04.08.2016

XXXI ЁЗГИ ОЛИМПИЯ ЎЙИНЛАРИДА

мамлакатимиз шарафини етмиш спортчи, жумладан, 23 нафар хотин-қиз ҳимоя қилади

Эртага Бразилиянинг Рио-де-Жанейро шаҳрида XXXI ёзги Олимпия ўйинлари бошланади.

Ер куррасининг ҳар тўрт йилликдаги энг нуфузли спорт байрамида иштирокчи давлатлар сони рекорд кўрсаткичга етиши кутилмоқда. 5-21 август кунлари ўтказиладиган баҳсларда дунёнинг 207 давлатидан 10500 дан зиёд спортчи ўз маҳоратини намойиш этади.

Мусобақалар дастуридан спортнинг 33 тури жой олган бўлиб, жами 306 комплект медаллар ўйналади.

Олимпия ўйинларида мамлакатимиз вакиллари академик эшкак эшиш, бадиий гимнастика, байдарка ва каноэда эшкак эшиш, бокс, дзюдо, енгил атлетика, оғир атлетика, спорт гимнастикаси, стол тенниси, сузиш, таэквондо (WTF), теннис, трамполин, ўқ отиш, эркин ва юнон-рум кураши каби спорт турлари бўйича қатнашади. Ушбу мусобақаларда Олимпия ўйинлари, жаҳон чемпионатлари ғолиб ва сов­риндорлари бўлган тажрибали спортчиларимиз қаторида кўплаб ёш истеъдодлар борлиги мамлакатимиз спорт салоҳияти юксалиб бораётганидан далолат беради. 

Шуни ҳам алоҳида айтиш керакки, бокс бўйича аёллар ўртасидаги «жанг»ларда илк бор вакилимиз қатнашади. Ёд­горой Мирзаева (51 кг) юртимиз шарафини ҳимоя қилиб, рингга чиқади. Шунингдек, мусобақа дастуридан жой олган эркаклар ўртасидаги стол тенниси баҳсларида ҳамюртимиз биринчи бор ёзги Олимпия ўйинларида иштирок этади. Бундай шарафга Зоҳид Кенжаев муяссар бўлиб турибди.

Бадиий гимнастика бўйича Луиза Ғаниева, Валерия Давидова, Анастасия Сердюкова, Самира Амирова, Марта Растобурова, Зарина Қурбоновалардан иборат мамлакатимиз терма жамоаси аъзолари илк бор олимпиа­данинг жамоавий мусобақаларида ўз маҳоратларини намойиш этишади.

Яна бир аҳамиятли жиҳати, моҳир гимнастикачимиз, Барселона олимпиадаси чемпиони ва Пекин олимпиадаси кумуш медали совриндори Оксана Чусовитина учун бу еттинчи олимпиада саналади. Ҳали бирорта ҳам спортчи ушбу спорт тури бўйича бундай натижага эришмаган.

Бу йилги XXXI ёзги Олимпия ўйинлари Ватанимиз мус­тақиллигининг 25 йиллиги арафасида ташкил этилаётгани ҳам ўзига хос маъно-мазмунга эга. 

Спортчиларимиз бу йилги ёзги Олимпия ва Пар­алимпия ўйинларида «Гўзал ва бетакроримсан, муқаддас Ватаним, жоним сенга фидо, Ўзбекистоним!» деган шиорни қалбига жо айлаб, Ватан шарафини ҳимоя қилишади.

 

Эркин ХОЛБОБО,

«Ўзбекистон овози» мухбири.

 

 

XXXI ЁЗГИ ОЛИМПИЯ ЎЙИНЛАРИ ЧЕМПИОНИ ВА СОВРИНДОРЛАРИ МУНОСИБ ТАҚДИРЛАНАДИ

Ўзбекистон Республикаси Президентининг 2016 йил 12 июлдаги қарорига мувофиқ, мамлакатимиз спортчилари Рио-де-Жанейро олимпиадасида эришадиган ғалабалари учун муносиб тақдирланади:

Олтин медаль соҳиби — 200000 АҚШ доллари

Кумуш медаль соҳиби — 100000 АҚШ доллари

Бронза медаль соҳиби — 75000 АҚШ доллари.



DB query error.
Please try later.