Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
04.06.2016

ОЛИМПИЯ КУНИГА БАҒИШЛАНГАН БАЙРАМ

Кеча пойтахтимизда Олимпия кунига бағишланган анъанавий республика югуриш мусобақалари бўлиб ўтди.

Халқаро Олимпия қўмитаси ташаббуси билан ҳар йили дунёнинг икки юз олти мамлакатида ташкил этиладиган бундай мусобақа сиҳат-саломатлик ва спорт байрами — замонавий Олимпия ҳаракатига асос солинган кунга бағишлаб ўтказиб келинади. Ўзбекистон Миллий олимпия қўмитаси, Маданият ва спорт ишлари вазирлиги, Болалар спортини ривожлантириш жамғармаси ҳамда Республика енгил атлетика федерацияси ҳамкорлигида уюштирилган мазкур спорт байрамидан кўзланган мақсад аҳоли, айниқса, ёшлар ўртасида Олимпия тамойиллари ва соғлом турмуш тарзини кенг тарғиб қилиш, уларни жисмоний тарбия ва спортга жалб этишдан иборат.

Бу йил йигирма бешинчи маротаба ташкил этилган мусобақалар дастлаб туман (шаҳар) ва вилоятлар миқёсида ўтказилди. Анъанавий югуриш мусобақалари финал бос­қичида Қорақалпоғистон Республикаси, вилоятлар ва Тошкент шаҳридаги саралаш баҳсларидан муваффақиятли ўтган турли ёшдаги минг нафардан зиёд спортчи ва ҳаваскорлар қатнашди.

Ўзбекистон Миллий олимпия қўмитаси ҳудудида ўтказилган баҳс­ларда турли ёш гуруҳларида ғолиб ва совриндорлар аниқланди. Шуни­нг­­дек, Олимпия куни муносабати билан байрам иштирокчилари бокс, таэквондо (WTF), дзюдо, велоспорт, стол тенниси, камондан ўқ отиш сингари спорт турлари бўйича моҳир спортчиларнинг чиқишларини кузатиш имкониятига ҳам эга бўлдилар.

— Ёшим олтмиш бирда, — дейди байрам иштирокчиси Саломат Раҳимова. — Юнусобод туманидаги «Аҳилобод» маҳалласида яшайман. Олти йилдирки, Олимпия куни муносабати билан ўтадиган югуриш мусобақаларида қатнашиб келаман. Бу йилги байрам ҳар доимгидан-да чиройли ва файзли ўтмоқда. Югуриш мусобақаларида ғолиб чиқиш эмас, балки қатнашишнинг ўзи мен учун катта ютуқ. Мусобақа баҳонасида анчадан бери кўришмаган дугона ва дўстларим билан учрашдик. Ташкилотчиларнинг махсус сов­ғалари билан тақдирландим, кўнглим тоғдек кўтарилди.

Бу йил илк маротаба матбуот ва оммавий ахборот воситалари ходимлари ўртасида ҳам югуриш мусобақалари уюштирилди. Унда эллик нафардан зиёд ҳамкасбимиз қатнашди.

— Югуриш мусобақалари аҳоли ўртасида соғлом турмуш тарзини тар­ғиб қилишда катта аҳамиятга эга, — дейди «Ассалом, Ўзбекистон!» теледастури муҳаррири Фахриддин Самадов. — Унда биринчи марта ўз омадимни синаб кўрдим. 500 метрга югуриш баҳсларида марра чизиғини бешинчи бўлиб кесиб ўтдим. Ғолиблар сафидан жой олмаган бўлсам-да, ўзимни чемпионлардек ҳис этяпман. Аввало бу мусобақадаги иштирокимдан кайфиятим жуда кўтарилди. Агар ишдан бўш вақтларимда енгил атлетика билан шуғуллансам, келгуси мусобақаларда бемалол биринчи ўринни эгаллашим мумкинлигини ҳис этдим. Ташкилотчиларга катта раҳмат!

Спорт байрами сўнггида мусобақа ғолиб ва совриндорларига махсус совғалар ҳамда сертификатлар топширилди.

 

Эркин ХОЛБОБО,

«Ўзбекистон овози» мухбири.



DB query error.
Please try later.