24.05.2016

ФАРҒОНА ЁШЛИК ВА КАМОЛОТ БАЙРАМИ ОҒУШИДА

Яна икки кундан сўнг Фарғонада мамлакатимиз олий таълим муассасалари талаба-спортчиларининг «Универсиада — 2016» мусобақалари республика финал босқичи бошланади. Унда Тошкент шаҳри, Қорақалпоғистон Республикаси ҳамда барча вилоятларнинг жами ўн тўртта терма жамоаси спортнинг ўн беш тури бўйича ғолиблик учун кураш олиб боради.

Юртбошимиз ташаббуси билан жорий этилган уч бос­қичли узлуксиз тизим — «Умид ниҳоллари», «Баркамол авлод» спорт ўйинлари ва Универсиада ёшлар ўртасида спортнинг оммавийлигини ошириш, истеъдодларни кашф этиш ҳамда қўллаб-қувватлашда муҳим омил бўлмоқда. 

«Универсиада — 2016» мусобақалари муносабати билан вилоятда кенг кўламли ободонлаштириш, бунёдкорлик ишлари амалга оширилди. Жумладан, янги спорт иншоотлари барпо этилиб, кўплаб спорт мажмуалари таъмирланди.

— Фарғона шаҳрида мусобақаларни юқори савияда ўтказиш учун аниқ чора-тадбирлар амалга оширилди, — дейди «Универсиада — 2016» ўйинлари матбуот хизмати раҳбари Шоҳидбек Аслонов. — Фарғона давлат университети, Фар­ғона политехника инс­титути, Фарғона Олимпия захиралари коллежи спорт заллари замон талаблари асосида таъмирланиб, жиҳозланди. Фар­ғона давлат университетида 3200 ўринли стадион, ёпиқ сузиш ҳавзаси, учта волейбол майдони ва енгил атлетика йўлаклари қурилиб, фойдаланишга топширилди.

 Мусобақа иштирокчиларининг яшаши, овқатланиши ва мазмунли дам олиши учун қулай шароитлар яратишга алоҳида эътибор қаратилди. Фарғона давлат университети ва политехника институтининг талабалар турар-жо­йи замонавий услубда таъмирдан чиқарилди.

 Вилоят марказида кенг кўламли ободонлаштириш ва кўкаламзорлаштириш ишлари амалга оширилиб, хиёбон ҳамда кўчаларда гулзорлар ташкил этилди. Фарғона шаҳрининг Алишер Навоий, Аэропорт, Сайилгоҳ, Аҳмад Фарғоний каби марказий кўчалари янада чирой очди. Шаҳар кўчалари Универсиада, ёшлик ва спортни улуғловчи шиорлар ва лав­ҳалар билан безатилди. Меҳмонларни кутиб оладиган аэропортдан тортиб иштирокчилар жойлашадиган манзилларгача кўркам қиёфа касб этаётир. Фар­ғона Олимпия захиралари коллежида ёшлик ва нафосат байрамини юқори са­вия­да ташкил этишга катта тайёргарлик кўрилмоқда.

— Юртимиз талаба-спортчиларининг ўзига хос ёшлик ва камолот байрамига шаҳримиз мезбонлик қилаётганидан беҳад хурсанд­миз, — дейди Фарғона давлат университети 1-босқич талабаси Муқаддас Икромова. — Мен 2012 йили Навоий шаҳрида умумтаълим мактаблари ўқувчилари ўртасида ўтказилган «Умид ниҳоллари» спорт ўйинлари республика финал босқичида стол тенниси бўйича бронза медалига сазовор бўлганман. Орадан икки йил ўтиб, Наманганда ўтган академик лицей ва касб-ҳунар коллежлари ўқувчиларининг «Баркамол авлод» спорт мусобақалари финал босқичида фахрли иккинчи ўринни эгалладим. Айни пайтда Фарғона вилоят терма жамоаси таркибида «Универсиада — 2016» баҳсларига пухта ҳозирлик кўряпман. Мақсадим — бу гал Универсиаданинг олтин медалини қўлга киритишдир.

— Ўғлим Сардор Мирзаев бугунги кунда футбол бўйича Ўзбекистон миллий терма жамоаси ҳамда Тошкентнинг «Локомотив» клуби шарафини ҳимоя қиляпти, — дейди фарғоналик Тилланазар Мирзаев. — Оиламизда барча спортни жону дилдан яхши кўради. Ўғлим ҳозирда Фар­ғона политехника институтида таҳсил олмоқда. Фарзандим бунгача «Умид ниҳоллари», «Баркамол авлод» спорт ўйинларида вилоятимиз шарафини ҳимоя қилган эди. Шу кунларда Сардор Фарғона вилояти терма жамоаси таркибида Универсиада мусобақаларига тайёргарлик кўрмоқда.

Президентимиз ташаббуси билан ўтказиб келинаётган уч босқичли спорт тизими юртимизда чин маънода иқтидорли ёшларни кашф этиш ва элга танитишда муҳим ўрин тутишини бугун ўз фарзандим мисолида кўряпман. Бизнинг талабалик йилларимиз билан бугунги давр­ни асло таққослаб бўлмайди. Бугун Фар­ғонага ташриф буюрадиган ёшлар бир-биридан кўркам ва замонавий спорт иншоотларида ўз шижоатини намойиш этади. Чинакам ёшлик байрамида қатнашган йигит-қизлар эса ўз уйларига олам-олам таассуротлар билан қайтадилар, деган умиддаман.

«Универсиада — 2016» мусобақалари республика финал босқичида 1068 нафар спортчи ва мураббий, 155 нафар ҳакам, шунингдек, юртимизнинг таниқли спортчилари, маданият ва санъат намояндалари, оммавий ахборот воситалари ходимлари қатнашиши кутилмоқда. Спорт мусобақалари Фарғонадаги ўн иккита замонавий спорт иншоотида ўтказилади.

 

Эркин ХОЛБОБО,

«Ўзбекистон овози» мухбири.



DB query error.
Please try later.