20.08.2016

«ИЖТИМОИЙ ҲИМОЯДАН – ИЖТИМОИЙ ФАОЛЛИК САРИ»

Хотин-қизларни ҳар томонлама қўллаб-қувватлаш, ижтимоий ҳимоясини кучайтириш, иш билан таъминлаш, бир сўз билан айтганда, уларнинг турмуш даражасини яхшилаш масаласига алоҳида эътибор қаратиб келинмоқда. Бу жараёнда Ўзбекистон Халқ демократик партияси ташкилотлари фаол иштирок этишга ҳаракат қиляпти. Қатор ташаббуслар амалга оширилмоқда. Хотин-қизларнинг ижтимоий-сиёсий фаоллигини ошириш сектори томонидан ўтказиб келинаётган «Ижтимоий ҳимоядан — ижтимоий фаоллик сари» лойиҳаси фикримиз тасдиғидир.

Лойиҳа доирасидаги тадбирлар давомида ўз ишини бошлаш истагида бўлган хотин-қизлар ва коллеж битирувчиларига кўмаклашилмоқда. Касаначилик ва уй меҳнатининг бошқа шаклларида меҳнат фаолиятини бошлаганларга меҳнат қонунчилиги кенг тушунтириляпти.

Хўш, ўтган давр мобайнида мазкур лойиҳа юзасидан қандай натижаларга эришилди? Ҳудудларда тадбирлар қандай савияда ташкил этилмоқда?

Гулшан АСАТОВА, ЎзХДП Марказий Кенгаши сектор мудири:

— Биринчи навбатда партия электорати ҳисобланган хотин-қизлар орасидан ишлашга, касаначилик меҳнати, тадбиркорлик билан шуғулланишга хоҳиши ва малакаси бор хотин-қизлар аниқланиб, уларнинг мутахассислиги таҳлил қилинмоқда. Корхоналардаги бўш иш ўринлари, касаначилик меҳнатини ташкил этиш бўйича имконият­лари, шунингдек, корхона ва ташкилотларнинг мутахассисларга бўлган эҳтиёжи ўрганилиб, хотин-қизларга йўл-йўриқ кўрсатилмоқда. Бундан таш­қари, мутахассисларни жалб этган ҳолда бизнес-режалар ишлаб чиқиш ва кредит олиш масалаларида кўмак бериляпти.

Жорий йилнинг ўтган олти ойи давомида лойиҳа доирасида республика бўйича 700 дан ортиқ тадбир ўтказилди. 1000 га яқин корхона ўрганилиб, улардаги бўш иш ўринлари аниқланди. Натижада 1600 нафарга яқин хотин-қиз ишга жойлашди. 380 нафардан ортиғига кредит олишларида ёрдам кўрсатилди. Шунингдек, тадбирлар жараёнида 2500 нафардан ортиқ хотин-қиз партиямиз сафига қабул қилинди.

Озода КУЛИМОВА, ЎзХДП Хоразм вилоят кенгаши сектор мудири:

— Электорат вакиллари орасига янада чуқур кириб бориш, уларни ўйлантираётган масалаларни ўрганишда лойиҳанинг аҳамияти катта бўляпти. Ўтказилаётган тадбирлар орқали биз хотин-қизлар бандлигини таъминлашда дуч келинаётган муаммоларни ўрганиб, уларни ҳал этишга кўмаклашмоқдамиз.

Вилоят бўйича жорий йилнинг биринчи ярмида 67 нафар хотин-қиз иш билан таъминланди. 100 нафар аёлга ҳуқуқий маслаҳатлар берилди, уларнинг 70 га яқини ўз ишини бошлади. Секторимиз томонидан ўтказилган учрашув, давра суҳбатлари чоғида 436 нафар хотин-қиз партия­миз сафига қабул қилинди.

Мақсадимиз оилалар турмуш фаровонлигини ошириш, аёлларнинг оғирини енгил қилиш, уларга қулай шарт-шароит яратишдан иборатдир.


Гули АБДУРАҲИМОВА, ЎзХДП Тошкент вилоят кенгаши сектор мудири:

— Ўзбекистон ХДП Сайловолди дастурида аҳоли, жумладан, хотин-қизлар учун барқарор ва юқори ҳақ тўланадиган иш ўринлари яратиш, уларнинг шахсий ташаббускорлигини рағбатлантириш устувор вазифалардан бири сифатида белгиланган.

«Ижтимоий ҳимоядан — ижтимоий фаоллик сари» лойиҳаси буни амалга оширишда муҳим аҳамият касб этмоқда. Лойиҳа асосида олти ой давомида вилоятимизда 100 дан ортиқ маҳаллада давра суҳбатлари, учрашувлар ўтказилди.

Ҳудудлардаги корхоналарда 400 га яқин бўш иш ўрни аниқланди. 133 нафар хотин-қизнинг банд­лиги таъминланди. Бу борада мутасадди ташкилотлар ва партиямиз гуруҳлари ҳамкорлиги қўл келмоқда. Партиямизга ишонч ортмоқда. Лойиҳа доирасида 348 нафар хотин-қиз партиямиз сафига киргани бунинг исботидир.

Ҳар ойда маҳаллаларда ўтказилаётган тадбирларнинг аҳамияти шундаки, бандлик масалаларидаги муаммолар жойида ўрганиляпти. Айрим аёллар қўлида сармояси билан қаерга боришни, мустақил ишини қандай бошлашни билишмайди. Айримлар кредит олиш тартиб-қоидаларини яхши билмай, муаммоларга дуч келишмоқда. Биз ҳамкорлар ва депутатлар кўмагида уларни қўллаб-қувватлашга ҳаракат қиляпмиз.

Феруза НИШОНОВА, ЎзХДП Фарғона вилоят кенгаши сектор мудири:

— Хотин-қизлар ҳамширалик, тарбиячи йўналишларида иш ўринлари камлиги, фойдаланилмаётган биноларни тикувчилик цехига айлантириш масалаларида мурожаат қилишяпти. Уларнинг кўпчилиги жойида ҳал этиляпти. Айримлари маҳаллий давлат ҳокимияти органлари ва партиямиз гуруҳларига тақдим қилинмоқда.

Мисол учун, Марғилон шаҳар Чароғон маҳалласида 23-мактабгача таълим муассасасига кам таъминланган оила фарзандини имтиёзли тарзда олиш, вилоят касалхонасига бепул даволанишга йўлланма бериш масалалари ҳал этилди. Навоий ва Яссавий маҳаллалари ўртасидаги Фурқат кўчасини асфальтлаштириш бўйича шаҳар ободонлаштириш бошқармасига депутатлик сўрови юборилди.

Хотин-қизлар бандлигини таъминлаш, уларнинг қобилият ва имкониятларини рўёбга чиқариш, бунинг учун муносиб шарт-шароит яратиш долзарб ҳаётий масала ҳисобланади. Партиямизнинг «Ижтимоий ҳимоядан — ижтимоий фаоллик сари» лойи­ҳаси шу мақсадга хизмат қилмоқда.

 

Гулруҳ ОДАШБОЕВА,

«Ўзбекистон овози» мухбири.



DB query error.
Please try later.