18.08.2016

МИЛЛИЙ ПАРЛАМЕНТ – ЖАМИЯТ ҲАЁТИНИНГ КЎЗГУСИ

Ўзбекистон Республикаси Олий Мажлиси Қонунчилик палатасида «Миллий парламентнинг шаклланиши ва ривожланиши» мавзуида парламент конференцияси бўлиб ўтди.

Ватанимиз мустақиллигининг 25 йиллигига бағишлаб ўтказилган анжуманда сенаторлар, депутатлар, давлат ҳокимияти ва бошқаруви органлари масъул ходимлари, илмий доира вакиллари ва оммавий ахборот воситалари ходимлари иштирок этди.

Ўзбекистон Республикаси Олий Мажлиси Қонунчилик палатаси Спикери Н.Исмоилов, парламент қуйи палатасининг Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси раиси А.Саидов ва бош­қалар истиқлолнинг илк кунлариданоқ Президентимиз ташаббуси билан Ўзбекистоннинг миллий манфаатларига жавоб берадиган тараққиёт йўли белгилаб олинганини таъкидлади. Бу жараёнда инсон манфаатларига хизмат қиладиган қонун ижодкорлиги билан шуғулланадиган демократик миллий парламент шакллантирилди. Давлат ҳокимияти органлари тизимида унинг роли ва таъсири кучайтирилди.

Дастлаб бир палатали парламент ёш давлатимизнинг демократик сиёсий тизими, адолатли фуқаролик жамияти, ижтимоий, иқтисодий, маданий ва бош­қа соҳаларнинг ҳуқуқий негизини яратишга ўз ҳиссасини қўшди. Бу даврда Ўзбекистон Республикаси Конституцияси қабул қи­линди, халқимизнинг хоҳиш-иродасини эркин ифода этишни таъминловчи сайлов тизимига ҳуқуқий замин яратилди.

Дунёда «ўзбек модели» дея эътироф этилган ривожланиш стратегияси асосида давлат бошқаруви соҳасида амалга оширилган демократик ислоҳотлар 2000 йилга келиб, мамлакатнинг қонун чиқарувчи олий органи фаолия­тини замон талаблари асосида янада такомиллаштириш учун шарт-шароит яратди.

Президентимиз ташаббуси билан 2002 йилнинг 27 январида ўтказилган умумхалқ референдуми якунлари асосида икки палатали, мунтазам фаолият кўрсатадиган профессионал орган — Қонунчилик палатаси ҳамда ҳудудлар манфаатини ифода этадиган вакиллик органи — Сенатдан иборат парламентни шакллантириш учун ҳуқуқий асос яратилди.

Икки палатали парламент тизимига ўтилгани мамлакатимиз парламенти ваколатлари ва назорат вазифаларининг ролини кучайтиришда муҳим аҳамият касб этди.

Конференцияда таъкидланганидек, давлатимиз раҳбари томонидан илгари сурилган Мамлакатимизда демократик ислоҳотларни янада чуқурлаштириш ва фуқаролик жа­мия­тини ривожлантириш концепцияси палаталарнинг фаолиятини янада кучайтиришга йўл очди. Шу асосда Конституциямизга киритилган тузатишлар Олий Мажлиснинг, сиёсий пар­тияларнинг Қонунчилик палатасидаги фракциялари ваколатларини кенгайтирди. Хусусан, Олий Мажлис ваколатларига Бош вазирнинг мамлакатни ижтимоий-иқтисодий ривожлантиришнинг долзарб масалалари юзасидан ҳисоботини эшитиш ва муҳокама қилиш, парламент назоратини амалга ошириш киритилди.

Бугунги кунда Ўзбекистон Республикаси Олий Мажлисининг Қонунчилик палатасида иккита партия фракцияси — Тадбиркорлар ва ишбилармонлар ҳаракати — Ўзбекистон либерал-демократик партияси ва «Миллий тикланиш» демократик партияси фракцияларидан иборат «Демократик кучлар блоки» тузилган ва самарали ишлаб турибди. Ўзбекистон Халқ демократик партияси фракцияси ва «Адолат» социал-демократик партияси фракциялари тимсолида парламент мухолифати фаолият кўрсатаётир.

Президентимизнинг Олий Мажлис Қонунчилик палатаси ва Сенатининг 2015 йил 23 январда бўлиб ўтган қўшма мажлисидаги маърузаси мамлакатимизда парламент фаолиятини мутлақо янгича услубда ташкил этиш, унинг ваколатларини самарали амалга ошириш механизмларини такомиллаштиришда муҳим омил бўлди. Маърузада белгилаб берилган устувор йўналишлар Қонунчилик палатасининг яқин ва узоқ муддатли истиқболга мўл­жалланган режаларига асос бўлди.

Конференцияда мамлакатимиз равнақини янада юксалтириш борасида парламент олдида турган вазифалар муҳокама этилди. Қонун ижодкорлиги фаолиятини режалаштириш ва прогнозлаштиришнинг самарали тизимини яратиш хусусида мулоҳазалар билдирилди.

Экспертлар иштирокида ўтказилган конференция истиқболда парла­мент­ни янада ривожлантиришнинг муҳим масалаларини аниқлаш имконини берди. Анжуман якунида давлатимиз раҳбарининг Ўзбекистон Республикаси Конституцияси қабул қи­линганининг 23 йиллигига бағишланган тантанали маросимдаги маърузасида белгилаб берилган устувор вазифаларни бажаришнинг самарадорлигини янада ошириш юзасидан фикр алмашилди.

 

Норгул АБДУРАИМОВА,

ЎзА мухбири.

Фикр ва мулохазалар

Защита от автоматических сообщений

Сўнгги янгиликлар: