23.06.2016

КУН ТАРТИБИДА — АРХИВ ИШИ

«Ўзархив» агентлиги томонидан «Миллий архив фондининг нодавлат сегментини ривожлантиришнинг долзарб масалалари»га бағишланган матбуот анжумани ташкил этилди.

Унда Миллий архив фондининг давлатга тегишли бўлмаган қисмини бойитиб бориш, уларни тизимли асосда жамлаш, ҳисобини олиб бориш, сақлаш ҳамда фойдаланишни ташкил этиш масалалари муҳокама этилди. Шу билан бирга, республикада давлат архивлари тармоғига кирмайдиган, лекин қонунчиликка мувофиқ тарзда нодавлат архивлари сифатида қайта ташкил этилиши лозим бўлган архивлар фао­лиятига ҳам алоҳида эътибор қаратилди.

Бугунги кунда республика бўйича архив муассасаларида жами 37 700 дан ортиқ фонд мавжуд бўлиб, уларнинг таркибидаги ҳужжатлар сони 8,6 миллион сақлов бирлигини ташкил этади. Шундан Миллий архив фондининг нодавлат қисми 473 500 дан ортиқ сақлов бирлигига тўғри келади. Архив муассасаларидаги 5886 шахсий фондда 374907 сақлов бирлигидаги ҳужжатлар мавжуд.

«Архив иши тўғрисида»ги Қонуннинг қабул қилиниши республика архив муассасалари фаолиятида ижобий ўзгаришларга асос бўлди. Қонунда Миллий архив фонди тушунчаси ва уни архив ҳужжатлари билан мунтазам равишда тўлдириб боришни таъминлаш борасида янги тартиблар киритилди.

Қонунга кўра, Ўзбекистон Республикаси Миллий архив фонди давлатга тегишли ва давлатга тегишли бўлмаган қисмлардан ташкил топган бўлиб, унга киритилган архив ҳужжатлари халқимиз маданий меросининг ажралмас қисмидир ва уларнинг сақлов муддати чекланмаган, яъни доимий сақланади. Нодавлат корхоналар, муассасалар ва ташкилотлар фаолияти натижасида яратилган архив ҳужжатлари, шунингдек, жисмоний шахс­ларнинг шахсий архив ҳужжатлари Миллий архив фондининг давлатга тегишли бўлмаган қисмини ташкил этади.

Алоҳида қайд этиб ўтиш жоизки, агар фуқаро томонидан давлат архивига топширилаётган ҳужжатлар тарихий, маънавий, илмий ва маданий аҳамиятга эга бўлса, бу ҳужжатлар шахсий фонд сифатида расмийлаштирилади ҳамда сақлов билан боғлиқ тўлов олинмайди. Ўта қимматли ёки ноёб ҳужжат топширилган ҳолларда, аксинча, архив фуқародан уни давлат томонидан белгиланган нархда сотиб олиши ҳам мумкин. Нодавлат архив фондининг ҳужжатлари, шу жумладан, жисмоний шахсларнинг хусусий мулки сифатида сақланаётган архивлари юридик ва жисмоний шахсларнинг фойдаланиши учун фонд эгаларининг розилиги билан берилиши мумкин.

Матбуот анжуманида архив ишига оид бошқа маълумотлар ҳам берилди.

 

Равшан ШОДИЕВ,

«Ўзбекистон овози» мухбири. 



DB query error.
Please try later.