28.04.2016

ЧИРОҚЧИЛИК ЁШЛАР

ўқиш, изланишда барчага ўрнак бўлмоқда

Чироқчида Республика Маънавият тар­ғибот маркази ва туман ҳокимлиги ҳамкорлигида «Юксак маънавиятли авлод» фестивали ўтказилди.

Қишлоқ хўжалиги ва хизмат кўрсатиш коллежининг ҳовлисида 14 ёшдан 25 ёшгача бўлган 800 дан ортиқ йигит-қиз, санъаткорлар, ҳунармандлар, шунингдек, маҳалла фаоллари, ота-оналар тўпланишди. Куй-қўшиқ янгради. Йиғилганлар ёш рассомлар, кулоллар, дурадгорлар томонидан яратилган ижодий ишларга баҳо беришди.

Коллежнинг дарахтларга бурканган ҳовлисига эрталабдан фестиваль иштирокчилари тўплана бошлашди. Мен уларга боқиб ўтмишда иқтисодий ночор туманнинг мустақиллик йилларида жадал ривожланаётгани, муносиб авлод камолга етаётгани ҳақида ўйлайман. Айни пайтда туман аҳолиси 400 мингдан ошиқ. Жами 176 мактабда 60 мингдан зиёд, 16 коллежда 10 мингдан ортиқ ёшлар таълим олмоқда.

Анжуман ўтадиган қишлоқ хўжалиги ва хизмат кўрсатиш коллежининг директори Ихтиёржон Абдуллаевнинг айтишича, ушбу таълим муассасасида 2082 нафар ўқувчи 12 йўналиш бўйича касб-ҳунар ўрганишмоқда. Илм ва ҳунар масканида барча шароитлар яратилган. 2003 йилда Япония гранти асосида турли қишлоқ хўжалик машиналари ва ускуналар келтирилган. Суҳбат давомида бизга яна бир хушхабар айтишди — туман ҳокимлиги коллеж учун алоҳида ер майдони ажратиб бермоқчи экан. Ўқувчилар ўзлари қишлоқ хўжалиги маҳсулотлари етиштиришар экан.

Тобора ҳовлини тўлдираётган ёшлар, тадбир ташкилотчилари билан суҳбатлашаман. Республика маънавият тарғибот маркази туман бўлими раҳбари Шоназар Жовлиев, «Камолот» ёшлар ижтимоий ҳаракати етакчиси Санжар Бобоқулов ёшлар учун яратилаётган шароит, кутубхоналар, фестиваль шартлари ҳақида гапиришади. Яна туманда камолга етаётган иқтидорли ёшлар, уларнинг ўй-фикрлари ҳақида сўз боради.

Масалан, Юртбошимиз бундан анча йил бурун «Қаҳрамон» қишлоғида яшаётган 6-синф ўқувчиси Сарвиноз Эргашеванинг Испанияда ўтган халқаро шоҳмот мусобақасида эришган ютуқларини қувониб эътироф этган эди. Йиллар ўтди, Сарвиноз шоҳмот бўйича яна кўплаб муваффақиятларга эришди. Қарши давлат университетини битириб, ҳозир ўқитувчи бўлиб ишламоқда. У яшаётган қишлоқда ёшу кекса шоҳмотни хуш кўради. Тўйларда кураш, кўпкари ўйинлари қатори шоҳмот мусобақалари мунтазам ўтказилади. Ҳозир тумандаги тўгаракларда 1000 дан ортиқ шоҳмот ишқибози шуғулланишаркан.

Дурдона АКБАРОВА, Чироқчи туман хотин-қизлар қўмитаси раиси, халқ депутатлари Қашқадарё вилоят Кенгашидаги ЎзХДП гуруҳи аъзоси:

— Фахрланиб айта оламизки, ёшларимиз билимдон ва изланувчан. Уларнинг камол топиши учун барча шароитлар яратилмоқда. Соғлом танда соғ ақл, дейди доно хал­қимиз. Ўтган йили туман марказида болалар истироҳат боғи қуриб ишга туширилди. Шу йилнинг март ойида Ҳумо қишлоғида спорт мактаби фойдаланишга топширилди. Шуни қувонч билан айтаманки, мазкур мактабда катта ёшдагиларнинг спорт билан шуғулланиши учун ҳам барча шарт-шароит яратилган. Натижада 400 аёл мунтазам жисмоний тарбия билан шуғулланмоқда. Ўзим ҳам спортга қатнаяпман. Қуш уясида кўрганини қилади деганларидек, ёшлар ота-оналаридан ўрнак олишади.

Чироқчи турли касб-ҳунар эгалари маҳорати билан тилга тушган. «Араббанди» қишлоғидаги гилам тўқувчи, «Шуҳрат» медали соҳиби Салтанат Қўлдошеванинг ҳунарини Япония давлатидан келган аспирант қиз бир йил давомида ўрганиб, ўз юртида алоҳида китоб эълон қилди. Ҳозир Салтанат 35 нафар ёшга гилам тўқиш сирларини ўргатмоқда.

Юсуф АБДУХАЛИЛОВ, коллеж ўқувчиси:

— Мен Қаршидаги «Насаф» футбол академиясида таълим олдим. Ҳозир шу коллежда ўқишни давом эттиряпман. Келажакда машҳур футболчи бўлмоқчиман. Миллий терма жамоамизнинг жаҳон чемпионатига чиқишига ҳисса қўшмоқчиман.

Лайло АБДУҲАМИДОВА, коллеж ўқувчиси:

— Ота-онам ўқитувчи. Мен ёшликдан тикувчиликка қизиқаман, шеърлар ёзаман. Президентимизнинг «Юксак маънавият — енгилмас куч» асарини барчамиз ўқиб-ўрганаяпмиз. Ҳеч қандай ёт ғоя бизни чал­ғита олмайди. Ватанимиз биз учун жондек азиз.

Ахтам ҲАЙДАРОВ, Жар ҚФЙ раиси:

— Бизнинг қишлоқларимизда 8 мингдан ошиқ аҳоли истиқомат қилаяпти. Жами 4 мактаб ва 1 коллеж бизнинг ҳудудда. Маҳалла фаоллари бу ўқув масканларига тез-тез бориб туришади. Қадимдан бир болада етти қўшнининг ҳаққи бор, деган нақл қолган. Ҳақиқатан ҳам фарзандларимиз эл-юртга содиқ, миллий ғояларимизни қалбга жо қилиб камолга етишлари учун барчамиз масъулмиз.

Тадбир бошланди. Ўзбекис­тон мадҳияси янгради. Табрикдан сўнг навбат кўрикка келди. Агар образли қилиб айт­сак, болалар дунёси беғубор, бепоён, уларнинг қалби парвозга шайланаётган умид қушларини эслатади. «Баркамол авлод» болалар марказида фаолият кўрсатаётган тўгарак аъзоси, 3-синф ўқувчиси Умид Дўстқулов портрет жанрига қизиқаркан. Шоҳрух Бойғозиевнинг чизган манзаралари ҳар қандай кишига қувонч бағишлайди. 41-мактабдаги «Моҳир қўллар» тўгараги аъзолари турфа буюмлар тайёрлаб келишибди. Ёш кулоллар, дурадгорлар ишлари ҳам диққатга сазовор. Шунингдек, «Президент асарлари билимдони», «Энг иқтидорли ҳунарманд», «Ватан куйчиси» ва бошқа йўналишлар бўйича ғолиблар аниқланди.

Ногиронлар аравачасида ўтирган, аммо тенгдошларидан қолишмай улар билан баҳслашаётган бир қиз эътиборимни тортди. Танишдик. У Бахтинисо Маҳмудова экан.

— 2009 йилда Қарши тиббиёт коллежида ўқиётган эдим. Ногоҳ йиқилиб, жароҳат олдим, — дейди у. — Жарроҳлик амаллари наф бермади – оёқларим ишламай қолди. Аммо тўшакка михланиб қолишни истамайман. Ўқиб-ўрганаяпман. Юртимизни, бахтимизни, истиқлолимизни куйлашга интилаяпман. Иккита шеърий китобим чоп этилди. Бугун фестивалда янги танишлар, дўстлар орттирдим. Биз ёшлар Ватанимизни шундай севамизки, дунёда ҳеч ким бизни ойдин йўлимиздан чал­ғита олмайди. Чунки таянчимиз бор. Битта шеъримда «Юраги меҳрдан бунёд халқдир бу», деб ёзгандим. Мен ҳам шу улуғ халқнинг битта заррасиман...

 

Юнус УЗОҚОВ,

«Ўзбекистон овози» мухбири.



DB query error.
Please try later.