04.08.2016

АМАЛИЁТ ВА ТАЖРИБА ЭЪТИРОФИ

Бухорода «Энг намунали фуқароларнинг ўзини ўзи бошқариш органлари» республика кўрик-танлов­ининг вилоят бос­қичи бўлиб ўтди. Унда 13 маҳалла жамоаси ўзаро баҳслашди.

«Гўзал ва бетакроримсан, муқаддас Ватаним, жоним сенга фидо, Ўзбекистоним!» шиори остида ташкил этилган тадбирда Президентимиз раҳнамолигида демократик ислоҳотларни чуқурлаштириш ва фуқаролик жамиятини ривожлантириш борасидаги ислоҳотлар жараёнида фуқароларнинг ўзини ўзи бош­қариш органлари фаолиятини янада такомиллаштириш, уларнинг ҳуқуқ ва ваколатлари доирасини кенгайтиришга алоҳида эътибор қаратилаётгани таъкидланди.

Иштирокчилар маҳаллалар фаолиятига оид иш тажрибасини слайдлар орқали намойиш этди. Маҳалла раиси ва мутахассисларининг билим савияси, дунёқараши, соҳага оид қонунчилик ҳужжатларини қай даражада билиши, кундалик ҳаётда, иш фаолиятида учраб турадиган муаммоли вазиятларга нечоғли ечим топа олиши савол-жавоблар орқали баҳоланди.

Ғиждувон туманидаги «Хатча» маҳалла фуқаролар йиғини ғолиб деб топилди ва танловнинг мамлакат босқичига йўлланма олди.

— Ҳудудимизда қарийб 2 минг 850 нафар аҳоли истиқомат қилади, — дейди йиғин раиси Ҳусан Ҳосилов. — Оилаларда юзага келадиган муаммоларни жамоатчилик, асосий фаолият йўналишлари бўйича комиссиялар ва тегишли давлат ташкилотлари билан ҳамкорликда ҳал этамиз. Шунинг учун ҳудудда ижтимоий-маънавий муҳит барқарор, оилавий ажримларнинг олди олинмоқда. «Оила — маҳалла — таълим муассасаси» ҳамкорлиги яхши йўлга қўйилгани боис ёшлар таълим-тарбиясидаги камчиликлар ўз вақтида бартараф этилаётир.

Тадбир доирасида ташкил этилган фотокўргазмалар, плакат ва стендлар, ҳунармандлик буюмлари, миллий либослар намойиши фуқароларнинг ўзини ўзи бошқариш органларининг ҳудудларда тадбиркорликни қўллаб-қувватлаш, аҳоли бандлигини таъминлашга кўмаклашиш борасидаги фаолияти билан танишиш имконини берди.

Тадбирда Бухоро вилояти ҳокими М.Эсонов сўзга чиқди.

 

Э.ЁДГОРОВ,

ЎзА мухбири.



DB query error.
Please try later.