04.08.2016

«УМИД ГУЛШАНИ»ДА

орзулар ушалмоқда

Қибрайдаги «Умид гулшани» санаторийсига киришингиз билан ҳаво ўзгарганини сезасиз. Тўйиб-тўйиб нафас оласиз. Чунки бу ерда қишин-ёзин ям-яшил бўлиб турадиган игна баргли дарахтлардан тортиб турфа гуллар барқ уриб яшнаб турибди. Санаторий эса замонавий тиббий ускуналар билан жиҳозланган, даволанаётганлар учун қулай шароит яратилган.

— Санаториймиз 120 ўринга мўлжалланган, йилига уч минг нафарга яқин киши даволаниб, ўз соғлигини тиклаяпти, — дейди муассаса директори Дилором Маҳамадалиева. — Илгари бу ерда фақат у ёки бу сабаб билан фарзанд кўрмаган аёллар даволанишарди. Ҳозир эса давр талабидан келиб чиққан ҳолда, фарзанд кўриш умидида келадиган эр-хотинлардан ташқари терапия, кардиология, нев­рология, лор, эндокрин касалликлар ҳам даволанмоқда.

Муассасада фақат дори-дармон билан эмас, физиотерапия, парафин-азокерит, балчиқли, йодобромли, марваридли, арома ванналар, гидромассаж, кислородли кўпик, доривор ўсимликлар дамламалари ҳамда махсус гимнастика машқ­лари асосида даволашга алоҳида аҳамият берилади.

Муассасада 2012 йилдан фаолият кўрсатаётган олий тоифали шифокор Холида Искандарова 15 йил давомида Тошкент шаҳар соғлиқни сақлаш Бош бошқармасида ишлаган. Унинг қўлида шифо топиб, оналик бахтига муяссар бўлганлар оз эмас.

— Вояга етиб келаётган қизларга ёшлигидан тўғри тиббий тарбия бериб борилмаслиги, уларнинг уялиб, жинсий касалликларини яшириши оқибатида бепуштлик келиб чиқади, — дейди у. — Ўз вақтида аниқланиб, олди олинмаган касаллик янги оила қуриб, фарзанд кўриш ниятида юрган келин-куёвнинг орзу-ҳавасини барбод этади, бахтига зомин бўлади. Шу маънода, ҳозир турмуш қурадиган ёшларнинг тиббий кўрикдан ўтиши кўпгина касалликларни олдиндан аниқлаб, уни даволаш имконини бермоқда.

— Ташхис бўлими энг замонавий тиббий ускуналар билан жиҳозланган, — дейди бўлим бошлиғи, олий тоифали уролог Шокиржон Ашуров. — Шунинг учун муассасага даволаниш учун келганларни қайта кўрикдан ўтказиб, кейин даволашни бошлаймиз. Бу ерда анъанавий қон биохимиявий таҳлилидан таш­қари, иммунофермент анализатор орқали текширилади. Паст ва юқори частотали физиотерапевтик ускуналар, озонатерапия, лазеротерапия воситасида ўтказаётган муолажаларимиз яхши натижа беряпти.

Бу ерда гемоанализатор ускунаси орқали эркаклар пушти таҳлил қилинади, аёллар жинсий органидаги касаллик ва хавфли ўсимталарни эрта аниқлаш учун колоскопия, BTL лазеротерапия ускунаси орқали цитологик таҳлил ўтказилади. Сув билан даволаш бўлимида сауна, ёпиқ сув ҳавзаси мавжуд бўлиб, сув остида уқалаш, шифобахш балчиқ билан даволаш муолажалари амалга оширилади.

— Биз Қорақалпоғистондан келганмиз, — дейди опа-сингил Тамара ва Гулжаҳон Янгибоевалар. — Умуртқа чурраси, бош, қўл-оёқ оғриғи азоб берарди. Барака топсин, даволовчи шифокор Идрис Мардонақуловнинг қўли енгил экан, ҳозир касалдан фориғ бўлиб, ўзимизни яхши ҳис қиляпмиз.

— Умида Мағрупова Чирчиқ шаҳридан. У ҳали нисбатан ёш бўлишига қарамасдан, умуртқа чурраси, асабийлашишдан азият чекиб келган, — дейди олий тоифали невропатолог Идрис Мардонақулов. — Муолажалардан кейин аҳволи яхшиланди.

— Қандли диабет, қўл-оёқ бўғимларининг қақшаб оғриши уйқу бермасди, — дейди сурхондарёлик Саодат Абдуллаева. — Муолажалардан ташқари, Холида Искандарова раҳбарлигида махсус гимнастика билан шуғулланиб, дардимга шифо топдим.

— Санаторийда ошқозон-ичак касаллиги, бўйин ва елкалар оғриғи бўйича даволандим, — дейди самарқандлик Турсуной Ортиқбоева. — Ўзимни ҳаддан ташқари беҳол сезардим, шу ерга келиб, онадан янги туғилгандай бўлдим. Барча шифокорлар ширинсўз, эътиборли. Уларга катта раҳмат.

Даволаш масканида Иккинчи жаҳон уруши ва меҳнат фахрийлари учун алоҳида хоналар ажратилган бўлиб, ўтган йили бу ерда 500 нафардан зиёд нуроний ўз соғлигини тиклади. Бу йил ҳам ана шундай хайрли ишлар давом эттирилмоқда.

Санаторийда маданий-маърифий ишларга алоҳида эътибор қаратилади. Тўрт мингдан зиёд китоб фондига эга бўлган кутубхонада китоб мутолаа қилишдан ташқари кундалик газеталар билан танишиш мумкин. Даволанувчилар талабига қараб, шоир ва ёзувчилар, санъаткорлар билан учрашувлар уюштирилади. Спорт билан шуғулланадиганлар учун жисмоний тарбия хонаси замонавий тренажёрлар билан жиҳозланган, соғломлаштириш майдончалари, бутун бошли спорт комплекси улар ихтиёрида.

Санаторийда даволанувчиларга белгиланган ташхис асосида парҳез таомлар тайёрланади. Бундан ташқари, шифобахш гиёҳлардан тайёрланган шарбат ва ичимликлар муҳайё. Ўн тўққиз нафар олий тоифали шифокор, юз нафарга яқин ҳамшира ва ишчи-ходимлардан иборат жамоа беморлар, дам олувчилар соғлигини тиклашда тиббиётнинг энг самарали усулларидан фойдаланган ҳолда меҳнат қилмоқда.

 

Нуруллоҳ ДОСТОН,

«Ўзбекистон овози» мухбири.



DB query error.
Please try later.