шартлари, суғурта даъволарини кўриб чиқиш қоидалари ва бошқа масалалар тўғрисидаги маълумотларни мижозларга етказмоқда.

 

Сайёра ШОЕВА,

ЎзА мухбири.



DB query error.
Please try later.