13.08.2016

«БИЗ ИСТИҚЛОЛ ФАРЗАНДЛАРИМИЗ»

Пойтахтимизда 10-13 август кунлари Ватанимиз мустақиллигининг йигирма беш йиллигига бағишлаб «Гўзал ва бетакроримсан, муқаддас Ватаним, жоним сенга фидо, Ўзбекис­тоним!» шиори остида «Истиқлол фарзандлари» ёшлар фестивали ўтказилди.

«Камолот» ёшлар ижтимоий ҳаракати, Олий ва ўрта махсус таълим, Халқ таълими, Маданият ва спорт ишлари вазирликлари, ­Тошкент шаҳар ҳокимлиги ҳамкорлигида ташкил этилган тадбирда ­Зулфия номидаги Давлат мукофоти, «Ниҳол» мукофоти, «Ўзбекистон белгиси» кўкрак нишони соҳиблари, фан олимпиадалари, халқ­аро танловлар ва спорт мусобақаларида ғолибликни қўлга киритган истеъдодли ёшлар иштирок этди. Улар Олий Мажлис ­Сенати, Қонунчилик палатаси, Конс­титуциявий суд, олий таълим муассасаларида бўлиб, юртимизда амалга оширилаётган ислоҳотлар билан яқиндан танишишди.

Иштирокчиларнинг Олий Мажлис Қонунчилик палатасига ташрифи чоғида айрим ёшларнинг ­таассуротлари билан қизиқдик.

— Худди спорт ареналарида тургандек ҳаяжондаман, — дейди карате бўйича Осиё чемпиони самарқандлик Садоқат Фозилова. — Мустақиллик даврида қурилган бундай буюк иморатлар ўзини Ўзбекистон фарзанди ҳисоблаган ҳар бир йигит-қиз қалбини фахр-ифтихорга тўлдириши табиий. Бу муҳташам кошона мисолида юртимизнинг мустақиллик йилларида эришган ютуқлари, юксак салоҳияти, маънавий қудрати, шу­нинг­дек, бунёдкор халқимизнинг яратиб яшашга бўлган иштиёқини яққол тасаввур этдим.

Бу ерда Қонунчилик палатаси депутатлари билан учрашиш мен учун яна бир қувончли воқеа бўлди.

— Февраль-март ойларида ­Таиландда ўтказилган жаҳон чемпионатида комбат айкидо бўйича ғолиб бўлдим, — дейди навоийлик Шаҳзода Эркинова. — ­Совринни қўлга олаётган, мадҳиямиз янграётган пайтдаги ҳаяжонимни сўз билан ифодалаб беролмайман. Кўзимда ёш, кўнглим тубида «Мен Ўзбекистон фарзандиман!» деган ҳайқириқ бор эди.

Юртимизда ёшларнинг соғлом ва баркамол бўлиб вояга етиши учун барча имкониятлар мавжуд. Таълим ва спорт соҳаларини ривожлантиришга қаратилаётган эътибор туфайли мамлакатимизнинг энг чекка ҳудудларида ҳам замонавий талабларга жавоб берадиган шарт-ша­роитлар яратилган. Биз бундай ғамхўр­ликдан хурсанд­миз.

— Мен бахтлиман, дея баралла айта оламан, — дейди оҳангаронлик Зулфия номидаги Давлат мукофоти совриндори Зулҳаё Раим­қулова. — Чунки озод ва ҳур Ватанда яшаяпман! Ўзбекистон давлат консерваторияси талабасиман. Истиқлолни бор овозим билан куйлашга, юртим санъатини жаҳонга танитишга тайёрман.

Республикамизда ёшларнинг нафақат мукаммал билим эгаллаши, айни вақтда муайян мутахассисликка эга бўлиб, жамиятда муносиб ўрин топиши учун улкан ишлар амалга оширилаётганини ҳар биримиз ўз ҳаётимиз мисолида кўриб турибмиз. Бугун янгича дунё­қараш, қатъий ишонч ва эътиқодга эга, мус­тақил фикрлайдиган, Ватанимизнинг равнақига муносиб ҳисса қўшишга интиладиган ёшлар сафи тобора кенгайиб бораётгани фикримиз тасдиғидир.

— 2003 йилдан буён «Камолот» ёшлар ижтимоий ҳаракати томонидан топшириб келинаётган «Ўзбекис­тон белгиси» кўкрак нишони ҳам юртимизда ёшларга кўрсатилаётган юксак ишонч ва эътиборнинг яна бир ёрқин намунасидир, — дейди «Ўзбекистон белгиси» кўкрак нишони соҳиби наманганлик Сардор ­Рустамов. — Ўтган йили мен ҳам бу мукофотга лойиқ топилдим. ­Наманган давлат университети магистратурасида таҳсил оляпман. Мақсадим — ёшларга замонавий билим берадиган педагог бўлиб етишиш.

Фестиваль қатнашчиларининг қай бири билан суҳбатлашмайлик, уларнинг барчаси буюк юрт фарзанди эканидан фахрланишини, мамлакатимизда амалга оширилаётган бунёдкорлик ишларининг давомчиси бў­лишга тайёр эканини ҳис қилдик.

 

Гулруҳ ОДАШБОЕВА,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: