Охирги сонда



Кўп ўқилган мақолалар



Долзарб мавзу



Мақолалар архиви

«    Mart 2017   
Du Se Cho Pa Ju Sha Ya
27 28 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2
13.08.2016

ҚОНУН ИЖРОСИ ПАРЛАМЕНТ НАЗОРАТИДА

Олий Мажлис Қонунчилик ­палатасининг Фан, таълим, маданият ва спорт масалалари қўмитасида Ўзбекистон Республикасининг «Геодезия ва картография тўғрисида»ги қонунининг ижроси юзасидан Ер ресурслари, геодезия, картография ва давлат кадастри давлат қўмитаси раисининг ахбороти эшитилди.

Мамлакатимизда саноат, транспорт, қурилиш, энергетика, туризм каби соҳаларнинг жадал ривожланиши геодезия хизматлари ва картография маҳсулотларига бўлган талабни оширмоқда.

«Геодезия ва картография тўғрисида»ги ва бошқа қонунлар, Президентимиз фармонлари, ҳукумат қарорлари ҳамда қонуности ҳужжатлари геодезия ва картография соҳасидаги муносабатларни тартибга солиш учун ҳуқуқий база бўлиб хизмат қилмоқда.

Мамлакатимиз ҳудудларининг мукаммал хариталарини график, рақамли, фотографик ва бошқа шаклларда яратиш, янгилаб туриш ва нашр қилиш ишлари мунтазам амалга оширилмоқда. Бу иқтисодиёт тармоқларининг турли соҳалари талабидан келиб чиқиб, ердан фойдаланувчилар, ҳудудларни харитага тушириш, шаҳарсозлик, мудофаа, геология конлари мониторингини амалга оширишда қўл келмоқда. Умумий географик, сиё­сий-маъмурий, илмий-ахборот берадиган ва бошқа тармоқлараро аҳамиятга молик мавзули харита ва атласлар, ўқув картография қўлланмалари тайёрланиб, нашр этилмоқда.

Ҳозир таълим муассасалари учун атлас ва контур хариталар, Қорақалпоғистон Республикаси ҳамда вилоятларнинг умумий географик ва сиёсий-маъмурий хариталари яратилди. Юртимизнинг диққатга сазовор жойлари, ёдгорликлар ва бошқа объектлар тасвирланган туристик хариталар ўзбек, рус ва инглиз тилларида чоп этилмоқда. Мустақиллигимизнинг 25 йиллиги муносабати билан «Ўзбекистон Республикасининг географик атласи» янги таҳрирда нашр этилди.

— Геодезия ва картография ишларини ўз вақтида рўйхатдан ўтказишни амалга оширмаслик, бажарилган ишлар тўғрисида техник ҳисоботлар ва геодезик пунктлар ҳолати тўғрисидаги маълумотларни тақдим этмаслик, геодезик асбоб-ускуналарни метрологик кўрикдан ўтказиш нормаларини бузиш ҳолатлари учрамоқда, — дейди Олий ­Мажлис Қонунчилик палатаси депутати ­Шуҳрат Турсунбоев. — Хусусан, 2015 йил ва жорий йилнинг биринчи ярим йиллигида ўтказилган режали текширувларнинг аксариятида камчиликлар аниқланган. Жумладан, «Гулис­тон сув лойиҳа», «Сурхон кафолат лойиҳа», «Бухоро йўл лойиҳа» масъулияти чекланган жамиятлари фаолиятида норматив-техникавий ҳужжатлар талабларига риоя этилмаган ҳолатлар кузатилган.

Эшитувда Ўзбекистоннинг умумжаҳон геодезия тармоғига кириш имкониятини яратадиган, миллий манфаатлардан келиб чиқадиган янги давлат геодезик йўлдошли тармоғини яратиш борасида амалга оширилаётган ишларга алоҳида эътибор қаратилди. Шунингдек, амалдаги қонуннинг айрим нормалари геодезия ва картографияга оид ­фаолиятни ташкил этиш, бошқариш ва ривожлантиришнинг замонавий талабларидан ­орқада қолаётганлиги, уни такомиллаштириш зарурлиги тўғрисида фикр-мулоҳазалар билдирилди. Эшитув якунлари бўйича қўмитанинг тегишли қарори қабул қилинди.

 

Сайёра ШОЕВА,

ЎзА мухбири.


Фикр ва мулохазалар

Защита от автоматических сообщений

Сўнгги янгиликлар: