28.06.2016

ЭЗГУ ИШЛАРГА ҚОДИР ЁШЛАР

Гулмира Эгамбердиева Фарғона давлат университетининг иккинчи курс талабаси. У ЎзХДП «Истиқбол» ёшлар қаноти фаолларидан бири. Ҳудудий партия ташкилотида «Ёш сиёсатчи – 2016» танлови ўтказилишида ташкилотчилик қилди. Ўзи ҳам иштирок этди ва ғолиб бўлди. Сўнгра шаҳар бос­қичида унинг ижтимоий лойиҳаси юқори баҳо олди. Мана, энди у вилоят босқичида 19 нафар тенгдош, маслакдошлари сафида яна беллашади.

– Мен лойиҳамни «Ҳу­қуқ ва Билим» деб номладим. Ҳуқуқий давлатни бун­ёд этиш учун жамият аъзолари билимли бўлиши керак. Лойиҳа ғояси соддадек кўринса-да, менимча, у демократик тамойилларни ифодалайди, – дейди Гулмира Эгамбер­диева. – Мен ўз лойиҳам асосида бошланғич партия ташкилотида амалий ишларни бошлаб юборганман.

Гулмира ҳар бир жамоа­да — у ишлаб чиқариш корхонаси бўладими ё ўқув юрти, албатта ёш­ларнинг ҳуқуқий саводхонлигини оширувчи тўгарак, клуб, ўқув-семинари каби шакллардаги уюшмалар тузишни, унинг дас­тури ва амалга ошириш услубларини таклиф этди. Ҳайъат аъзолари ва бошқа иштирокчилар Гулмиранинг лойиҳаси ҳар бир бандига катта қизиқиш билан қаради.

Риштон тумани ҳокимлиги ҳузуридаги «Ягона дарча» маркази мутахассиси Жавоҳир Неъматов лойиҳаси ҳам барчанинг эътиборини тортди. У ёшларни халқ анъаналари, маъна­вия­ти руҳида тарбиялашнинг ўзига хос йўлини таклиф этди.

Мустақиллик йилларида Фарғонада тарихий бунёдкорликлар амалга оширилди. Жавоҳир бу мўъжизавий жараён гувоҳлари, иштирокчиларининг жонли хотиралари, ҳужжатлар, фото-кино лавҳаларни йиғиб, музей ташкил этишни таклиф қилди. Унинг фикрича, бу музей ҳатто сайёҳлар учун ҳам қизиқарли бўлади. Жавоҳирнинг лойиҳасида таклифнинг иқтисодий томонлари ҳам ишлаб чиқилган. Шунинг учун ҳам муҳокама чоғида ҳайъат аъзолари «Бу ижтимоий лойиҳами ёки бизнес-лойиҳами», дея бироз баҳслашишди.

Биргина Фарғона вилоятида жорий йилда ушбу танловда иштирок этиш истагини билдирган ёш­лар сони 1000 нафардан ошди. Шундан 225 нафари бошланғич партия ташкилотларида ғолиб бўлди.

Иштирокчилар «Билимдон сиёсатчи» шартида Ўзбекис­тон Республикаси Конституцияси, Президент асарлари, сиё­сий партиялар, парламент, сайловлар, ёшлар масалаларига оид қонунлар, Оила, Меҳнат кодекслари, Ўзбекистон Халқ демократик партиясининг Устав ва Дастури юзасидан тузилган саволларга атрофлича жавоб беришди.

– Танлов ёшларни ватанпарварлик, истиқлол ғоялари, миллий қадриятлар руҳида тарбиялашда муҳим роль ўйнайди ва вилоятимизнинг барча йигит-қизларини бирлаштиради, – дейди ЎзХДП вилоят кенгаши раиси вазифасини бажарувчи Дилбар Мамажонова. – Улар мақсад сари интилган, фаол, она юртнинг ёруғ келажаги йўлида эзгу ишларга қодир ёшлардир.

Ўтказилган кўрик-танлов ёшларнинг мустақиллик ғояларига садоқатини шакл­лантиришга, йигит-қизларнинг ҳуқуқий, ижтимоий-сиёсий билим даражаси, фаоллигини оширишга кўмаклашади, албатта. Танловнинг ҳар бир иштирокчиси ўз юртининг ривожланиши жараёнларига дахлдорлик ҳиссини сезмоқда. Уларнинг лойиҳаларда акс этган янги қарашлари, ижодий ёндашуви республикамизнинг белгиланган юксак мақсадлар сари илгарилашида муҳим аҳамиятга эга.

Беллашув якунида Фар­ғона санъат коллежи иккинчи босқич талабаси Моҳидил Қурбонова ғолиб деб топилди ва республика танловига йўлланма олди.

 

Муҳаммаджон ОБИДОВ,

«Ўзбекистон овози» мухбири.



DB query error.
Please try later.