16.08.2016

ҲЕЧ КИМ ЭЪТИБОРДАН ЧЕТДА ҚОЛМАЙДИ

Инсон қадр-қимматини улуғлаш, бир-бирига таянч ва суянч бўлиш — халқимизга хос фазилат. Шу боис мамлакатимизда бу масалага алоҳида эътибор қаратилмоқда, жисмоний имконияти чекланган кишилар ўзларини жамиятнинг фаол аъзоси сифатида ҳис қилиши, иқтидори ва қобилиятини рўёбга чиқариши учун зарур шароит яратиб берилмоқда.

Маълумки, Ўзбекистон ХДП Сайловолди дастурида жисмоний имконияти чекланган фуқароларни ижтимоий ҳимоялаш, уларнинг ҳаёт даражасини янада яхшилаш, моддий ва маънавий қўллаб-қувватлаш борасида қатор вазифалар белгиланган. Шунга мувофиқ, партия ташкилотлари қатор ташаббусларни илгари сурмоқда.

Хусусан, мамлакатимизнинг барча ҳудудларида «Кучли ижтимоий ҳимоя — асосий мақсадимиз» шиори остида акция­ ўтказилмоқда. Куни кеча ана шундай тадбирлар Тошкент шаҳрининг Олмазор, Чилонзор, Яккасарой, Мир­обод туманларида ташкил этилди. Уларда партия фаоллари, маҳаллий Кенгаш депутатлари, маҳалла аҳли, тиббиёт ходимлари ва ёши улуғ отахон-онахонлар иштирок этди. Кам таъминланган, боқувчисини йўқотган ва ногиронлар ҳолидан хабар олинди, самимий суҳбатлар ўтказилди. Бундан ташқари, партия фаоллари томонидан ёрдамга муҳтож оилаларнинг хонадонлари ободонлаштирилди.

— Ўзбекистон Халқ демократик партияси дастурида имконияти чекланган, ижтимоий қўллаб-қувватлашга эҳтиёжманд ногиронлар, якка-ёлғиз кексаларни қўллаб-қувватлашга алоҳида эътибор қаратилган, — дейди ЎзХДП Олмазор туман кенгаши раиси Камолиддин Акромов. — Акция доирасида ўтказилаётган турли тадбирларда электоратимиз вакилларига партиямиз дастурий мақсадлари тушунтирилиб, фуқароларни ўйлантираётган масалалар муҳокама қилинмоқда. Бир сўз билан айт­ганда, партиямиз кў­макка муҳтож кишилар манфаати билан боғлиқ ижтимоий вазифаларни ҳал қилишга алоҳида эътибор қаратмоқда. Биз айнан шу мақсадда кексаларимиз хизматида бўлдик.

— Шуни мамнуният билан айтиш мумкинки, акция доирасида партиямиз фаоллари, депутатлар барча ҳудудларга етиб боришга эришишди, — дейди ЎзХДП Тошкент шаҳар кенгаши раиси ўринбосари Нилуфар Йўлдошева. — Электорат манфаатлари ҳимоя қилинмоқда. Одамларни ўйлантираётган муайян ижтимоий масалалар бартараф этилди, кўпчиликнинг оғири енгил бўлди. Демак, маълум маънода мақсадимизга етдик.

Партия фаоллари акция давомида кўплаб ҳамюртларимиз хонадонларида бўлишди. Уларни яқинлашиб келаётган энг улуғ, энг азиз байрамимиз билан табриклашди, сов­ға-саломлар топширилди.

 

Наврўз ШОДМОНҚУЛОВ,

«Ўзбекистон овози» мухбири.



DB query error.
Please try later.