26.05.2016

ЧИРОҚЧИДА ЯНА БАЙРАМ

Мамлакатимизда ҳамма баб-баравар байрам қиладиган саналар оз эмас. Лекин ҳар бир туман, шаҳар ва вилоятда шундай қувончли воқеалар бўладики, улар ҳақиқий байрамга айланиб кетади. Агар сўнгги икки йилда қайси туманда байрам кўп бўлганлиги ҳисоб-китоб қилинса, Қашқадарёнинг Чироқчиси пеш­қадамлар қаторидан жой олиши аниқ.

Ушбу анъана жорий йилда ҳам давом этмоқда. Яқинда бўлиб ўтган Чироқчи шаҳридаги маданият ва дам олиш маркази, «Ҳумо» қишлоқ фуқаролар йиғини ҳудудидаги 1-ўсмирлар ва спорт мактабининг очилиш маросимлари ҳамда фуқаролар йиғинларининг диний-маърифий ҳамда маънавий ахлоқий тарбия масалалари бўйича маслаҳатчилари ўртасида ўтказилган «Гимнастрада ҳамма учун» спорт мусобақаси ҳам туман аҳли учун ҳақиқий байрамга айланди.

Қашқадарё вилоят ҳокими Зафар Рўзиев, Болалар спортини ривожлантириш жамғармаси ижрочи директори Эркин Бўриев иштирок этган ушбу тадбирларда Президентимиз раҳбарлигида юртимизда амалга оширилаётган бунёд­корлик, аҳолининг, айниқса, ёш авлоднинг баркамоллиги йўлида қилинаётган кўп­лаб хайрли ишлар ва уларнинг самараси тилга олинди.

Дарвоқе, Чироқчи шаҳри марказидаги 80-йилларда қурилган кинотеатр биноси ташландиқ ҳолатга тушиб қолганди. Ўтган йили иморатнинг орқа тарафидаги майдонда болалар истироҳат боғи барпо этилди. Бу йил эса ўша иморат қайтадан реконструкция қилиниб, маданият ва дам олиш марказига айлантирилди. Бу ерда 400 ўринли томошахона, доира, рақс, анъанавий ижрочилик тўгараклари фаолият кўрсатмоқда.

«Ҳумо» ҚФЙ, Тумонобод қишлоғидаги янгидан қурилган 1-болалар ва ўсмирлар спорт мактаби эса қўшқаватли кўркам иморат ва катта ўйингоҳдан иборат. Мактаб директори Фарҳод Жумановнинг айтишича, ушбу иншоотни қуриш ва жиҳозлашга 2 миллиард 613 миллион сўм маблағ сарфланибди. Ҳозирги пайтда 12 спорт тўгарагида 57 мактаб, 4 коллеждан 2,5 мингга яқин бола футбол, волейбол, баскетбол, бадиий гимнас­тика, миллий кураш билан шуғулланмоқда.

«Гимнастрада ҳамма учун» спорт мусобақасининг шаҳар ва туман бос­қичларида ғолиб чиққан 14 жамоанинг Чироқчида бў­либ ўтган вилоят босқичи беллашуви янада қизиқарли кечди. Унда фуқаролар йиғинларининг диний-маърифий ва маънавий ахлоқий тарбия масалалари бўйича 140 нафар маслаҳатчилари ўз жисмоний баркамолликларини намойиш этишди.

Ушбу мусобақада Қамаши тумани вакиллари биринчи, Чироқчи тумани жамоаси иккинчи, Шаҳрисабз тумани маслаҳатчилари учинчи ўринни эгаллашди. Ғолибларга вилоят ҳокимлиги ҳамда ҳо­мийларнинг совринлари улашилди.

Шу куни спорт мактабида Қашқадарё вилоят ҳокимлиги ҳамда вилоят халқ таълими бошқармаси томонидан «Ўқувчи ёшлар, айниқса, қизлар ўртасида соғлом турмуш тарзи, жисмоний тарбия ва спортни оммалаштириш борасида спорт мактабларида амалга ошириладиган ишларни янада такомиллаштириш» мавзусида амалий ўқув-семинари ҳам ўтказилди.

 

Юнус УЗОҚОВ,

«Ўзбекистон овози» мухбири.



DB query error.
Please try later.