04.06.2016

ЁШЛАР БАНДЛИГИ — ДОЛЗАРБ МАСАЛА

Партиямиз Сайловолди дастурида аҳолини, шу жумладан, касб-ҳунар коллежлари битирувчиларини эгаллаган мутахассисликларига мувофиқ иш билан таъминлаш борасида давлат ташкилотлари, ижро ҳокимияти идоралари ҳамда корхона-ташкилотлар масъулиятини ошириш муҳим вазифа этиб белгиланган.

Ҳар бир фуқаро меҳнат қилиб, ўз қобилиятини рўёбга чиқаришни, жамият ҳаётида фаол иштирок этишни истайди. Бироқ бу борада ҳамманинг ҳам имконияти тенг эмас. Шунинг учун аҳолининг қўллаб-қувватлашга муҳтож қатлами манзилли ижтимоий ҳимоясини янада кучайтириш, уларга меҳнат қилиши учун кенг имкон яратиш давлат ва жамият олдидаги муҳим вазифа ҳисобланади.

Ўзбекистон ХДП Марказий Кенгаши ва партиянинг Олий Мажлис Қонунчилик палатасидаги фракцияси ташаббуси билан «Микрокредитбанк», Ўзбекистон Хотин-қизлар қўмитаси ҳамкорлигида Сирдарё вилояти Оқолтин туманидаги гидроме­лио­рация ва хизмат кўрсатиш касб-ҳунар коллежида «Касб-ҳунар коллежи битирувчилари ва хотин-қизлар бандлигини таъминлашда микромолия­вий хизматлардан фойдаланиш» мавзусига бағишланган семинар бўлиб ўтди.

Тадбирда партия фаоллари ва аъзолари маҳаллий Кенгашлар депутатлари, «Микрокредитбанк» вилоят бўлими мутасаддилари, Хотин-қизлар қўмитаси масъуллари, коллеж битирувчилари ва кенг жамоатчилик вакиллари иштирок этди.

— Партиямиз Сайловолди дас­турида аҳолини, шу жумладан, касб-ҳунар коллежлари битирувчиларини эгаллаган мутахассисликларига мувофиқ иш билан таъминлаш борасида давлат ташкилотлари, ижро ҳокимияти идоралари ҳамда корхона-ташкилотлар масъулиятини ошириш муҳим вазифа этиб белгиланган, — дейди Олий Мажлис Қонунчилик палатаси депутати, ЎзХДП фракцияси аъзоси ­Комила Каромова. — Шу боис янги иш ўринлари ташкил этиш ва битирувчилар бандлигини таъминлаш биз учун энг устувор вазифалардан бири ҳисобланади. Бу борада ЎзХДП фаоллари, депутатлик гуруҳлари қатор ташаббусларни илгари сурмоқда. Масалан, Олий Мажлис Қонунчилик палатасидаги партиямиз фракцияси ва халқ депутатлари маҳаллий Кенгашларидаги пар­тия гуруҳлари ҳамкорлигида мазкур йўналишда мунтазам мониторинг олиб борилмоқда. Хато ва камчиликларни бартараф этиш бўйича тизимли ишлар амалга оширилмоқда.

Мамлакатимизда кичик бизнес ва хусусий тадбиркорликни қўллаб-қувватлашга қаратилаётган алоҳида эътибор туфайли, чорвачилик, асаларичилик билан шуғулланиш, иссиқхона барпо этиш, ҳунармандчилик ва замонавий хизмат кўрсатишни йўлга қўйишга иштиёқманд йигит-қизлар кўпа­йиб бормоқда. Уларни қўл­лаб-қувватлашимиз ва йўл-йўриқ кўрсатишимиз муҳим аҳамиятга эга.

Тадбирда соҳа мутахассислари бугунги кунда ўз мустақил ­фаолиятини бошлаш истагида бўлган ёшлар учун яратилган имтиёз ва имкониятлар, шарт-шароитлар, ҳуқуқий асослар, бизнесни суғурталаш масалалари бўйича тушунча беришди.

Маълумот ўрнида айтиш керакки, Оқолтин гидромелиорация ва хизмат кўрсатиш касб-ҳунар коллежини тамомлаган 200 дан зиёд битирувчининг асосий қисми ўз мутахассислиги бўйича ишга жойлашган. Тадбиркорлик билан шуғулланиш истагини билдирган 5 нафар битирувчига тижорат банк­лари томонидан кредит маблағлари ажратилмоқда.

— Биз, ёшларга берилаётган имкониятлардан хурсандмиз, — дейди коллеж битирувчиси ­Зулайҳо Орифбекова. Туманимизда озиқ-овқат маҳсулотлари савдосига мўлжалланган мини-маркет очиш мақсадида «Микрокредитбанк»дан 40 миллион сўм миқдорида кредит олдим. Ҳозирча 3 нафар тенгдошим мен билан бирга ишламоқда. Келажакда фаолия­тимни кенгайтириб, яна бир неча тенгдошларимни иш билан таъминламоқчиман.

Тадбир доирасида «Микрокредитбанк» томонидан ташкил этилган аҳолига банк хизмати кўрсатиш, кредитларни расмийлаштиришга оид йўл-йўриқлар акс этган кўргазма ҳам қатнашчиларга манзур бўлди.

Шунингдек, Олий Мажлис Қонунчилик палатасидаги партия фракцияси ва маҳаллий Кенгашлар депутатлари иштирокида кўчма Жамоатчилик қабулхонаси ташкил этилиб, қатор мурожаатлар қабул қилинди, уларни ҳал этиш бўйича чора-тадбирлар белгилаб олинди.

 

Наврўз ШОДМОНҚУЛОВ,

«Ўзбекистон овози» мухбири.



DB query error.
Please try later.