11.08.2016

ДЕПУТАТ СЎРОВИ

жавобсиз қолмаслиги керак

Ушбу рукн остида навбатдаги фикр-мулоҳазалар бериляпти. Ҳурматли газетхонлар ва партиядошлар, яна қайси масалалар бўйича мунозара юритилишини истайсиз? Таклифларингизни кутамиз.

 

Бугунги ижтимоий-иқтисодий ислоҳотлар, ҳаётимиздаги ўзгариш ва янгиланишлар депутатлар зиммасига ҳар қачонгидан масъулиятли вазифаларни юкламоқда. Шунинг учун улар халқ вакили сифатида сайловчилар манфаатларини дадил ҳимоя қилиши лозим.

Маълумки, депутатлар сайлов округида олиб борадиган ишлардан бири қонунлар ва қарорлар бажарилишини назорат қилишда фаол иштирок этишдан иборат. Агар қонунлар ижросида камчиликлар кўзга ташланса, депутат бу ҳолат юзасидан тегишли давлат органларига, уларнинг мансабдор шахсларига мурожаат қилиш ва ўртага қўйилган масалани кўриб чиқишда иштирок этиш ҳуқуқига эга.

Бугунги кунда маҳаллий Кенгашлардаги партиямиз гуруҳлари депутатлик назорати институтидан қандай фойдаланяпти? Электорат вакиллари, сайловчиларни ўйлантираётган масалаларни самарали ўрганиш ва ҳал қилиш учун нима қилмоқ керак?

Навоий вилоятидаги депутатларимизга ана шу саволлар билан мурожаат қилдик.

Муҳаббат ТЕМИРОВА, халқ депутатлари Навоий вилоят Кенгашидаги ЎзХДП гуруҳи аъзоси:

— Биз депутатлик ваколатларидан кенгроқ фойдаланишга ҳаракат қиляпмиз. Масалан, маҳаллий Кенгашлардаги гуруҳларимиз томонидан жорий йилнинг биринчи ярмида 10 масала ўрганиб чиқилди. Уларнинг 3 таси доимий комиссияларда, 3 таси сессияларда муҳокама этилди.

Депутатлик назорати тартибида ўрганиладиган ҳар бир масала учун албатта ишчи гуруҳи тузилади. Дастлаб унинг режаси ишлаб чиқилади. Назоратни шу асосда олиб борамиз. Айрим ҳолларда масалани фақат партия гуруҳида муҳокама этамиз. Муаммо ҳал бўлмаса, кейин уни доимий комиссия ва сессияларга киритамиз.

Ўрни келганда айтиш керакки, аҳоли турмуш фаровонлиги йўлида кўплаб хайрли ишларни амалга ошираётган депутатлар ҳам, депутатлик сўровларига ўз вақтида муносабат билдираётган раҳбарлар ҳам кўпчиликни ташкил этади.

Лекин, афсуски, депутатлик сўровига бефарқ қараётган мутасадди ташкилотлар раҳбарлари ҳам йўқ эмас. Шундай ҳоллар бўладики, сўровга қонунда белгиланган муддат — 10 кундан ошиб кетса ҳам жавоб берилмайди. Айрим пайтлар мансабдор шахслар томонидан депутат сўровидаги масала тўлиқ ўрганиб чиқилмасдан, депутатга шунчаки расмиятчилик учун юзаки жавоб хати юбориш ҳолатлари ҳам учрамоқда. Биз мутасаддилардан сўровларга вақтида жавоб қайтарилишини, амалий чоралар кўрилишини қатъият билан талаб қилишимиз керак, деб ўйлайман.

Нормурод ИСОҚОВ, халқ депутатлари Навоий вилоят Кенгашидаги ЎзХДП гуруҳи аъзоси:

— Депутатлик ваколатларидан самарали фойдаланиш учун, аввало, сайловчилар билан доимий мулоқотда бўлишимиз, одамларнинг кайфияти ва фикрини ўрганиб боришимиз керак. Бу, албатта, ўзига хос мураккаб жараён ҳисобланади.

Айтайлик, бирор масалани доимий комиссия ёки сессия кун тартибига киритишни мўлжалладик. Бунинг учун биринчи нав­батда уни чуқур таҳлил этишга, келиб чиқиш сабабларини ўрганишга ҳаракат қиламиз. Шундан сўнг масалага бевосита алоқадор ва масъул ташкилотларга сўров юборилади. Назорат-таҳлил натижалари, сўровга юборилган жавоблар умумлаштирилиб, партия гуруҳи йиғилишида кўриб чиқилади. Масалани муҳокама қилиш пайтида ҳар бир депутатга сўз берилади, таклифлар айтилади, ўрганилаётган масала сайлов округлари мисолида таҳлил этилади. Атрофлича фикр-мулоҳазалардан сўнггина қарор қабул қилинади.

Партия гуруҳимиз сессияга масала тайёрлаш жараёнида бир вазиятга дуч келиб туради. Биз қайси соҳани ўрганмоқчи бўлсак, шунга алоқадор ташкилотлар учун сўровнома ишлаб чиқамиз. Лекин айрим мутасадди раҳбарлар уларга тўлиқ ва етарлича жавоб беришмайди. Бу эса кўриб чиқилаётган масала бўйича тўлиқ маълумот олишга, вазиятни чуқурроқ ва холис таҳлил қилишга халақит беради. Депутатлар ва давлат органлари, уларнинг мансабдор шахслари қўлни қўлга бериб, бир ёқадан бош чиқариб ишласа, кўплаб муаммолар бартараф этилади.

Яна бир гап. Депутатлик назорати орқали қабул қилинаётган қонунларнинг фуқароларимиз ҳаёт тарзига нечоғлик ижобий таъсир этаётгани билан бирга, яна қандай ҳуқуқий масалаларга талаб борлигини ҳам доимий равишда ўрганиб боришимиз керак. Сессияда ёки доимий комиссия йиғилишида муҳокама этилаётган масала бўйича таклиф киритиш билан вазифамни адо этдим, деган қараш мутлақо нотўғри, деб ўйлайман.

Сайловчиларнинг, халқимизнинг талабига муносиб жавоб бериш учун кўпроқ сайловчилар орасига кириб боришимиз, уларнинг иссиқ-совуғидан хабардор бўлишимиз зарур.

 

«Ўзбекистон овози» мухбири

Лазиза ШЕРОВА

ёзиб олди.



DB query error.
Please try later.