18.08.2016

СОЛИҚ ИМТИЁЗЛАРИ — ИҚТИСОДИЙ РИВОЖЛАНИШ ОМИЛИ

Мамлакатимизда саноат корхоналарини модернизациялаш, техник ва технологик жиҳатдан қайта жиҳозлашга катта эътибор қаратилмоқда. Бунда тизимни рақобатбардош ва экспортга йўналтирилган маҳсулот ишлаб чиқариш имконини берадиган илғор ускуналар билан таъминлаш масаласи устувор йўналиш сифатида белгиланган. Пировардида тайёрланаётган маҳсулотларга ички ва ташқи бозорда талаб ортиб бораётир. Мазкур муваффақиятларда эса солиқ имтиёзлари ҳам муҳим ўрин тутмоқда.

Алоҳида таъкидлаш жоизки, хусусий сектор манфаатлари йўлида солиқ тизимида амалга оширилаётган кенг кўламли ишлар иқтисодий ривожланиш омили бўлаётир. Жумладан, жорий йилнинг ўтган даврида биргина Сурхондарё вилоятида замонавий технология билан жиҳозланган ўндан ортиқ хусусий корхоналар ишга туширилганлиги фикримиз далилидир.

Бугунги кунда вилоятда 11 мингга яқин кичик бизнес субъекти фаолият юритмоқда. Улардан бири «Сурхон Термиз чинни» масъулияти чекланган жамияти фаолиятига доир рақамлар таҳлили шуни кўрсатадики, 2015 йилда Солиқ кодексининг 356-моддасига биноан берилган имтиёзлар туфайли мазкур корхона 348 миллион 578 минг сўмдан ортиқ маблағни тежаб қолган. Йилига саккиз мил­лион донагача чинни маҳсулот ишлаб чиқариш қувватига эга ушбу корхонада 150 нафар киши меҳнат қилмоқда. Ўтган йили 2 миллион 700 минг дона чинни тайёрланди.

— Маҳсулотларимиз ҳам сифати, ҳам мақбул нархи билан харидорларда катта қизиқиш уйғотмоқда, — дейди мазкур МЧЖ ижрочи директори Р.Неъматуллаев. — Чинни буюмларимизга бошқа вилоятлардан ҳам буюртмалар келиб тушмоқда. Корхонамиз фаолиятини кенгайтиришда солиқ имтиёзларининг аҳамияти катта бўлаяпти. Мисол учун, шу йилнинг ўтган даврида солиқ имтиёзлари туфайли 444 миллион 629 минг сўмлик маблағ ўзимизга қолди. Йил якунига кўра, солиқ имтиёзлари ҳисобидан тежалган молиявий захира ҳисобидан янги технология­лар олиб келиб ўрнатишни режалаштирганмиз.      

Албатта, бу каби солиқ имтиёзлари жойларда янги тармоқларни ташкил этиш, импорт ўрнини босувчи экс­портбоп маҳсулотлар ишлаб чиқариш имкониятини тобора кенгайтирмоқда.         

 

Илёс РАҲМАТОВ,

Сурхондарё вилоят ДСБ ахборот хизмати бошлиғи.



DB query error.
Please try later.