24.05.2016

СОҒЛИҚНИ САҚЛАШ ВАЗИРИ АХБОРОТ БЕРДИ

Олий Мажлис Қонунчилик палатасида Ўзбекистон Халқ демократик партияси фракциясининг ташаббуси билан навбатдаги парламент эшитуви ўтказилди

Президентимиз ўтган йил январь ­ойида бўлиб ўтган Олий Мажлис палаталарининг қўш­ма мажлисида парламент олдида турган ўта муҳим вазифаларни белгилаб берган эди. Хусусан, янги конституциявий шароитда парламент эшитувлари, ҳукумат аъзолари, давлат ва хўжалик бошқаруви органлари раҳбарларининг қонунчилик талаблари ижроси бўйича амалга оширилаётган ишлар тўғрисидаги ҳисоботларини тизимли равишда эшитиб бориш, депутатларнинг сўровларига атрофлича жавоб қайтарилишини таъминлашга эришиш парламентнинг кундалик иши бўлиши зарурлиги алоҳида уқтирилди.

Шундан келиб чиқиб, юртимизда давлат ҳокимияти ва бошқаруви органлари ўртасида манфаатлар мувозанатини таъминлаш, қонун устуворлигига эришиш, шунингдек, ҳудудларни ижтимоий-иқтисодий ривожлантириш, мансабдор шахсларнинг масъулиятини ошириш масалаларида муҳим ислоҳотлар изчил давом эттирилмоқда. Мамлакатимизда демократик ислоҳотларни янада чуқурлаштириш ва фуқаролик жамиятини ривожлантириш концепцияси ғоялари, Конституциямизга киритилган ўзгартиш ва қўшимчалар асосида парламент назоратини кучайтириш бўйича ўзига хос тажриба тўпланди.

Жорий йил 12 апрель куни матбуотда эълон қилинган «Парламент назорати тўғрисида»ги Қонун эса тизимдаги ислоҳотларни янада чуқурлаштиришда, демократиянинг умум­эътироф этилган тамойил ва қоидаларини ҳаётимизга кенг жорий этишда янги имкониятлар яратиб берди.

Маълумки, Қонунда Олий Мажлис Қонунчилик палатаси, Сенати зарур бўлган ҳолларда ўз мажлисларида ҳукумат аъзоларининг ўз фаолиятига доир масалалар юзасидан ахборотини эшитиш, шу асосда тегишли қарор қабул қилиш ҳуқуқига эга экани белгилаб қўйилди. Ушбу демократик меъёрлар мамлакатимизда қонун ижодкорлиги ва унинг ижроси сифатини жиддий ­равишда ошириш, давлат ҳокимияти органлари ҳамда мансабдор шахсларнинг масъ­улия­тини куча­й­тириш, сиёсий партияларнинг демократик жараёнларга таъсир доирасини кенгайтиришга хизмат қилади, албатта.

Шуни айтиш керакки, Олий Мажлис Қонунчилик палатасидаги Ўзбекистон Халқ демократик партияси фракцияси Сайловолди дастури ҳамда электорат манфаатларидан келиб чиқиб, долзарб ижтимоий масалалар бўйича парламент назоратини изчил йўлга қўйишга жиддий эътибор қаратмоқда.

Куни кеча ЎзХДП фракция­си ташаббуси билан Олий Мажлис Қонунчилик палатасининг навбатдаги йиғилишида Соғлиқни сақлаш вазири Анвар ­Алимовнинг тегишли ахбороти эшитилди. Унда вазир мамлакатимиз соғ­лиқни сақлаш тизимида амалга оширилаётган ислоҳотлар, фуқаролар соғлиғини муҳофаза қилиш, сифатли тиббий хизмат кўрсатиш бўйича олиб борилаётган ишлар тўғрисида атрофлича маълумот берди.

Ялпи мажлисда алоҳида қайд этилдики, мамлакатимизда соғ­лиқни сақлаш соҳасида амалга оширилаётган кенг кўламли ислоҳотлар аҳолига кўрсатилаётган тиббий хизматлар сифатини янада оширишга хизмат қилмоқда. Оилаларда соғлом турмуш тарзини шакллантириш, оналик ва болаликни муҳофаза қилишни таъминлаш юзасидан кўрилаётган чоралар ўз самарасини беряпти. Бу борада мус­таҳкам ҳуқуқий асослар яратилиб, улар доимий тарзда такомиллаштириб борилмоқда. «Соғ­лом она ва бола йили» Давлат дастурининг ишлаб чиқилиши ҳамда қабул қилиниши ушбу йўналишдаги ишлар самарадорлигини янада оширишнинг муҳим омили бўлди.

Ушбу парламент эшитуви олдидан аҳолининг бу борадаги мурожаатлари таҳлил этилди, шу асосда депутатлар жойларда тиббиёт масасаларининг фао­лиятини ўрганишди, — дейди Олий Мажлис Қонунчилик палатасининг Меҳнат ва ижтимоий масалалар қўмитаси раиси, ЎзХДП фракцияси аъзоси Ёқуб Умаров. — Назорат-таҳлил натижалари дастлаб фракция ва қўмита йиғилишларида атрофлича кўриб чиқилди. Уларда депутатлар, фракциямиз аъзолари томонидан долзарб масалалар кўтарилди, соҳада учраётган хато ва камчиликларни бартараф этиш юзасидан таклифлар берилди. Шундан сўнг парламент эшитуви ташкил этилди.

Эшитув вақтида депутатлар мамлакатимизда фуқароларнинг тиббий ёрдамдан фойдаланиш ҳуқуқини таъминлаш бўйича изчил чоралар кўрилаётганини таъкидлашди. Хусусан, соҳага ажратилаётган бюджет маблағлари йилдан-йилга ошиб бораётгани, тиббиёт муассасаларининг моддий-техник базаси яхшиланаётгани қайд этилди.

Мажлисда фуқаролар соғ­лиғини муҳофаза қилиш соҳасидаги қонунларнинг амалга оширилиши ҳолатига ҳам эътибор қаратилди. Хусусан, «Психиатрия ёрдами тўғрисида»ги Қонун ижроси билан боғлиқ масалалар кўриб чиқилди. Қонунга асосан аҳолига психиатрия ёрдами кўрсатиш (текширувдан ўтказиш, тиббий-ижтимоий реабилитация қилиш), шунингдек, тизимдаги муассасалар фаолиятини такомиллаштириш чора-тадбирлари амалга оширилаётгани таъкидланди. Хусусан, 2013-2015 йилларда босқичма-босқич тарзда 11 муассасада қурилиш-реконструкция ишлари олиб борилди. Жорий йилда ҳам 8 муассасада таъмирлаш жараёнлари бошланган.

Депутатлар айрим муассасаларнинг моддий-техник ­базаси ва кадрлар салоҳиятини мустаҳкамлаш, улар фаолиятининг самарадорлигини ошириш, касалликларнинг олдини олиш ва даволашга доир ишлар сифатини янада юксалтиришга қаратилган тавсияларини билдиришди.

Қонунчилик палатаси қўмиталарига соҳадаги қонун ҳужжатларини синчиклаб инвентаризациядан ўтказиш ҳамда амалдаги қонун ҳужжатлари ва ҳуқуқни қўллаш амалиётини такомиллаштириш юзасидан таклифлар ишлаб чиқиш тавсия этилди.

Ахборотни эшитиш якунларига кўра, Қонунчилик палатасининг қарори қабул қилинди.

 

Лазиза ШЕРОВА,

«Ўзбекистон овози» мухбири.



DB query error.
Please try later.