25.06.2016

ҚИШЛОҚДА ХИЗМАТ КЎРСАТИШ ВА СЕРВИС

Ўзбекистон Халқ демократик партияси Қашқадарё вилоят ва Қарши туман кенгашлари ташаббуси билан вилоят ҳокимлигининг ҳудудларни комплекс ривожлантириш йиғма бошқармаси, халқ депутатлари вилоят ва туман Кенгашларидаги партия гуруҳлари ҳамда Фуқаролик жамияти шаклланишини мониторинг қилиш мустақил институти ҳудудий бўлинмаси ҳамкорлигида қишлоқда хизмат кўрсатиш ва сервис соҳасини ривожлантириш мавзусига бағишланган давра суҳбати ташкил этилди.

Бугунги кунда халқимиз турмуши фаровонлашгани сайин хизмат кўрсатиш ва сервис соҳасига эҳтиёж ҳам ортиб бормоқда. Яна бир эътиборли жиҳати, иқтисодиётнинг мазкур тармоғи кўп маблағ талаб этмайди, шунингдек, банд­ликни таъминлашда муҳим аҳамият касб этади. Шу боис, мамлакатимизда мазкур соҳани ривожлантиришга катта эътибор қаратилмоқда.

Йиғилишда қайд этилдики, чекка ҳудудларда қурилиш, транспорт, молия, банк ва ахборот-коммуникация соҳаларида хизматлар кўрсатиш учун фойдаланилмаётган имкониятлар бор. Иш бошлаш ниятидаги ёшларни молиявий жиҳатдан қўллаб-қувватлаш, уларга тўғри йўл кўрсатиш орқали ҳудудларда хизмат кўрсатишнинг мазкур турларини ривожлантириш бугунги кунда ҳал қилувчи аҳамиятга эга.

— Партиямизнинг 2015-2019 йилларга мўлжалланган Ҳаракат дастурида хизмат кўрсатиш ва сервис соҳаларини ривожлантириш юзасидан муҳим вазифалар белгиланган, — дейди Ўзбекис­тон ХДП Қарши туман кенгаши раиси Замира Азизова. — Шундан келиб чиқиб, жойларда электорат вакилларига ҳуқуқий ва амалий ёрдам кўрсатиш, аҳолига хизмат кўрсатиш ва сервис соҳасидаги мавжуд солиқ ва бош­қа имтиёзлар ҳақида атрофлича маълумотлар бериш, коллеж битирувчиларини ўз мутахассислиги бўйича касбга йўналтириш ҳамда янги иш ўринлари очилишига шароит яратиш мақсадида бугунги тадбирни ташкил этдик.

Давра суҳбати давомида олис ҳудудларда хизмат кўрсатиш ва сервис соҳасини янада ривожлантириш бўйича таклифлар ўртага ташланди. Сўзга чиққанлар жойларда хизмат кўрсатишга бевосита алоқадор мутасадди ташкилот ва идоралар раҳбарлари билан амалий мулоқот ва давра суҳбатлари ташкил этиш бўйича ўз фикр-мулоҳазаларини билдирди.

Иштирокчиларга бизнес-режалар тузиш, истиқболли бизнес-лойиҳалар ишлаб чиқиш бўйича тавсиялар берилди.

 

Музаффар ТУРОПОВ



DB query error.
Please try later.