23.07.2016

ҚАДРИ ВА ҚАДДИ БАЛАНД

Алишер Навоий номидаги Ўзбекистон миллий кутубхонасида Ўзбекистон ХДП Марказий Кенгаши Хотин-қизларнинг ижтимоий-сиёсий фаоллигини ошириш сектори томонидан «Мустақиллик йилларидаги ислоҳотларнинг хотин-қизлар ижтимоий-сиёсий фаоллигини оширишдаги аҳамияти» мавзусида тадбир ўтказилди.

У ерда сўзга чиққанлар истиқлол йилларида хотин-қизларга яратиб берилган имкониятлар ҳақида атрофлича фикр юритишди. Хотин-қизларга доимий эътибор берилаётгани, уларнинг ҳуқуқ ва манфаатлари таъминланаётгани, оналик ва болалик ҳимоя қилинаётгани, қиз болалар замонавий касб-ҳунар эгаллаб, ҳаётда муносиб ўрин топаётгани алоҳида таъкидлаб ўтилди.

Мустабид замонида ҳаммадан ҳам кўра оналаримиз, опа-сингилларимиз кўпроқ жабр кўргани, оғир ишларга оммавий сафарбар этилгани, бола тарбияси учун қулай шароит бўлмагани ҳақидаги тарихий мисоллар кўпчиликни ҳаяжонга солди.

— Истиқлол туфайли, аввало, миллий давлатчилигимиз тикланди, жаҳондаги мустақил ва суверен давлатлар қаторидан муносиб ўрин эгалладик, — деди Ўзбекистон ХДП Марказий Кенгаши бўлим мудири Назира Матёқубова. — Бугунги кунда биз танлаган ўзимизга хос ривожланиш йўлининг нақадар тўғри экани хотин-қизларнинг ҳаёт тарзида ҳам ўз аксини топмоқда.

Оналик ва болаликни муҳофаза қилиш борасида олиб борилаётган ислоҳотлар натижасида турли хасталиклар, юқумли ва ирсий касалликлар сезиларли даражада камайди. Ўртача умр кўриш ёши аёлларда 75 дан ошди. Оналар ва болалар ўлими кўрсаткичлари ҳам бир неча баробарга пасайди. Бир сўз билан айтганда, хотин-қизларнинг турмуш маданияти, дунёқараши бутунлай ўзгарди. Улар энди нафақат она ёки уй бекаси, балки барча соҳаларда фидойилик кўрсатаётган фаол шахсга айланди.

Бу жараёнда ЎзХДП «Фаол аёллар» қанотининг ҳам муносиб ўрни бор, албатта. Хотин-қизларнинг ижтимоий-сиёсий фаолигини ошириш масалалари сектори томонидан ташкил этилаётган тадбирлар, турли лойиҳа ва акциялар хотин-қизларнинг ижтимоий-сиёсий фаоллигини оширишга, мушкулини осон қилишга хизмат қилмоқда. Ўз ишини бошламоқчи бўлганларга яқиндан кўмак бериляпти. Фарзанд тарбияси билан банд оналар учун қўшимча қулайликлар яратилмоқда. Бу ишлар келгусида янада такомиллаштирилади.

Республика хотин-қизлар қўмитаси вакили жойлардаги қўмиталарнинг ЎзХДП «Фаол аёллар» қаноти билан ҳамкорликда олиб бораётган ишлари тўғрисида тўхталди.

Тадбир қатнашчилари ҳам мавзу юзасидан ўз фикр-мулоҳазаларини, таклифларини билдиришди.

 

ЎзХДП Марказий Кенгаши

матбуот хизмати.



DB query error.
Please try later.