Охирги сонда



Кўп ўқилган мақолалар



Долзарб мавзу



Мақолалар архиви

«    Mart 2017   
Du Se Cho Pa Ju Sha Ya
27 28 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2
18.08.2016

ДЕҲҚОНОБОД ОБОД БЎЛМОҚДА

Деҳқонобод юртимизнинг энг чекка туманларидан бири. Яқин-яқингача уни ўраган пурвиқор тоғлар ва сўлим боғлар, бепоён яйловлар, самимий ва кўнгли очиқ, танти ва меҳнаткаш одамлари бу масканнинг асосий бойлиги саналарди.

Сабаби... туман фақат ғаллачилик, чорвачилик ва боғдорчиликка асосланган бўлиб, иқтисодиёт ночор эди, аҳоли ўртамиёна кун кечирар, турмуш тарзи ҳам шунга яраша эди.

Ўттиз-қирқ йил олдин деҳ­қонободликларнинг биргина орзуси бор эди: туманга табиий газ келса... Аммо шўролар даврида бу орзу ҳеч қачон ушалмайдигандек туюларди.

Истиқлол туфайли элнинг кўнглида ғимирлаб юрган ниятлар мўъжизавий тезликда рўёбга чиқа бошлади.

Деҳқонободга қувурлар тортилиб, табиий газ келтирилиши мустақилликнинг даст­лабки совғаси бўлди. Туман аҳлининг турмуши енгиллашди.

Туман аҳли учун армондай туюлган орзулар амалга ошди. Кетма-кет мўъжизалар рўй бера бошлади. «Тошгузар — Бойсун — Қум­қўрғон» темир йўли қурилиши бошланганда деҳқонободликлар ҳайрон бўлиб қолишди. Ҳайбатли тоғ-у тошлар, қоялар, сой ва даралар оша темир йўл ўтиши, ундан поездлар қатнаши ақлга сиғмасди.

Темирйўлчи юртдошларимиз чинакам жасорат, матонат ва маҳорат намунасини кўрсатишди. Умумий узунлиги 223 километрлик, 37 кўприкдан ўтадиган йўл қисқа муддатда қуриб битказилди. Биргина Қорадаҳна қишлоғи яқинидаги Консой устига қурилган кўприкни пастдан кўрган кишининг ҳайрати ошиб, бунёдкорларга таҳсин айтади. Кўприкнинг узунлиги 234,2 метрни, баландлиги эса 45 метрни ташкил этади-да. 170 километр масофани ва 7 соатлик қатнов вақтини тежашга имкон берадиган мазкур темир йўл 2007 йилнинг августида фойдаланишга топширилди.

Йўл бўйлаб бунёд этилган 6 вокзал ва улар атрофидаги хизмат кўрсатиш шохобчалари ушбу ҳудуддаги аҳолининг турмуш тарзини ўзгартириб юборди. Тадбиркорлик ва ишбилармонликка кенг йўл очди. Айни пайт­да «Деҳқонобод» ва «Оқр­а­бот» станцияларида темир­йўлчилар учун 4 та икки қаватли ва 2 та бир қаватли замонавий коттеж қурилди. Шунингдек, «Деҳқонобод» станцияси ҳудудида барча қулайликлар ва замонавий жиҳозларга эга бўлган спорт мажмуаси барпо этилди.

2009 йилнинг 20 августидан «Тошкент — Термиз — Тошкент» йўналиши бўйича қатнов бошланди. Бу эса туман иқтисодиётини юксалтиришда муҳим омил бўлди.

Туманга саноат дадил қадамлар билан кириб кела бошлади. Лойиҳа қиймати 123,7 миллион долларлик, йилига 200 минг тонна калийли ўғитлар ишлаб чиқарадиган замонавий завод бун­ёд этилди. Мутахассисларнинг ҳисоб-китобларига қараганда, Тепақўтон туз кони бағрида 215 миллион тоннадан ортиқ калий тузлари (сильвинит) бор бўлиб, 250-700 метр чуқурликда жойлашган ушбу захира 300 йилга етаркан.

Бундан ташқари, Деҳқон­обод заминида нефть, газ, калий тузи, гипс, оҳак ва бош­қа хил қазилма бойликларини ўзлаштириш ишлари ҳам жадал олиб борилмоқда.

Халқимизда «Меҳнатдан келса бойлик, турмуш бўлар чиройлик», деган мақол бор. Иқтисодий юксалишлар турмуш фаровонлигини оширишга хизмат қилмоқда. Сўнгги ўн-ўн беш йилда туман ҳудудида барча замонавий қулайликларга эга бўлган 8 касб-ҳунар коллежи, 80 га яқин таълим ва 12 тиббиёт муассасаси, болалар мусиқа ва санъат мактаби, шунингдек, ФҲДЁ туман бўлими, давлат солиқ инспекцияси, молия бўлими, ғазначилик бўлинмаси, бюджетдан ташқари пенсия жамғармасининг туман бўлинмаси, ТЭМК бинолари қурилди, 10 замонавий маҳалла гузари, кўплаб савдо, умумий овқатланиш ва маиший хизмат кўрсатиш объект­лари барпо этилди.

Шўртангазкимё мажмуи ҳомийлигида электр энергия­сини тежовчи лампочка цехи, қандолат маҳсулотлари, турли ширинликлар, печенье ва макарон ишлаб чиқарувчи корхоналар бун­ёд этилди. Натижада аҳолини, айниқса, хотин-қизлар ва ёшларни иш билан таъминлаш учун катта имконият яратилди.

Кейинги олти йил давомида қурилган 270 дан зиёд намунавий лойиҳадаги уй-жойларда деҳқонободликлар ҳовли тўйларини ўтказиб, фарзандлари билан умргузаронлик қилмоқда.

Айниқса, икки йил муқаддам бунёд этилган 5-болалар мусиқа ва санъат мактаби туман аҳлининг фахрига айланган. Умумий қиймати 2 миллиард 400 миллион сўмлик ушбу санъат кошонаси 150 нафар ўқувчига мўлжалланган. 250 ўринли концерт зали, хореография, рақс, тасвирий санъат, маънавият хоналари ёш истеъдодлар хизматида. Ҳозир бу ерда тасвирий санъат, эстрада ва анъанавий хонандалик, миллий чолғу асбоблари бўлимларида санъатга иштиёқманд 120 нафар ўқувчи таълим олмоқда. Уларга 19 нафар тажрибали устоз-мураббий мусиқа ва санъат сирларини қунт билан ўргатмоқда.

Бибиқорасоч қишлоғида яшовчи Ҳайдар бобо Бозоров узоқ йиллар таълим соҳасида ишлаган. Ҳозир кексалик гаштини сурмоқда.

— Бугунги кунимизга минг марта шукр қилсак ҳам кам, — дейди Ҳайдар бобо. — Замон шунчалар яхши бўлиб кетаяпти-ки, севинчдан юрагинг кўксингга сиғмайди. Юрт гўзаллашиб, обод бўлиб бораяптики, ҳавасинг келади! Биз қандай мактабларда ўқиган эдик?.. Томининг усти ёпилганини айтмаса, мисли чордевор эди. Мактаб болалари гуррос ўтиб-қайтишса, шипгача чанг кўтариларди. Энди эса бири-биридан кўркам, чиройли мактаблар, коллежлар қурилаяпти. Бир куни қизиқсиниб, мактабга борсам, оғзим ланг очилиб қолди. Синфхоналар — кенг ва ёруғ, шинам ва озода, билим олиш учун нимаики зарур бўлса, барчаси муҳайё.

Ҳа, бугун деҳқонободликларнинг дастурхони тўкин, ҳаёти эса фаровон. Тумандаги 8 озиқ-овқат бозорида аҳоли эҳтиёжи учун исталган нарса топилади. Каттаю кичик бугунги кунидан мамнун, эртанги кундан умидлари янада катта.

Ушбу саодатни эса чорак аср муқаддам бошимизга бахт қуши бўлиб қўнган — Истиқлол берди, Мустақиллик берди.

 

Абдуқаюм БЕККАМОВ,

туман ҳокимлиги масъул ходими, Ўзбекистон ХДП фаоли.


Фикр ва мулохазалар

Защита от автоматических сообщений

Сўнгги янгиликлар: