25.06.2016

ТИББИЁТ МАРКАЗИ

замон талабларига мос равишда қайтадан бунёд этилди

Самарқанд вилоят болалар кўп тармоқли тиббиёт марказида олиб борилаётган кенг кўламли ишлар, оналик ва болаликни муҳофаза қи­лиш борасидаги инвестицион дастурлар давлатимиз томонидан соғлом авлодни вояга етказиш йўлида кўрсатилаётган ғамхўрликнинг амалий натижасидир.

Мазкур марказ бош врачи, тиббиёт фанлари доктори, профессор Мамат­қул Азизов шундай дейди:

— Мамлакатимиз Президентининг Инвестиция дастури тўғрисидаги қарорига биноан икки йил муқаддам қайта тўлиқ реконструкция қилина бошлаган Самарқанд вилоят болалар шифохонаси кўп тармоқли тиббиёт марказига айлантирилиб, шу вақт мобайнида 390 ўринга эга бўлган учта корпус ишга туширилди, шундан 300 ўрин она ва бола бирга ётадиган палаталарга ажратилди.

Марказда Соғлиқни сақлаш вазирлиги ташаббуси билан неонатолог хирургия ҳудудий бўлими ташкил этилиб, бу ерда нуқсон билан туғилган чақалоқлар жарроҳлик йўли билан даволанади. Илгари реанимация бўлимига бемор чақалоқ ётқизилса, ёнига онаси қўйилмасди. Тажриба шуни кўрсатдики, она бола ёнида бўлса, гўдак тинч ётар, тезроқ шифо топар экан. Ана шундай психологик ҳолатлар эътиборга олиниб, ушбу бўлимга она чақалоғи билан ётқизилаяпти.

— Инвестиция дастури бўйича ишлар қандай ­боряпти?

— Гўдакнинг ҳаёт-мамотини белгилаб берадиган, кўчма портатив аппаратлар, юқори технология­ли тиббиёт ускуналарини Германиядан келтирдик. Жорий йилда стационар ускуналар олиб келинади. Ҳар бир тиббий ускунани қўллаш бўйича шифокорларимиз Германиядан келган мутахассислар томонидан дастур доирасида ўқитилмоқда ва мониторинг ўтказилмоқда.

Болалар касаллигининг асосий йўналишлари бўйича ихтисослаштирилган, юқори технологияли диаг­нос­тика, даволаш ва профилактика тиббий ёрдами кўрсатишга бўлган эҳтиёж қамраб олинди.

— Биноларни қайта реконструкция қилишда беморлар учун бир қатор қулайликлар ҳам яратилибди...

— Ҳа, илгари беморни бир бинодан иккинчисига олиб ўтиш учун ташқаридан айланиб келинарди. Энди бир корпусдан иккинчисига туташган кенг ва ёруғ, жуда ўнғай коридорлар шифокорларнинг ҳам, беморларнинг ҳам оғирини енгил қилмоқда. Реанимация бў­лимида олти операция блоки бўлиб, амалиётга муҳтож бўлган беморлар ана шу коридор орқали етказиб келинади. Ҳозир тажрибали жарроҳларимиз томонидан бир кеча-кундузда ўртача 20-25 тагача тезкор амалиётлар ўтказиш имконияти яратилди. Бу жуда катта гап.

Марказда яратилган қу­лайликларни кўриш учун неонатология бўлимига кирдик.

— Мана бу чақалоқ 900 грамм вазн билан туғилган эди, — дейди биринчи тои­фали врач, неонатология бўлими мудири ­Азиза Мирмуҳамедова ойнаванд палатадан махсус даволаш ускунаси ичида сақланаётган гўдакни кўрсатиб. — 19 кун ичида унинг вазни 200 граммга ошди, онани эмиш рефлекси пайдо бўлди. Бунда олий тоифали ҳамширалар — Ирода Хуррамова ҳамда Дилноза Қурбоноваларнинг хизмати катта.

— Фарзандим туғилганига бир ой бўлганида, унинг терисида сариқлик кўпайиши кузатилди, — дейди ­Дилафрўз Жабборова. — Шифокорларга раҳмат, замонавий фототерапея ёрдамида боламнинг дардига малҳам бўлишди.

— Бизга қўшни вилоятлардан ҳам мурожаат қилиб туришади, — дейди ҳудудий неонатолхирурглик бўлими мудири Ҳамза Хушбоқов. — Жиззахлик Дилрабо Ўзбекова киндигида ўсимтаси бўлган икки ойлик чақалоғи билан келган эди. Илғор тиббий технологиялар воситасида уни жарроҳлик амалиёти билан олиб ташладик. Ҳозир чақалоқ ўзини яхши ҳис этяпти. Ёки жомбойлик Инобат Бобонованинг уч ойлик чақалоғи туғма нуқсон билан олиб келинган эди. У ҳам шу ерда шифо топиб, даволаниб кетди.

Марказдаги барча бинонинг ички ва ташқи қурилишлари энг замонавий тиббиёт талаблари асосида амалга оширилган бўлиб, ҳозир бу ерда ошхона, кирхона, дезокамера сингари қўшимча бинолар қурилиши давом этяпти.

 

Нуруллоҳ ДОСТОН,

«Ўзбекистон овози» мухбири. 



DB query error.
Please try later.