Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
28.05.2016

ҲЕЧ КИМДАН КАМ БЎЛМАГАН АВЛОД

ўз истеъдоди ва маҳоратини намойиш этмоқда

Олтин водий гавҳари — Фарғона шаҳридаги ­«Истиқлол» стадиони, теннис кортлари, Фарғона давлат университети, Политехника институти, Олимпия захиралари спорт коллежининг барча шарт-шароитлар яратилган спорт майдонлари ва саройларида мусобақалар қизғин давом этмоқда.

2000 йили Наманганда илк бор ўтказилган Универсиада дас­туридан спортнинг тўққиз тури ўрин олган эди. Фарғонадаги баҳсларда эса талаба-спортчилар волейбол, футбол, баскетбол, енгил атлетика, таэквондо (WTF), дзюдо, теннис, оғир атлетика, сузиш, стол тенниси, шахмат, қўл тўпи, эркин ва юнон-рум кураши, бокс бўйича беллашмоқда. Ушбу спорт турларининг ўн тўрттаси Олимпия ўйинлари дастуридан жой олганлиги Универсиаданинг нуфузини оширмоқда.

Кеча сузиш, енгил атлетика, оғир атлетика, юнон-рум кураши бўйича дастлабки ғолиблар маълум бўлди. Сузишнинг 50, 100 ва 200 метр масофага ўтказилган баҳсларида пойтахтлик Артём Пухнатий, Владислав Мустафин, Даниил Букин, навоийлик Хуршид Турсунов, Зилола Болибоева, Алёна Томина, сирдарёлик Гулнора Раҳимова олтин медалларга сазовор бўлишди.

400 метрга эстафетада Артём Пухнатий, Даниил Букин, Владислав Мустафин ва Ислом Аслоновдан иборат Тошкент шаҳри жамоаси ғолиб чиқди.

Ядро улоқтириш мусобақасида наманганлик Шаҳриёр Жаҳонгиров ва пойтахтлик Ольга Глухопкина биринчи ўринни эгаллади.

Қизлар ўртасида 1500 метр масофага югуриш баҳсларида пойтахтлик Кумушой Матёқубова олтин медаль билан тақдирланди.

Вилоят ихтисослаштирилган болалар ва ўсмирлар спорт мактабида оғир атлетика бўйича эркаклар ўртасида ўтган баҳсларда андижонлик Рўзимурод Аслонов, Файзулла Набиев, бухоролик Рустам Латипов, Сардор Дўстмуродов, Тошкент вилоятидан Алишер Абдуллаев, самар­қандлик Муҳаммад Бегалиев, хоразмлик Фарҳодбек Собиров ва қорақалпоғистонлик Рустам Жангабоев ўз вазн тоифасида тенгсиз, деб топилди.

Юнон-рум кураши бўйича беллашувларда тошкентлик Феруз Тўхтаев, бухоролик Мирзабек ­Раҳматов, фарғоналик Диёр ­Шарипов ва қашқадарёлик ­Жаҳонгир Турдиев шоҳсупанинг энг юқори поғонасига кўтарилишди.

— Эллик метр масофага эркин усулда сузиш бўйича маррага биринчи бўлиб етиб келдим, — дейди Андижон вилояти терма жамоаси аъзоси Раъно Омонова. — Бухорода 2013 йили ўтказилган Универсиадада уч маротаба шоҳсупага кўтарилгандим. Ўтган давр мен учун катта тажриба мактаби вазифасини ўтади. Андижон давлат университети жисмоний маданият факультети 4-босқич талабасиман. Айни пайтда университетда таҳсил олиш билан бирга мамлакат терма жамоаси таркибида халқаро мусобақаларда юртимиз шарафини ҳимоя қиляпман. Яқинда Рио-де-Жанейро олимпиадасига йўлланмани қўлга киритдим. Мақсадим — ёзги Олимпия ўйинларидан совриндор бўлиб қайтишдир.

— «Универсиада — 2016» мусобақалари ҳаётимда унутилмас из қолдириши шубҳасиз, — дейди Фарғона вилояти терма жамоаси аъзоси, Зулфия номидаги Давлат мукофоти лауреати Сарвиноз Саидхўжаева. — «Умид ниҳоллари» ва «Баркамол авлод» спорт ўйинларида стол тенниси бўйича вилоятимиз шарафини муносиб ҳимоя қилиб, совриндор бўлганман. Ўтган йиллар давомида турли халқаро мусобақаларда тажрибамни оширдим. Универсиадада илк маротаба қатнашаётган бўлсам-да, бош совринни кўзлаяпман. Бунинг учун маҳоратим ҳам, кучим ҳам етади.

Спорт байрамининг тантанали очилиш маросимида Универсиада машъаласини ёқишдек бахт менга насиб қилгани юрагимни ҳаяжонга тўлдириб қолмасдан, зиммамга катта масъулият ҳам юклади. Бундай ишонч ва эътибор мени янада руҳлантиради, келажакда нафақат Универсиадада, балки Осиё ва жаҳон чемпионатларида, Олимпия ўйинларида ғолиблик учун курашишга ундайди.

 

Эркин ХОЛБОБО,

«Ўзбекистон овози» мухбири.



DB query error.
Please try later.