06.08.2016

КАСБ МАҲОРАТИ НАМОЙИШИ

Ҳаммамизга яхши маълумки, турли объектларни ишончли қўриқлаш, фуқароларнинг моддий бойликлари ҳамда хонадонлари дахлсизлигини таъминлаш ИИВ ҳузуридаги қўриқлаш хизмати ходимларининг асосий вазифалари сирасига киради. Бунда уларнинг жанговар ва жисмоний тайёргарлиги, азму шижоати ва касб маҳоратини доимий ошириб бориши муҳим аҳамият касб этади.

Ички ишлар вазирлиги ҳузуридаги «Қўриқлаш» бирлашмаси томонидан Навоий вилоятида мазкур тизим ходимлари ўртасида ташкил этилган кўрик-танлов ҳам айни мақсад йўлидаги саъй-ҳаракатлардан биридир.

Қизғин беллашувларга бой тарзда ўтган танловда қўриқлаш хизмати ходимлари учта йўналиш, яъни «Энг яхши қўриқлаш милиционери», «Энг яхши техник қўриқлаш пункти бошлиғи», «Энг яхши аёл ходима» номинациялари ҳамда умумжамоа ҳисоби бўйича ғолибликни қўлга киритиш учун астойдил ҳаракат қилишди. Танловнинг республика босқичида 45 нафар ходим ва 14 нафар масъул раҳбар қатнашди.

Якуний натижаларга кўра, умумжамоа ҳисобида Тошкент шаҳар ИИББ ҳузуридаги қўриқлаш бошқармаси жамоаси биринчи, Андижон ва Навоий вилоятлари ИИБ ҳузуридаги қўриқлаш бош­қармалари иккинчи ва Қорақалпоғистон Республикаси ИИВ ҳузуридаги қўриқлаш бошқармаси вакиллари учинчи ўринни эгаллашди.

Андижон вилоят ИИБ ҳузуридаги қўриқлаш бош­қармаси милиционери, сафдор Нодирахон Матмусаева «Энг яхши аёл ходим» номинациясида ғолиб деб топилди. Шунингдек, «Энг яхши техник қўриқлаш пункти бошлиғи» йўналишида Тошкент шаҳар ИИББ ҳузуридаги қўриқлаш бошқармаси Техник қўриқлаш пункти бошлиғи, кичик сержант Бекзод Тўхтамуродов муваффақият қозонди. «Энг яхши қўриқлаш милиционери» номинациясида эса биринчи ўринга Тошкент шаҳар ИИББ ҳузуридаги қўриқлаш бошқармаси милиционери, сафдор Марат Худойберганов лойиқ топилди.

Ғолиб ва совриндорларга фахрий ёрлиқ, медаль, диплом ва қимматбаҳо совғалар топширилди.

 

Элмурод ҚЎЗИЕВ,

ИИВ ҳузуридаги «Қўриқлаш» бирлашмаси катта инспектори, катта лейтенант.



DB query error.
Please try later.