26.07.2016

ЭЛЕКТРОТЕХНИКА САНОАТИНИ РИВОЖЛАНТИРИШ

масалалари муҳокама этилди

Олий Мажлис Қонунчилик палатасининг Саноат, қурилиш ва савдо масалалари қўмитаси пойтахтимиздаги Халқаро ҳамкорлик марказида «Ўзбекистонда электротехника саноатининг ривожланиши: ҳолати ва истиқболлари» мавзусида конференция ўтказди.

Қонунчилик палатаси депутатлари, вазирликлар, идоралар вакиллари, «Ўзэлтехсаноат» акциядорлик компанияси таркибига кирувчи корхоналар раҳбарлари иштирок этган тадбирда мустақиллик йилларида электротехника саноатининг вужудга келиши ва шаклланиш босқичлари, тармоқнинг бугунги кундаги ҳолати ва истиқболлари билан боғлиқ масалалар атрофлича муҳокама этилди.

— Электротехника саноати юртимизда жадал ривожланаётган тармоқлардан бири ҳисобланади, — дейди Олий Мажлис Қонунчилик палатаси депутати, ЎзХДП фракцияси аъзоси Акмал Умаралиев. — 2005 йилда тармоқда маҳсулот ишлаб чиқариш ҳажми 80 миллиард сўмни ташкил этган бўлса, 2015 йилда бу кўрсаткич 1 триллион 300 миллиард сўмга етди.

Мамлакатимизда саноат тармоқларини диверсификациялашга қаратилган изчил ислоҳотлар натижасида замонавий маиший техника, жумладан, телевизор, кир ювиш машинаси, электр печ ва плита, кондиционер, совутгич, газ ва электр плиталарнинг янги моделларини ишлаб чиқарувчи ўнлаб корхоналар ташкил этилди.

Ҳаммамизга маълумки, маиший техника маҳсулотларининг сифати ва ишлаб чиқариш ҳажми ортиши аҳоли турмуш шароитларини яхшилаяпти, уй бекаларининг оғирини енгил қиляпти.

— «Ўзэлтехсаноат» компанияси ҳозирги кунда 40 дан ортиқ электротехника корхоналарини ўз таркибида бирлаштирган, — дейди компания раҳбари ўринбосари Жаҳонгир Исмоилов. — 10 корхона 2 минг­дан зиёд турдаги кабел-сим маҳсулотлари, 6 корхона 100 дан ортиқ трансформатор ва электротехника, 21 корхона 30 хилга яқин маиший техника маҳсулотлари ишлаб чиқармоқда.

2015 йилда ва жорий йилнинг биринчи ярмида тармоқ корхоналари томонидан қиймати 1,5 триллион сўмдан ортиқ маҳсулот ишлаб чиқарилиб, иқтисодиётнинг турли тармоқларига, жумладан, энергетика, нефть ва газ, тоғ-кон саноатларига, ижтимоий соҳа объектларига етказиб берилди.

27 корхона томонидан ишлаб чиқарилаётган рақобатбардош маҳсулотлар ­Мустақил Давлатлар Ҳамдўстлиги ва бош­қа хорижий мамлакатларга экспорт қилинмоқда.

Ўтган йили «Оникс Ташкент» масъулияти чекланган жамиятида шиша идишларни ишлаб чиқаришни модернизациялаш ва технологик янгилаш, Зомин туманида «Самсунг» бренди остида компьютер мониторларини ишлаб чиқариш, «Мотор заводи» акциядорлик жамиятида маиший техникалар учун логистика маркази ташкил қилиш лойиҳалари амалга оширилди.

2016-2019 йиллар давомида ҳудудларни иқтисодий ривожлантириш ва қишлоққа саноатни олиб киришни жадаллаштиришга қаратилган 100 га яқин инвестициявий лойиҳа амалга оширилиши режалаштирилмоқда. Натижада 5 мингга яқин янги иш ўрни яратилиши кўзда тутилган.

Конференциядаги муҳокамалар давомида тармоқда таркибий ўзгаришларни янада чуқурлаштириш, саноат ишлаб чиқаришни модернизациялаш ва диверсификациялаш, ички ва ташқи бозорда рақобатбардош, замонавий электротехника маҳсулотларини ишлаб чиқаришни кўпайтириш саъй-ҳаракатларини изчил давом эттириш лозимлиги таъкидланди.

Депутатлар томонидан соҳанинг қонунчилик асослари ва кадрлар тайёрлаш тизимини такомиллаштириш, замонавий корпоратив бошқарув усулларини жорий этишни жадаллаштиришга доир таклиф-мулоҳазалар билдирилди.

 

Гулруҳ ОДАШБОЕВА,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: