12.07.2016

ЕТУК ОФИЦЕР ВА СЕРЖАНТ КАДРЛАР

тайёрланмоқда

Мудофаа вазирлиги томонидан офицер ва сержант кадрлар тайёрлашнинг устувор йўналишларига бағишланган матбуот анжумани ташкил этилди. Унда соҳа мутахассислари олий ҳарбий таълим муассасалари, Сержантлар тайёрлаш мактаблари фаолияти ва уларнинг ҳарбий кадрларни тайёрлашдаги ўрни ҳақида маълумот беришди.

Ҳамма нарса таққосланганда билинади. Шу маънода бундан йигирма беш йил аввалги армиямизни бугунгиси билан қиёсласак, ер билан осмонча фарқ борлигини кўриш мумкин. Миллий армиямиз энг замонавий қурол-яроғ ва техника билан таъминланганлиги, ҳар қандай машаққатли синовларни шараф билан енга оладиган етук ҳарбийларимиз етишиб чиққанлиги фикримиз тасдиғидир.

Маълумки, мустақиллигимизнинг илк кунларидан ҳарбий кадрлар тайёрлаш масаласига алоҳида эътибор қаратиб келинмоқда. Шуни қувонч билан қайд этиш лозимки, ҳозирда Қуролли Кучларимиз учун зарур бўлган барча мутахассисликлар бўйича кадрлар ўзимизда тайёрланмоқда. Фахрлансак арзийдиган олий ҳарбий таълим муассасаларимиз бор.

Маълумот ўрнида айтиш керакки, 1990 йилда мамлакатимиз ҳудудида жойлашган учта олий ҳарбий билим юртида фақат учта йўналиш бўйича мутахассис офицер кадрлар тайёрланиб, маҳаллий офицерлар юртимиздаги ҳарбий кадрларнинг атиги 0,6 фоизини ташкил этарди. Бугунги кунда Қуролли Кучлар академиясида 7 та, Мудофаа вазирлигининг олтита олий ҳарбий таълим муассасасида 28 йўналиш ва мутахассислик бўйича юқори малакали офицер кадрлар ҳамда Сержантлар тайёрлаш мактабларида 26 йўналиш ва мутахассислик бўйича сержантлар тайёрланмоқда.

Матбуот анжуманида алоҳида қайд этилдики, мамлакатимизда ҳарбий кадрларни тайёрлаш, қайта тайёрлаш ва малакасини оширишнинг замон талабларига жавоб берадиган самарали тизими яратилган. Бу эса миллий армиямиз сафларини пухта тайёргарликка эга, интеллектуал жиҳатдан етук, стратегик фикрлай оладиган мутахассислар билан тўлдиришда кенг имкониятлар яратмоқда.

 

Равшан ШОДИЕВ,

«Ўзбекистон овози» мухбири.



DB query error.
Please try later.